E silia i le $5 miliona le aofaiga o mea sa faaleagaina i timuga ma lologa na aafia ai Amerika Samoa i le faaiuga o le masina o Iulai e oo atu i le amataga o Aukuso ma o le mafuaaga lea ua talosagaina ae e le alii kovana se fesoasoani mai l le fetarale.

O lea talosaga na tusi atu ai Lolo Matalasi Moliga, i le peresetene o le malo o Amerika ia Barack Obama, tau ala atu i le sui o le FEMA ia Karen E. Armes.

Na tomua le tusi a le alii kovana i lona talosagaina lea o Obama, mo sana poloaiga e faalauiloa aloaia ai le a’afia o Amerika Samoa i tulaga pagatia, e mafua mai i timuga ma lologa na tutupu i le atunuu, ma ia talosagaina ai se fesoasoani tau tupe.

Na taua e le alii kovana i lana tusi e faapea, o aafiaga o le atunuu i timuga ma lologa, e le gata sa manunu’a ai tagata, ae o le to’atele o aiga ua leai ni mea e nonofo ai, ma ua manaomia ni nofoaga le tumau e faamautu ai mo le taimi nei. E toatasi le tagata na maliu ona o lea faalavelave.

Sa taua fo’i e le alii kovana le tele o eleele sa solo, atoa ai ma le fa’aleagaina o meatotino a tagata atoa ai ma pisinisi.

E tele se galuega e manaomia ona faia mo le toe tapenaina o mea sa faaleagaina i timuga ma lologa, atoa ai ma le faamamaina o le lapisi ina ia faaitiitia ai aafiaga tau soifua maloloina o tagata, aemaise ai o le aafia atu ai o le tamaoaiga o le atunuu.

Ona o tulaga pagatia i lenei fa’alavelave, na taua ai e Lolo ia Obama lona tuuina atu o se faatonuga e aloaia ai le i ai o Amerika Samoa i se tulaga pagatia, i le taimi lava na tula’i mai ai timuga ma lologa i le aso 29 Iulai 2014 ma aafia ai le atunuu.

Taua foi e le kovana e sili ma le $5 miliona le aofaiga o mea sa faaleagaina ona o lologa ma timuga ma o lo’o manaomia e Amerika Samoa se fesoasoani a le fetarale e toe fa’aleleia mea uma sa fa’aleagaina, atoa ai ma galuega mo le toe tapenaina o le otaota ma lapisi na mafua mai i lologa.

Na faaiu le tusi a Lolo i lona tofia lea o le lutena kovana ia Lemanu Peleti Mauga, e avea ma ona sui (GAR) e faia fesootaiga mo mea uma e manaomia i lenei mataupu, ae tofia le susuga ia Alfonso P. Galea’i e fai ma sui o le malo e faia fesootaiga ma le FEMA faapea ai le vaega a le feterale, mo mea uma e manaomia mo fesotaiga.