I se tusi na tuu atu e le alii kovana ia Togiola Tulafono i ta’ita’i o le Fono Faitulafono i le vaiaso na te’a nei, a’o le’i malaga ese atu, o lo o ia talosagaina ai le Fono ina ia latou vaavaai i le taua o mataupu ua ia tuuina atu mo lana Fono Faapitoa ua valaauina, ma ia faapasia nei mataupu mo le manuia o le atunuu.

O lenei Fono Faapitoa faapitoa, o  le a amataina i le vaiaso fou, i le Aso Gafua o le vaiaso fou, Oketopa 22, 2012, mo le umi e 12 aso.

O le Fono Faapitoa lona lua lea a le kovana ua valaauina mo le Nofoaiga lona 32 a le Fono Faitulafono, lea na mae’a i le masina na te’a nei.

Mai pili ma iugafono e 14 ua tuuina atu e le kovana e talanoaina i lana Fono Faapitoa, o nisi o ia pili ma tofiga sa ia tuuina atu ae ua lata ina tapuni le Tauaofiaga mulimuli a le Fono i le masina na te’a nei.

O lo o muamua lava i luga i le lisi o mataupu a le kovana le pili e palota ai le tofi Senatoa, sosoo ai loa ma isi pili e pei o le Faatulagaina o le Tulafono o Aitalafu; pili e faasoasoa ai tupe e faaatoa ai le paketi o le tausaga tupe 2013; pili e sii ai lafoga mo le totogiina o ovataimi a le malo; pili e avea ai ai ma Vaega Tumaoti a le malo le Shipyard and Maritime Corporation of American Samoa; pili e avea ai ma Vaega Tumaoti le Ofisa o le American Samoa Historic Preservation Office, ma faaee atu ai nisi o matafaioi na te tauaveina.

O isi pili o lo o aofia i mataupu o le Fono Faapitoa e aofia ai pili e toe apili ai le faasalaga o le oti i le tulafono o lo o i ai; atoa ai ma pili e lua e toe faia ai suiga i tulafono o le puipuiga o le Gataifale ma Tautua a Foma’i.

O iugafono e fa mo tofiga a le kovana e aofia ai tofiga mo le Komiti Faafoe o le LBJ, lea e aofia ai Dr. Malouamaua Tuiolosega, Gaea Failautusi Perefoti ma Faamausili Mau Mau Jr; o tofiga mo sui e toatolu o le Komisi o Fefaatauaiga; tofiga o le Ofisa o Fuafuaga a le malo, ma tofiga mo sui o le Komiti o Tulafono a le Vaega Famalosi tulafono.

I le vaega faaiu o le tusi a le kovana i taitai o le fono, o lo o ia talosagaina ai i latou ina ia silasila toto’a i le taua o mataupu ua ia tuuina atu, ma ia faia vave i ai sa latou faaiuga e pasia ia mataupu mo le manuia o le atunuu.

Na faaiu le tusi a le alii kovana i lona faaoo atu lea o faamanuiaga i le Fono mo le alo atu ai i le latou Fono Faapitoa.

Ao le’i tapunia le tauaofiaga mulimuli a le Fono i le masina na te’a nei, na saunoa ai le alii peresetene o le Senate ia Gaoteote Palaie Tofau i luma o le Senate e faapea, o le tele o mataupu ia ua fuafua le kovana e avatu i lana fono faapitoa, o mataupu ua maea ona lalafo i ai le maota, ma e foliga mai e le tau toe faia i ai se finagalo o afioga i Senatoa.

Ae i le maota o sui i le vaiaso mulimuli o le latou tauaofiaga, na saunoa faamalosi ai le fofoga fetalai ia Savali Talavou Ale i afioga i faipule, ina ia faamalolosi atu mo le iloiloina lea o mataupu o le Fono Faapitoa a le alii kovana, ae sili ai i lo lena, o se avanoa lelei lea e toe feiloa’i ai faipule, aua e le o iloa poo ai o le a faamanuiaina lana taumafaiga i le palota o loo loma nei, a’o ai foi o le a le faamanuiaina.