Ads by Google Ads by Google

Sauni Glen Lefiti e finau le mataupu i le faamalolo faafuase’i o ia

Ua faalauiloa e le sa avea ma Pule o le Ofisa o Tiute, le susuga Vaetagaloa Glen L. Lefiti lea ua faamalolo mo se taimi le tumau, lona sauni e finau le mataupu e faasaga i le faamalolo faafuase’i lea o ia mai lana galuega i luma o le Fa’amasinoga.

 

Talu mai le faaiuga e tuuina atu le afioga a Vaetagaloa mo le aveina o ona aso malolo faaletausaga (annual leave) i le lua vaiaso talu ai, o le ulua’i taimi lenei ua maua mai ai se faamatalaga tuu sa’o mai ia te ia e tusa ai o lenei mataupu.

 

I lana faamatalaga tusitusia sa ia taua ai e faapea, mai lona tuputupua’e i ona matua o Faafetai ma Helga Lefiti, sa a’oa’oina ai o ia e ona tuaa i mea taua o le olaga e ao ona ia faia, ina ia fesoasoani ai i le atia’eina o lona olaga, ma o mea taua uma nei sa mafai ona fesoasoani i lona olaga a’o ofoina atu lona ola e tautua ma galuega ai i totonu o le vaega au a le malo tele o Amerika mo le 20 tausaga.

 

Na faafetaia e Vaetagaloa ana uo ma lona aiga ona o le latou talitonuina o ia aemaise ai o le tuuina atu o le lagolago ma upu faamalosi, ua mafai ai ona faamalosia lona tagata e tula’i atu ma faailoa mea moni o lo o ia talitonu e tatau ona fai.

 

Sa ia faamatala le faaiuga ua faia faasaga ia te ia, o se gaioiga atonu e fou i ni isi tagata, pau lona faanoanoaga faasaga i lenei mataupu, ona ua faamatuu atu e le malo o Amerika Samoa po o ni isi tagata e le o faailoaina o latou suafa, kopi o tusitusiga sa faia i le nusipepa o le Samoa News.

 

Na taua e Vaetagaloa e faapea, o tusi nei sa tuuina atu ia te ia mo na o ia lava, ma i lona talitonuga, o lo o i ai i totonu o nei tusitusiga ni isi o tusitusiga e gata lava i le tagata faigaluega ma lana fale faigaluega.

 

“Ou te le fefe e faafesaga’i ma tu’uaiga ua faia faasaga ia te a’u, ma ua i ai fo’i la’u fuafuaga o le a ou finauina le mataupu e uiga i tuuaiga faasaga ia te a’u i luma o le tulafono,” o le saunoaga lea a Vaetagaloa.

 

O le lua vaiaso talu ai na faia ai se faaiuga e faamalolo le afioga ia Vaetagaloa mai lona tulaga e pei ona galue ai mo le silia i le 10 tausaga, i lalo o se fautuaga na tuuina atu e lana pule, le Teutupe a le malo ia Falema’o ‘Phil’ M. Pili.

 

O le Faatonusili o le Matagaluega o Tagata Faigaluega a le malo ia Le’i Sonny Thompson na sainia le tusi sa tuuina atu ia Vaetagaloa e faailoa ai le faamaloloina o ia mai lana galuega.

 

O le faaiuga faasaga ia Vaetagaloa na faia ina ua tula’i mai se mataupu na aafia ai se tagata faigaluega a le Ofisa o Tiute, lea na ia pikiina mai se afifi mai le Falemeli i Fagatogo, a’o lea afifi o lo o masalomia e le ta’ifau a le K-9 a le Ofisa o Tiute, o lo o i ai ni vaega o fualaau faasaina i totonu.

 

O lo o tuuaia le afioga Vaetagaloa i lona faatamala lea e fai se faaiuga faasaga i se tasi o tagata faigaluega a lona Ofisa.

 

O le mataupu faasaga i le tagata faigaluega lea a le Ofisa o Tiute ua taoto atu nei i aao o le Matagaluega o Leoleo mo le suesueina, ae na taua e le afioga a Falema’o e faapea, e foliga mai ua faatamala Vaetagaloa e faatino ona tiute i le puipuia malu lea o tuaoi o le atunuu aemaise lava i mataupu e faatatau i le aumai faanana o fualaau ma ni isi lava vaega e ono lamatia ai le saogalemu o le atunuu.

 

I le tusi sa tuuina atu e Le’i ia Vaetagaloa, o lo o taua ai lona faatamala i le faatinoina o ona tiute faa ta’ita’i o le Tiute e faia se suesuega faasaga i lenei mataupu, ma o le le faia o se suesuega ua atagia mai ai lona faatamala e faatino ona tiute o le Pule o le Ofisa o Tiute.