[E toe fa’atalofa atu i paaga masani a le tatou polokalame i lenei vaiaso, malo le soifua manuia, ae o le toe soso’oina atu lea o le tatou polokalame fa’asolo, lea na gata mai i le vaiaso na te’a nei i le taimi lea ua talanoa atu ai le tamaititi o Koso i lana uo o Kei e tusa ai o le manaoga a lona tina.]

“Fai aku o le leva ga ou vaai aku o e sau mai o i le magakolu ao lea fa’akoa e kaugu’u mai, o ai la sa lua kalagoa mai i kafakafa o le faleoloa”?, o le fesili lea a Felila le tina o Keli, ae na fa’ataga le ano lava i ai le ali’i i le fesili a lona tina. “Awuuu, sole, pei lava e fai akui le kua o le pako i le ali’i lea, o ai la sa lua kalagoa mai i kafakafa o le faleoloa”?, o le toe fesili atu lea a Felila i lana tama ma pisi lava e teu lana pa laau, “Se o Silia, ga sau e fa’akau atu gi lakou pilikaki e falai ai le lakou maukegi ga ma o mai ma maua ma Koso mai le ma faiga kooga’i mai uka”, e tali atu lava Keli i le fesili a lona tina ma savali fa’asasa’o lava i tua i le umukuka ma tu’u ai lana avega, ona toe savali mai loa lea o le ali’i i totonu o le fale ua saofa’i ai i luga o le nofoa ma inu lana ipu ti kofe ma koma ai, e le’i umi ae savali atu loa ma lona tina ma la saofafa’i to’alua ai i tua i le umukuka o le fale ma la talatalanoa ai lava.

“Ae aisea ua lua kalagoa ai fua ma Silia i luma o le faleoloa,se se’i fai fa’alelei ga mea sole po o sa’o sa’o, ga eke iloa lelei lava o lega eke lua uo ma Koso, o le kele fo’i o kaimi e ke alu ai i o i le fale, isi lava fo’i kaimi e ke moe ai, ou ke le maga’o lava e kupu mai se mea ae ka’u aku ai lou igoa ali’i Keli, ga eke iloa lelei lava lou kama, o le makai fai upu i le gu’u, e mau kofiga fo’i i kokogu o le Ekalesia, aemaise ai fo’i a’u i le va ma fafige o le gu’u, ou ke le maga’o lava la e kula’i mai se mea makaga e ka’u mai ai lou igoa, ka le lava fa’alumaiga i kokogu o le gu’u ma le ekalesia, ae ua e iloa lelei lava fafige o le gu’u legei, e kiga lava si kama’i mea e le’i vaai iai se isi ae kaumafai lava e koso iga ia kele”, o le talatalanoa atu lea o le fafine o Felila i lana tama, ae sa na o le lulu o le ulu o Keli ma tali atu i lona tina, e leai se mea o tupu i le va o ia ma Silia, sa na o le la talanoa lava ae le faapea sa la talanoa ona o nisi tulaga.

“O uiga lava ga o kagaka o legei gu’u, e le o e koko gi ma’umaga e fafaga ai a lakou fagau ma fai gi mea e akiga’e ai a lakou aiga, ae ga o le kaukakala lava ma kuu fua isu i mea e le oo i ai lo lakou malosi”, e fai lava tala a le tamaititi o Keli ma savali aga’i i le umukuka ma amata loa ona tapena le fa’alifu o le afiafi, sosoo atu ai lava ma le sauni e alu i le malae kirikiti ma le fa’amoemoe, la te fetaui ai ma Silia lea ua uma oa la tu’utala, la te fetaui i le malae kirikiti. E uma loa ona fai ofu taalo o le tamaititi o le a alu ese a le fale, ae te’i loa i le valaau atu o le tagata i lona igoa, ma le tepa atu i tua o lana uo o Koso lea ua alu atu e tauanau o ia la te o loa i le malae kirikiti.