Na talia e ali’i fa’amasino o le fa’amasinoga maualuga talosaga a ali’i loia sa taulimaina le mataupu a se ali’i na ta’usala i lona fa’aaoga o se agaese e fa’aoo ai manu’a i se isi ali’i, ina ia tatala o ia i tua mai le falepuipui, ae ua lava le umi lea ua mae’a ona ia tuliina i le toese e avea ma ana fa’asalaga i lenei mataupu.

O le ali’i o Mataiaina Tiatia na ta’usala e le fa’amasinoga maualuga i le moliaga o le fa’ao’olima i le tulaga lua, e mafua mai i le fa’alavelave lea na ia taina ai se ali’i mai Lauli’i i se agaese, i le mae’a ai lea ona faia e lea ali’i o ni tulaga le manuia i lana fa’atoaga, fa’atasi ai ma lona faia o ni gaioiga e tau fa’amata’u ai i lana fanau.

E ui na taua uma e ali’i loia sa iloiloina le mataupu a Tiatia le matuia o le gaioiga sa faia e lenei ali’i, ina ua ia fa’aaoga le agaese e fa’ao’o ai manu’a i le ali’i na a’afia, peita’i sa la finauina le fa’amasinoga ina ia fa’asala le ua molia i se fa’asalaga nofovaavaaia, e aofia ai ma le tuutuuga ina ia tatala o ia i tua mai le toese.

Na taua e le tuafafine matua a Tiatia i luma o le fa’amasinoga e fa’apea, o le ua molia, o se tasi e fa’amoemoe tasi i ai lo latou aiga i soo se faagaioiga, o ia fo’i o lo o tausia lo latou tina matua e 85 tausaga.

E le gata i itu lelei o Tiatia i lona aiga sa fa’ailoa i luma o le fa’amasinoga, ae sa mafai fo’i ona fa’ailoa ona tulaga lelei i totonu o le nu’u ma le Ekalesia, e pei ona avea ai o ia o se tasi o ta’ita’i i ni isi o vaega o lana Ekalesia i Lauli’i.

Na taua fo’i e le tuafafine i lana molimau le mae’a lea ona toe teuteu o le mataupu sa tula’i mai i le va o le latou aiga ma le aiga o le ali’i na a’afia, ma ua toe nonofo lelei aiganalua.

Na finau le loia a Tiatia ia Tala Uiagalelei e fa’apea, o Tiatia e le o se tagata fa’amisa, peita’i o lona le manumalo i lona ita na mafua ai ona tula’i mai le fa’alavelave e pei ona ta’usala ai o ia e le fa’amasinoga.

O ni isi o tuutuuga e pei ona taua i le maliliega na sainia e Tiatia ma le malo, lea fo’i na talia e le fa’amasinoga i le aso 23 Fepuari o le tausaga nei, o le tuli lea e Tiatia o masina e 10 i le toese, ma ia auai o ia i ni aoaoga e fesoasoani ai i le tulaga o le ita.

Na talia e ali’i fa’amasino fa’afinauga a loia, ma poloaina ai loa Taitia ina ia fa’anofovaavaaia mo le 5 tausaga i lalo o tuutuuga e ao ona ia usita’i i ai.

O ni isi o ia poloaiga e aofia ai lona totogi o le salatupe e $1,000 i totonu o le ulua’i 12 masina o lana nofovaavaaia, totogi le pili o le falema’i a le ali’i na a’afia, auai i ni aoaoga e fesoasoani ai i le ita.

Ua tatalaina fo’i i tua ia Tiatia mai le toese i Tafuna, ina ua manatu ali’i fa’amasino, ua lava le umi lea sa taofia ai o ia i le toese e fai ma ana fa’asalaga i le nei mataupu.

O le afioga i le ali’i fa’amasino sili lagolago ia Lyle L. Richmond sa fa’atautaia taualumaga o lenei mataupu, fa’atasi ai ma le lagolagosua a afioga i ali’i fa’amasino lagolago ia Mamea Sala Jr ma Tunupopo Faleafaga.