ALATUNA SIMI

Ua talia e le fa’amasinoga maualuga i le vaiaso na te’a nei le talosaga na fa’aulu e le loia a le malo o Tiffany Oldfield, mo se avanoa e fa’ataga ai e le fa’amasinoga ona fa’alauiloa tuutuuga o le maliliega sa sainia i le va o le malo ma le ali’i o Alatuna Simi, ina ia fesoasoani ai i loia a isi ali’i o lo o molia fa’atasi ma Simi i lenei mataupu.

Na taua e Oldfield e fa’apea, o le taua o le fa’alauiloa o avega o le maliliega lenei, o le a mafai ai ona maua e isi itu faamaumauga moni e faatatau i le mea sa tupu, ma fesoasoani ai i le puipuia o aia tatau o isi alii e to’alua o lo o tu’uaia fa’atasi ma Simi.

O le masina na te’a nei na talia ai e le fa’amasinoga maualuga se maliliega na sainia e Simi ma le malo, peita’i e le i mafai ona fa’alauiloa tuutuuga o lea maliliega.

O lo o tuuaia Simi ma isi ali’i e to’alua i moliaga o le faomea i le tulaga muamua ma le gaoi, ma o lo o taofia pea o ia i le toese e fa’atali ai le aso e lau ai lana fa’asalaga.

FRED SILIPA

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Fred Silipa, e mafua mai i le fa’alavelave lea na maua ai o ia e leoleo i Fagatogo, o lo o ia fa’afoeina se ta’avale ae o lo o se’i lana laisene.

Na taua i fa’amaumauga a le fa’amasinoga e fa’apea, na avea le paka sese o le ta’avale na fa’afoe e le ua molia ma itu na fesiligia ai loa e leoleo lona laisene, peita’i na fa’ailoa e le ua molia i leoleo, o lona laisene o lo o se’i e le fa’amasinoga mo le 6 masina, ina ua ta’usala o ia i le moliaga o le ave ta’avale ‘ona.

I le aso na lau ai le fa’asalaga a Silipa ina ua ta’usala o ia i le moliaga o le ave ta’avale ‘ona, sa fautuaina ai o ia e le fa’amasinoga, e aua ne’i ona toe fa’afoeina se ta’avale ao se’i lona laisene, ina ne’i maua o ia e leoleo ma molia o ia i se solitulafono mamafa.

Na fa’ailoa fo’i e le fa’amasinoga ia Silipa e fa’apea, afai e fa’amaonia e le fa’amasinoga le moliaga mamafa fa’asaga ia te ia, e ono mafai ona faasala o ia i le toese mo le umi e le silia i le 5 tausaga, pe faasala i le salatupe e le silia i le $5,000, ae faamalosia lona tuliina o aso e 90 i le falepuipui i Tafuna.

O le masina o Ianuari 2015 lea ua toe tolopo i ai le isi iloiloga a Silipa.

SAMUEL WRIGHT

O le aso 9 Ianuari 2015 lea ua toe tolopo i ai le iloiloga a le susuga a Samuel Wright i luma o le fa’amasinoga maualuga, ina ua fa’amaonia e le ua molia i le fa’amasinoga lona naunau pea e avea le ali’i loia fautua mo tagata lautele ia Michael White ma ana loia fautua.

Na taua e White i le fa’amasinoga e faapea, o lo o latou galulue pea ma le mlao mo le tau faamautuina o se maliliega e faamuta ai lenei mataupu, ae pau le itu sa fia manino i ai, po o tumau pea le mana’o o Wright e avea o ia ma ana loia fautua.

Saunoa le afioga i le alii faamasino ia John Ward II e faapea, e tatau ona vave fetufaa’i itu e lua mo le fa’amautuina o le maliliega, ina ia o o atu i le isi iloiloga o lo o lumana’i nei, ua mautu le tulaga tonu e taoto i ai le mataupu, i le faia lea o se maliliega pe fa’atulaga loa le aso e faia ai le fa’amasinoga autu o lenei mataupu.

Ua toe taofia nei Wright i le toese i Tafuna e fa’atali ai lana iloiloga lea ua fa’atulaga e faia i le masina fou, ina ua le mafai ona ia totogi le vaega tupe e $100,000 na fa’atulaga e le fa’amasinoga e tatala ai o ia i tua.

O lo o tu’uaia Wright ma isi ali’i e to’alua i lo latou osofaia lea o le faleoloa o le Gold Gonda i Fagaalu i le masina o Me o le tausaga nei, ina ua ia fa’alala se a’upega mata’utia i le fa’atauoloa ae fao fa’amalosi e le isi ali’i sa la to’alua se pusa sa i ai se tino i tupe i totonu ma la sosola ese loa ma le faleoloa.