O le vaiaso nei na tatala aloaia ai le Ofisa fou a le WIC i lona nofoaga tuai i Utulei, ina ua maea ona toe faafouina lea fale mo le tautuaina o le atunuu. E pei ona silafia, o le polokalame o le Foods & Nutrition a le malo tele o loo faatupeina lea tautua, i lalo o le matagaluega o Tautua Lautele a le malo, lea o loo taitai ai Leilua Stevenson.

O le masiofo a le kovana sili ia Mary Ann Tulafono na ootiiina le lipine, ae o le afioga i le Kovana Sili ia Togiola Tulafono na saunoa i le saunoaga autu o le aso.

I le molimau a Stevenson, o le fa’atupega o le galuega na talosaga ai i latou i le Food & Nutrition Services a le USDA ma sa tulitatao atu fo’i i se tusi fa’amaonia a le Kovana Sili lea talosaga, ma maua mai ai le tinoitupe ua fa’aaluina i le fausaga o le fale fou e $691,000.+ Peita’i, na talosaga i le vaega tupe a le ARRA e ala i le susuga Pat Galea’i ma le latou Ofisa ina ia fa’atupe mai ai fa’amalamalama, Ea Malulu ma Moli i ituaiga mea nei e fa’asaoina ai le so’ona fa’aalu o le eletise, ae fa’auia mai i le Ofisa o le TEO i Tafuna. Na talia lea fo’i talosaga ma fa’aalu ai le vaega tupe e 241,000. maua le tau a’ofai o le Ofisa Fou o le WIC e $933,000.+

O lea fo’i se agaga o le Kovana Sili ina ua tula’i i lona sao i le tatalaga o lea Ofisa. “O le galuega lenei ua fai ma molimau i lo outou sapaia o se galuega fia fa’atino ma ia ma’ea ma lelei ona fai, fa’afetai mo outou uma lava ua lisia i le lisi a Leilua i lenei taeao!”

“O mea nei e tate fia molimauina, aua o lea ua tulata ina ou le toe i ai i lea li’o, ae o se mea e fiafia ai, pe afai e fa’atino ai ma tiute o le aufaigaluega e pei ona faia e ta’ita’i ma i latou e faia fa’ai’uga i matagaluega ta’itasi.”

“Ona o le WIC o lo’o tautuaina ai pelega a le atunu’u i Tina Ma’itaga, tina failele ma fanauiti o le lumana’i o le atunu’u, ua fa’afetai galulue fa’atasi, ua tino ai i le galuega lenei, ma isi galuega uma ua mavae na vave ma lelei ona fa’atino, po’o le a lava o tatou filifiliga i ta’ita’i e tutula’i mai, ae ia mau lo outou galulue fa’amaoni i o outou tiute fai i le Malo.” O se isi lea tautalaga matagofie a le Kovana na fa’afofogaina.

“Ua mae’a le fale, ae o le anofale! O a mai? O outou le aufaigaluega, o outou na, ae o outou fo’i o tagata o le malo o Amerika Samoa. Aua ne’i avea le filifiliga o tofiga lea ua tulata mai nei, ma mea e fa’aitu’au ai le fa’atinoga o lau galuega, tu’u lena pito la’au se’i o’o lava i na taimi fa’atino, ae o lau pitola’au i so’o se taimi i totonu o lenei ofisa, o lau tautua ia au i e uma e mana’omia o lo’o aga’i mai, tautua e le fa’aitu’au.”

I le polokalama pu’upu’u na tatala aloaia ai le Ofisa o le WIC, na mua’i saunoa ai le tofa Muavaefa’atasi John Suisala ma fa’afeiloa’i i latou uma na potopoto. O le susuga le Feagaiga EFKAS i Utulei Ioane Evagelia sa tula’i mo sina upu ma le tatalo amata. Ina ua mae’a le folasaga matagofie a le tama’ita’i fa’atonu DHSS Leilua Stevenson, sa tu’uina loa le avanoa mo le saunoaga a le afioga le Kovana Sili Togila Tulafono.

O le avanoa i le Matuaofaiva, sa taua’ao muamua ai le Ki i le Ofisa fou i le fa’atonusili, ma saunoa ai e tusa o le galuega.