O le taeao ananafi sa tatalaina aloaia ai le fale fou, o le ofisa autu foi lea, o le Faletupe o Atina’e o Amerika Samoa i Pago Pago, i lona nofoaga tumau sa i ai le fale lea na faaleagaina e le galulolo o le 2009.

“O lenei faletele ma lona matagofie, ua toe fa’atepa ai i tatou i puapuaga sa tatou savalia mai, ma oi ai lo tatou atunu’u, maliliu ai nisi ae maise ua fa’aleagaina ai le tele o meatotino a le tatou Malo. Fa’afetai, o se va’aiga e fefe ai sa tatou lutia ai, ae o lona toe tula’i mai, o se va’aiga matagofie ma le fa’afiafialoto. Ua galo ai tiga.”

O se toe tepa lea ma se saunoaga fa’apitoa a le peresetene o le komiti faafoe a le Faletupe o Atina’e  Nuanuaolefeagaiga Saoluaga Nua, lea sa ia tula’i e fa’afetaia le mamalu na sasao i lea maota fou, ina ia molimauina le galuega ua mae’a lelei, ma ua gaosia fo’i e tusa ma aiaiga tamau a le FEMA i so’o se fale e toe fa’atuina i lea nofoaga.

I le aofia na auva’a potopoto, sa matua fa’aofia le mamalu o le faigamalo i le afioga le kovana Lolo Matalasi Moliga ma le faletua, le Fa’amasino Sili Michael Kruse, Peresetene o le Maota Maualuga ma le mamalu o le fono faitulafono i ona maota e lua, ae maise sui o le kapineta. Sa auai foi le afioga le Ma’oputasi Mauga Asuega ma le pa’ia lasilasi o le afioaga o Pago Pago.

E le gata i lea, ae sa vala’auina fa’apitoa fo’i le susuga le fa’afeagaiga ia Taulagi Fa’atauva’a Talamoni ma le faletua fa’apea le aufaipese mo le sauniga.

I lana saunoaga, sa taua ai e Lolo e faapea,  “O se fa’afetai i le Atua e silisili lea, aua o se taeao pagatia ua suia nei i le taeao o le fiafia ma le fa’afetai, i lona toetoe a atoa le 5 tausaga o taumafai mai. Na va’aia le fa’atama’ia o mea uma, ae ua toe tepa i tatou i manuia sa tatou le iloa, fa’afetai lea i o tatou tua’a sa latou mafaufauina e avea Amerika ma fa’atama i la tatou faigamalo fa’ateritori.”

Sa toe manatu o ia i lena taeao Setema 29, 2009 i le taimi o le galulolo sa pau lana tala sa ia fa’ailoa atu i le aufaigaluega sa latou i ai i le nofoaga, “Sue le mea e ola ai le tagata! Lea ua tatou va’aia se malama fou.”

“Ina ua ou logoina Togiola e tusa o le tulaga o le faletupe, ua matua fa’atama’ia, sa ia fa’ailoa mai, ‘Fai le mea sili ma ia toe tatala le avanoa e fa’aauau ai galuega fai a le faletupe e tautua tagata o le atunu’u’. Fa’afetai o lea ua toe atoa tino o le galuega, fai la’ia o tou faiva,” saunoaga lea a le ali’i kovana.

I le tautalaga a le tama’ita’i peresetene o le Faletupe, Ruth S. Matagi-Fa’atili, sa ia fa’ailoa mai ai le tauaofai o le galuega.

“Mai le amataga o le tupe na toina mai e le FEMA  e fausia ai le faletupe e $2.7miliona, peita’i na toe suia nisi o fausaga o le faletupe fou ma ua toe faaopoopo ai le tau o le galuega, o lea tinoitupe ua totogia e le Faletupe o Atina’e lava ia, e $310,000 ma maua ai le tauaofai o le galuega atoa i le Kamupani a le Paramount Builders Inc. e $3.1miliona,” o le saunoaga lea a Matagi-Fa’atili.

O le leo o le fa’afetai sa fa’ao’o mai i le pulega muamua a le Komiti Fa’afoe sa latou amatalia lenei galuega matagofie, e pei o le afioga i le Matua ia Togiola Tulafono, sa kovana o lea vaitau. O le toto ia Lolo sa avea ma peresitene o le Faletupe i lea vaitaimi.

E pei o upu matagofie a le susuga le fa’afeagaiga ia Talamoni, “Afai e le atina’e e Ieova le fale, e galulue fua e atina’e, a le leoleoina fo’i e Ieova le a’ai, e mataala fua e leoleoina.”

“Lea ua tutula’i i lona matagofie ua maimoaina, ia aeae nei manuia ua maua, ma ia fa’aaoga mo le auaunaga i o tatou tagata, e ala i le amataina o pisinisi, toe fa’aleleia o pisinisi, ae maise o falenofo o le atunu’u ia matagofie,” o se tala lea a le failotu.

Mai le kovana sa ia fa’ailoa ai, “Afai e fia matagofie foliga o le Komiti fa’afoe o le Faletupe, ia fai le galuega e fa’aleleia ai fale nofo o le atunu’u, afai fo’i e fia matagofie atili le tatou faletupe ma lona taupulega, ia fa’aolaola mai a tatou pisinisi, ia ola fiafia le atunu’u.”