LUA VAIASO SAUNI AI LE PESE - O LE LEO

O le toe vaiaso e tapenapena ai le au pepese o lo’o tauva pese o Le Leo o Amerika Samoa o le vaiaso a sau, ua mae’a i le vaiaso na te’a, ae ua fa’ailoa mai, “Ua mae’a le 2 vaiaso talu mai ona mae’a pikia le fa’atonu o le au tauva e 24 na mua’i filifilia, ma totoe mai le 38 o i latou na mua’i tauva i le amataga.”

“O le vaiaso nei e amata ai ona toe pepese taito’atasi le 24 lea, ma toe fili ai fo’i e agava’a mo le tamo’ega o le to’afa e sailia ai le sui manumalo.” O se tala lea a le sui o le Matagaluega o le Matagaluega o Talavou ma Tama’ita’i o lo’o gafa ma lea tauvaga, le susuga Tapumanaia Satele Jr.

O lo’o fa’alauiloa atu i fa’asalalauga totogi i le nusipepa, suafa o i latou e pepese ta’ito’alua i aso Lulu e lua ua te’a, peita’i, o nei ma le aso Lulu a sau o le vaiaso fou, e pepese ta’ito’atasi ai sui uma e 24 o tauva.

O le taimi lea o le a togia ai i latou ma o’o atu ai ina fa’ailoa ia i latou i le aso 16 Aperila, 2014, pe lisia lona suafa i le to’a 12 e sailia ai le manumalo i lea tauvaga.

“O le faiga ua faia nei, ina ia matua tutusa lelei le to’a ma le avanoa e tu’uina i sui ta’itasi e tauva ai, aua sa iloga mai le amataga, o nisi e to’a i le taimi e pese ai, ae o nisi e popole. O le umi ona fa’apese o i latou i lenei tauvaga, o le to’a lena o le sui, ma ua fa’aumiumi teisi ai le tauvaga ma toe fautuaina aloa’ia i latou mo a latou taumafaiga e latou fa’atonu tofia, ina ia manumalo.” O se tala lea a le sui lagolagosua i le tauvaga, Meke Lafaele.

“O le pepese ai o fa’atonu o le fanau tauva i Le Leo, o se kulimi lea o le keke, aua o le aso 16 Aperila, o le a fa’ailoa atu ai le to’a 12 ua mautu le matagaluega e si’itia i le isi la’asaga o le tauvaga, e soloa’i atu i le manumalo, ma e tatau ona toe va’ai le fanau lena, i le agava’a o lo’o i o latou fa’atonu, i taimi o tauvaga fa’apea.” O sana tala ‘ata lea.

O le ulua’i tauvaga o le tausaga ua te’a, na alu lava le sui ia e taumafai ia lelei lana taumafaiga ia te ia, ma nisi sa faufautua ia te ia o lona aiga ma e latou te iloa e masani i tauvaga pese.

Tatou auai uma i le Fale Laumei a nanei, aua o le taimi lenei, ua sili ona mo’omia fo’i e tou sui tauva, la outou lagolagosua, o le a tuto’atasi i latou e taumafai ni ona togi, mo le auai i le to’a 12 mulimuli pe leai.

A’OGA ELEI TALAVOU MA TAMAITA’I

Ua fa’atulaga le A’oga Elei mo lenei fo’i vaitaimi e toe amatalia i le aso 7 Aperila 2014, ma mafai ona lesitala lou suafa mo lea a’oga aoga mo tina ma so’o se tasi e fia silafia lea taleni.

“O a’oga nei o lo’o fa’agasolo ma fa’atautaia e le Matagaluega o Talavou ma Tama’ita’i, ina ia toe sofa’i tasi lava le iloa ma le silafia o i latou i nei fa’atufunaga aoga tele mo so’o se tasi, e aoga e tausailia ai le tamaoaiga i nei matata, ma fa’atutuina ai fo’i pisinisi i tusi pasi e taua’aoina ai pe a mae’a a’oa’oga nei.” O se fa’alauiloa mai lea a le susuga Pa’u Roy Ausage i le mamalu na aofia i le fa’au’uga na te’a o tama’ita’i ma ali’i ua mae’a le latou a’oga su’isu’i.

O lea ua sauni fo’i le matagaluega e faia le fa’au’uga o le Vasega Elei ua mae’a i le aso Tofi, Aperila 3, 2014, ae ua saunia fo’i le matagaluega ma lona faia’oga i lea matata ‘e soso’o le fau ma le fau’ i le a’otauina o nisi sui fou.

O le faia’oga ua fa’atulaga o Tou Collins, ma e faia vasega i le VA Tuai i Tafuna, i ona itula fa’atulaga mo vasega i le Aso Lua ma le aso Tofi, ae fa’atasi ona auai le sui a’oga i le vaiaso. O itula e fa’atautaia ai vasega o le 9:00 i le taeao se’ia pa’ia le itula 1:00 i le aoauli. E 12 vaiaso o le a faia ai nei vasega ona mae’a lea o le kosi elei. Fa’aulu lou suafa e ala i lou telefoni sa’o i le ofisa o Talavou ma Tama’ita’i i le numera 633-2835.