POLOKALAME KERISIMASI AOGA MANUMALO

O le taeao ananafi sa fa’atumulia ai  Manumalo Baptist School i Malaeimi i le mamalu lautele o matua ma aiga, fa’apea fo’i faia’oga ma le pulega o lea a’oga, ina ia molimauina le polokalama e fa’amanatu ai le Kerisimasi ma le Tausaga fou.

O le latou fa’afiafiaga i lenei tausaga, na gafa lea ma vasega pito i laiti o le latou a’oga Level K3, Levek 4 ma le Level K5. O le matagofie fo’i lea ole polokalame fa’asolo, aua e o’o i le afioga le Kovana sili o le malo ma le faletua, sa pa’au atu e fia maimoaina pesega, mau o le Tusi Pa’ia ua tauloto e le fanau, ae maise o latou fa’atinoga matagofie o fa’aevagelia ma a latou pesega o lenei vaitau o le Kerisimasi.

O se mea matagofie le taumafaiga a le fanauiti, aua e iloga i o latou foliga lo latou fiafia, ma e fa’aatagia ai le lagona fo’i o i totonu o latou aiga i lenei vaitau fiafia, fa’afetai ma sa matagofie lava lo latou sao fa’apitoa mo e uma na maimoaina le polokalame.

FONOTAGA A LE T.A.O.A.E FAAALI LOU TAOFI

Ua fa’ailoa mai e le TAOA po’o le Ofisa o Tagata Matutua e mo’omia ona e auai e fa’aalia sou taofi i le fonotaga fa’alaua’itele e vaai toto’a ai i ni suiga aoga e ao ina fa’aofi i le polokalame mo tagata matutua o le atunu’u.

O lenei fonotaga e faia i le aso Faraile 19 Tesema, 2014 ma e amata i le itula e 9a.m. i le taeao, e faia i le ofisa autu o le TAOA i Pago Pago.

O lo’o mana’omia manatu fa’aalia i ni suiga mo ta’iala o polokalame o lo’o fa’atautaia e le matagaluega mo tagata matutua ma e tusitusia uma manatu fa’aalia o lea fonotaga.

SAILIGA SIAMUPINI ASVBA I LE IPU A LE PERESITENE

O le aso To’ona’i ua te’a, sa fa’atautaia ai le sailiga siamupini a le Asosi Volipolo a Amerika Samoa (ASVBA) i lana Ta’amilosaga Volipolo mo le Ipu a le Peresetene e fa’ai’u ai taumafaiga a lea fo’i fa’agatama i lenei tausaga.

E tolu vaega sa fa’atautaia ai lea ta’amilosaga: Au a Tama’ita’i; Au a Tama 19 aga’i i lalo tausaga [U19] ma le ta’amilosaga o ‘au a Ali’i.

I le sailiga o le siamupini a tama’ita’i sa fetaui ai le BTI Blockerettes lea e ta’a’alo uma ai tama’ita’i tuai i lea fa’agatama, ma le ‘au malo a le BRA. O le fetauiga lea ua manumalo ma ua umia ai nei e le BTI Bockerettes le Ipu a le latou vaega o lenei Tausaga 2014.

I le vaega o Ali’i U19, ua umia nei e le Mizuno ae o le ‘au a Ali’i ua suia nei fo’i le Siamupini o lenei tausaga i le Ipu a le Peresetene - Star Kist Boys.

ASO TAPUNIA AI KONESULA SAMOA I TUTUILA

Ua fa’alauaitele mai aso ma itula o le a tapunia ai le Ofisa o le Konesula a Samoa i Amerika Samoa lea e totogi ma fa’ataga mai ai le ulufale o tatou tagatanu’u Amerika Samoa i Samoa tutoatasi.

O le a tapunia le ofisa i le aso Tofi (Tesema 25) ma le aso Faraile (Tesema 26) i le 2014. Mo le amataga o le tausaga fou, 2015, o le a tapunia le ofisa ia Ianuari aso muamua ma le aso lua.