Ua solofua e le fa’amasinoga maualuga se tagi a le malo sa faia fa’asaga i se ali’i pagota o le toese i Tafuna, ina ua fa’amaonia e le malo i le vaiaso nei le “pepelo” ma le “le sa’o” o fa’amatalaga sa faia e le molimau i leoleo, i le ulua’i taimi na fa’atoa tula’i mai ai lenei mataupu.

O le masina o Novema 2013 na faila ai e le malo moliaga fou fa’asaga ia Maeli Pitoitua po o Isumu, lea o lo o tuli ana fa’asalaga soloatoa e lua i le falepuipui i Tafuna, e faapea na sola i tua mai le sela o lo o loka ai ae mafuta atu i se fafine mo se la mafutaga faaleulugalii (tulou).

O le vaiaso nei na faila ai e le tamaitai loia ia Tiffany Oldfield se talosaga i luma o le fa’amasinoga maualuga, e talosaga ai le faaleaoga o tuuaiga sa faia faasaga ia Pitoitua.

Na taua e Oldfield i le fa’amasinoga e fa’apea, na alu atu le fafine o lo o aafia i lona ofisa ma talosaga atu e toe faaui i tua le tagi sa faia faasaga ia Pitoitua, ona e pepelo ma le sa’o ana fa’amatalaga sa fai i leoleo.

Na taua e le malo i le latou tagi faasaga ia Pitoitua e fa’apea, o le mafutaga i le va o le alii pagota ma le fafine na a’afia, na mafua mai ina ua vili sese e Pitoitua le numera o le telefoni feavea’i a le fafine i le isi po, ma la faia ai loa se tonu e sola atu le alii pagota i le po ma la mafuta i le fale o le fafine.

O le fafine e fai lona to’alua fa’aipoipo, ma o taimi e alu ai lona to’alua e faigaluega i le kamupani na tuuaia e le malo na maua ai le mafutaga a le to’alua lea. E silia i le 8 itula e faaalu e Pitoitua la te mafuta ai i le fale o le fafine ina ua sola i tua i se taimi o Iuni 2013.

Na taua fo’i i faamaumauga a le fa’amasinoga e fa’apea, o se tagata e tuaoi lona fale ma le fale o le fafine, sa ia iloaina le alii pagota o lo o alu atu i le fale, ma ia logoina ai le to’alua fa’aipoipo o le fafine i le mea o lo o tupu, ma faila ai loa e le tamaloa lana tagi i le ofisa o leoleo.

E tusa ai fo’i ma fa’amaumauga a le fa’amasinoga, sa tuu e le pule tuai o le falepuipui sa i ai i lea taimi ia Lumana’i Maifea le faatanaga ia Pitoitua, e galue ai mo le tusiaina o se saini i se taimi o le po, ma o taimi ia na taua e le malo sa sola ese ai le ua molia ae la mafuta ma le fafine.

O ia tuuaiga uma e pei ona taua i faamaumauga a le fa’amasinoga fa’asaga ia Pitoitua, ua le mafai ona fa’amaonia, ina ua talia e le fa’amasinoga le talosaga a le malo e solofua ai le moliaga e tasi o le sola ese mai le toese sa faia faasaga ia Pitoitua.

O Pitoitua na faasala e le faamasinoga i le olaga atoa, ina ua tausala o ia i le faalavelave lea na ia fana ina ai se alii ave taxi i le 1990, ma toe faaopoopo atu ai le isi faasalaga soloatoa ina ua tausala o ia e le faamasinoga i le 2006, i le faalavelave lea na ia faaoolima ai i ni pagota se to’alua.