Ads by Google Ads by Google

Tala otooto mai le Fono Faitulafono

PASIA TOFIGA A LE KOVANA MO MAUGAOALI’I

 

E 12-0 le palota na pasia ai e le maota o sui i le taeao ananafi tofiga a le afioga i le alii kovana, mo le afioga i le ali’i faipule ia Maugaoali’i Leapai Tusipa Anoa’i, e avea ai o ia ma sui o le maota o sui i totonu o le Komiti o le Pone a le malo.

 

O le afioga i le alii Fofoga Fetalai ia Savali Talavou Ale na tofiaina Maugaoali’i e avea ma sui o le maota o sui i le Komiti o le Pone, e sui tulaga i le afioga a I’aulualo Fa’afetai Talia, lea sa avea ma sui o le maota o sui i le taimi a o avea o ia ma faipule o le itumalo o Manu’a #.

 

Ina ua mae’a le palota a le maota o sui na pasia ai le suafa o Maugaoali’i, na tula’i le ali’i faipule ma fa’afetai i le maota o sui, e tusa ai o lo latou pasiaina o ia e avea ma o latou sui i le Komiti o le Pone a le malo.

 

“Ou te fa’afetai atu i le mamalu o le maota e tusa ai o la outou fa’aiuga paia lea ua fa’ailoa i le aso, ou te fa’afetai atu i lo outou fa’atuatuaina o lo’u nei auauna fa’atauva’a, e fa’apena fo’i i le Fofoga Fetalai, fa’afetai i le avanoa na e tofia ai a’u ou te galue i totonu o lea Komiti, fa’afetai i lou talitonuina o a’u, atoa ai ma le tu’uina mai o lou fa’amoemoega atoa mo a’u ou te tautua ai i lenei galuega taua”, o le saunoaga lea a Maugaoali’i.

 

Ae na taua e Savali i lana saunoaga e fa’apea, e le o se isi mafua’aga na ia tofia ai le ali’i faipule, ae ona o le manatu ina ia fa’aaoga lona tomai e tautua ai mo le malo.

 

Na fa’ai’u le saunoaga a Savali i lona talosagaina lea o Maugaoali’i, ina ia silasila toto’a i galuega e manuia ai le atunu’u, ma ia feso’ota’i mai fo’i i le Fono i mataupu e silafia e mafai ona fesoasoani atu ai le fono faitulafono i galuega a le Komiti o le Pone a le malo.

 

LEAI SE MANATU O LE FONO E VALAAU SE FONO FAAPITOA

 

O le taeao ananafi na fa’ailoa ai e le afioga i le Fofoga Fetalai ia Savali Talavou Ale i luma o le maota o sui, e le o i ai so la manatu ma le Peresetene o le Senate ia Gaoteote Palaie Tofau, e nofoia se Fono Fa’apitoa a le Kovana pe afai e mae’a le tauaofiaga lenei i le aso Lua o le vaiaso fou, ona o lea ua tele ina mae’a galuega sa talosagaina e le kovana ma le faigamalo ua pasia e le fono.

 

O le vaiaso nei na amata ai ona salalau fa’amatalaga i totonu o maota e lua, e i ai le fono fa’apitoa a le kovana o lo o mulimuli mai i tua o le tauaofiaga lenei, ona o lo o i ai isi pili tupe a le faigamalo o lo o fuafua e tu’uina atu i le Fono, atoa ai ma ni isi o mataupu o lo o talanoaina i le tauaofiaga lenei e le i mae’a ona faia i ai se finagalo o maota e lua.

 

E talitonu le Samoa News, o se tasi o mataupu sa talanoaina i se fonotaga faapitoa sa faia i le va o le alii kovana ia Lolo Matalasi Moliga ma Ta’ita’i o le Fono i le taeao ananafi, o le mataupu lea i le valaauina o se Fono Fa’apitoa.

 

O le aso Lua o le vaiaso fou e atoa i ai aso fono e 45 mo le tauaofiaga muamua lenei o le nofoaiga lona 34 a le Fono Faitulafono, ma sauni ai loa le Fono mo lana malologa, fa’atoa toe tauaofia le tauaofiaga lona lua i le aso Gafua lona lua o le masina o Iulai 2015.

 

FA’ATALI SE FA’AIUGA SENATE I NI ISI PILI TUPE UA PASIA FAIPULE

 

O lo o fa’atali le maota o sui i se fa’aiuga a le maota maualuga a le Senate, i ni isi o pili tupe ua mae’a ona faia i ai a latou fa’aiuga, ao lea lava e le i faia i ai se finagalo o afioga i ali’i Senatoa.

 

A o le i tapunia galuega a le maota o sui i le taeao ananafi, na saunoa fa’afetai ai le afioga i le Fofoga Fetalai ia Savali Talavou Ale i afioga i faipule, e tusa ai o galuega ua mae’a ona latou pasiaina sa talosagaina e le faigamalo a Lolo ma Lemanu

Saunoa Savali e fa’apea, e ui i le faigata o fa’aiuga fai i nei mataupu, ae ua manatu lava afioga i faipule e tuutuu i le loloto le tofa ma le fa’autautaga, ona o le vaai alofa fo’i i tulaga pagatia o lo o fetaia’i ma le malo i le taimi nei.

 

O ni isi o pili tupe ua pasia e le maota o sui, e aofia ai le pili mo le kilia e $20, pili e sii ai totogi o laisene pisinisi, atoa ai ma le pili e sii ai le lafoga i sikaleti.