Ads by Google Ads by Google

Tala o Ta’aloga Kirikiti Liki o le Fu’a 2017

Le 'au lena a le Seaula, mai Aoa, ua fa'atalitali nei mo se 'au la te ta'a'alo i le Siamupini o le liki a tamaita’i, pe a maea le ta’aloga faitaulia i le va a le I'a Vai mai i Malaeloa ma le Aeto mai le afioaga o Pago Pago. [ata: THA]I se vaai atu lena i le taumafai a le teine o le Moso'oipala, e poloka le polo ina ua ta mai e le teine a le Lupelele. Lea na malo le Lupelele i le latou ta'aloga mataina ma Teine ole Moso'oipala *1. [ata: THA]O se vaaiga lena i le tamo'e saoasaoa a le tamaita'i lena o le 'au a le Moso'oipala, ae o lo'o tau sapo mai e le tamaita'i o ‘Pam' le polo. Vaai la i ai teine laiti i faiga o le uigi lena, ae ua liliu lana taleni i le kirikiti i le vaitaimi nei. [ata: THA]Manaia le sapo a le polo mamao lea a le 'Pisi', le 'au manaia lea ua i ai nei, i le ta'amilosaga. Talosia ia ia tau i le 'iuga o faigamea. [ata: THA]Le tigaina o tagata e tau pu'e mai le polo, le tala a le 'tusi 'oti' fai mai, 'Fai pe ete maua a'u.' [ata: THA]O se vaaiga pito i matagofie o le taumafaiga ina ia maua le ‘ai. Saoasaoa uma tagata i le taimi lenei o le liki aua ua toe nei o se ana va’aia le siamupini 2017. Malo le ta’alo! [ata: THA]
tusia: THA

Ave ia lenei taimi matou te momoli atu ai le fa’amalo fa’ale’au’au ma le fa’afetai fa’alelava, i le kamupani o le Bluesky Communications i la outou fesoasoani mai, i le tauaveina o tala  o ta’aloga kirikiti, i aso Lua ma aso Tofi o vaiaso ta’itasi.

I vaiaso uma lava, se’ia oo ina maua le ‘au siamupini o lenei tausaga, i liki a tama ma teine o le Fu’a 2017.

Ua loloma foi le taisua, fotupule le tai o Tumua, ua tuaaumafuamalu le tai o Tuiatua. Ua fa’amalo le ta’a’alo fa’atamali’i, ua malo fo’i le ta’alo fa’atausala i ‘au uma na auai i lenei liki o lenei tausaga 2017.

E le o ia te i matou ni manuia, ae e momoli atu ai sa matou fa’afetai tele i tou afioga ma le mamalu ia outou fetalaiga, i le Komiti o Kirikiti o le Fu’a 2017.

Malo le galulue, malo le fa’apalepale, malo le onosa’i, i le la ma timuga i le tele o aso, ae o lena e faia lava la outou pitolaau. Ia fa’amanuia mai le Atua pulepule tetele ia te outou.

FETULELE [5-1] vs. MOSIULA [3-3]

Na amata mai i le aso Lulu, ona le faia ta’aloga a tama i le malae i Gagamoe, fa’atoa fai mai i le aso Toana’i i le ta’aloga i le va a Fetulele mai Tula, ma le ‘au a le Mosiula.

Na ta’u mai i le ripoti, sa muamua ona tata mai le Fetulele, maua ai ‘ai e 101 ae 16 pe, ona o le fa’atamala lava o le Mosiula, na alai ona o’o i luga ‘ai a le Fetulele.

Ona o le tulafono e selau ‘ai ma tuli, lea na o ane loa le Mosiula mo le tuliina o ‘ai a le Fetulele e 101, ae 16 pe.

Ia na tata le Mosiula, fai mai i faiga lava o le talitua’a a le Fetulele, na vave ai na pepe le ‘au ta a le Mosiula, a’o le tele lava o taimi, na o le ta atu ae tu sa’o i luga polo i faiga o fa’ate’a a le Fetulele, le tama o Sam, Tanielu ma Fala.

Lea sa maua ai e le Mosiula ‘ai e 76 mai i le 19 o pe, manumalo ai le Fetulele i lena ta’aloga.

MOSO’OIPALA [3-3] vs. FAGAALU [2-3]

O se ta’aloga malie tele lenei ta’aloga, e fai o le tata uma ‘au ia e lua, na tata muamua le Moso’oipala *1, maua a latou ‘ai e 80, ae 17 pe. Lona uiga la, ua toe lua pe, o lo’o totoe nei i le Moso’oipala *1.

Ia na tulia nei e le ‘au a Teine o le Autalavou a Fagaalu, tuli lava maua, ia ona tata fo’i lea o latou ‘ai mama.

Fai atu o le ‘au e fou mai i kirikiti ae o le tata ia o teine (lea ua tatou vaai atu i le alu a Fagaalu pe a aulia mai le tausaga fou, i le lelei o a latou tata.

E maua e le ‘au a Fagaalu ‘ai e 102, ae uma loa a latou pe, ia na toe sauni mai fo’i le Moso’oipala e tulia e i latou ‘ai fa’asili nei e 22 a Faga’alu.

Ma o le mea na tulia e le kapeteni o Ali’itasi, ma isi teine lea e le’i pepe e to’alua.

E maua a’e ‘ai, ae toe o le masaga a le Moso’oipala, ma ua malo ai loa le Moso’oipala i le laua ta’aloga finau lea.

Ona sauni loa lea o le Moso’oipala *1, i le latou ta’aloga ma le Lupelele i le aso Toana’i. Teine ‘ai silia a le Moso’oipala; Sa’o 20, Aliitasi 15, Volita 12 ma Ana 16. (O fa’ate’a; Ana, Mellisa, Volita, Ali’itasi.)

Teine Autalavou Fagaalu e ‘ai silia; Sipoloa 16, Regina 18, Moana 18, Ulua’i 18.

O fa’ate’a; Sipoloa, Regina, Ruthy.

SEAULA [5-1] vs. TEINE O LE ASAGA [5-2]

O le ‘au lea ua tele ana ta’aloga i lenei tausaga, a le ‘au a Teine o le Asaga, ona, e fetaui lava ma isi ‘au e le’i nonofo nei ‘au aua e le’i atoa le 4 o faiaina.

Le mea lena ua tele ai ta’aloga a le Asaga i lenei tausaga, aua e maua mai lava e le Teine o le Asaga, ae ua toe tasi lava le ta’aloga a le ‘au, atoa loa le 4 faiaina.

Na tata muamua le Teine o le Asaga, na maua ai loa ‘ai e 80 ae 16 pe, ia fai fo’i le tulafono lea o le liki a tamaita’i, tata loa le ‘au a le Seaula.

O lenei ta’aloga ua matua tuli ‘ai lava teine o le Seaula, na maua lava ‘ai e 80 ae fa’ato’a 13 o latou pe. O tama’ita’i iloga ona tele ‘ai o Sela ma Fia ma e fa’amoemoeina lava i la’ua nei e tulia ‘ai.

Na tulia e le ono pe mulimuli ni o latou ‘ai fa’asili. Na maua o latou ‘ai fa’asili e 22, ona toe o mai fo’i lea o le Asaga, e tuli ‘ai ia a Seaula, e 13 a latou pe ae 80 ‘ai.

Ia a’o le taimi ua savalivali atu i le 4 itula talu ona faia le ta’aloga manaia ma le matautia, i le sailiga o se ‘au e fa’atalitali i le ta’aloga a le I’a Vai ma le Aeto.

Ua pei o le tuliga le Tufu ma Lele le ta’aloga lea, alu ai a, alu ai a, te’i loa ua toe 5 ‘ai, ae toe o le masaga lea ua tata nei a le Asaga.

Te’a atu le Seaula, maua isi ‘ai e lua a le masaga, totoe ai ‘ai e tolu (3), ia toe te’a mai loa le isi itu’olo, e le’i maua lelei i le ta a le isi teine o le masaga lea, sau loa le polo ma patatu lelei i le ‘olo.

Malo ai loa le Seaula, i le 102 ‘ai ae maua e le Asaga ‘ai e 99, na pei o le a le alu a’e i luga o leo a le tapuaiga lea a Aoa, i le manaia tele o le la ta’aloga i lena aso Toana’i.

Ua masani fo’i Teine o le Asaga, le mea lea e mautinoa, o la e laiti teineiti o le Asaga, e le’i taitai se taimi o la outou olaga ta’a’alo, o lena tou te laiti, o lea fo’i tausaga toe o mai.

Ia a le Teine o le Seaula, fa’amalo le ta’a’alo fa’atamali’i, lena ua outou manumalo mai i le tou ta’aloga manaia ma Teine o le Asaga, fa’amalo lava le ta’a’alo fa’atausala.

Ia o lea la o le a fa’atalitali nei, i se ‘au e malo mai a I’a Vai ma le Aeto, a malo le I’a Vai, ona su’e siamupini lea ma le Seaula i le aso Toanai.

Afai ae manumalo le Aeto, o lona uiga ona Siamupini loa lea o le Seaula i le Liki o le Fu’a 2017.

LUPELELE [4-2] vs. MOSO’OIPALA *1 [3-4]

O le ta’aloga lenei na vaaia ai le fa’ate’a a le teine lea o Mellisa Coulter, ua manaia mai lana te’a, e 9 ona ‘olo na maua i lea ta’aloga. Ma o lea la ua tutusa ai o la ‘olo ma le fa’ate’a a le I’a Vai, o Tauia.

Na taumafai lava le talitua’a a le Moso’oipala e taofiofi mai ‘ai a le Lupelele, lea na maua ai ‘ai e 78, ae 19 pe, ia ona o le lelei o fa’ate’a a le Moso’oipala, lea na maua ai ‘ai e na’o le 78.

Ia o le taimi la na talitua’a ai le Lupelele, ina ua maua e le teine lea o Mellisa, le fa’ate’a a le Moso’oipala ‘olo e 9, ua tutusa ai nei i le ‘olo silia o lenei tausaga.

Ana le lelei le te’a lena a Mellisa, semanu ua o’o lelei ‘ai a le Lupelele i le selau, ae le’i taitai pe.

O le aikia na fai e ‘Lupe’ o le le tu’ufauina se te’a, a lua lava te’a a le fa’ate’a e taia, ona sui mai lea o le isi fa’ate’a, o le mea lena na leai se avanoa ae teine ta a le Moso’oipala, e ta umi ai i se fa’ate’a a le Lupelele.

O le auala lena a le Lupelele, e le tu’uina se fa’ate’a pe a lavea i le teine ta, e suisui lava fa’ate’a i taimi uma pe a leaga le te’a i le taimi lena.

E le manao le Lupelele ina ia sao mai se ta a se teine o le Moso’oipala, o le aikia lena na le mafai ai e se teine o le Moso’oipala, ona to’a lelei i le fesuisuia’i mai o fa’ate’a a le Lupelele.

O le mea la na maua e le Moso’oipala ‘ai e 68, ae uma loa a matou pe e 19, lea la na manumalo ai le Lupelele.

Ia na le iloa e teine ta a le Moso’oipala le toaga o le Lupelele e sui mai ona fa’ate’a, i taimi uma lava, i le taumafaiga lava lena o fa’ate’a, e fesui ai mai i taimi uma lava.

O teine ta a le Lupelele; Tali 13, Ala 12, Kuinita 11 ma Tasi 8. Fa’ate’a: Ana, Kuata, Fa’aitete, ma isi ‘au fa’ate’a.

O teine aisilia o le Moso’oipala o Nofo 16. Fa’ate’a: Mellisa, Ana, Volita ma Ali’itasi.