Ads by Google Ads by Google

SASA I LE FA'AGA’AU TOE OTI PO’O LE ULU

Na matua te'ena e le ulugali'i lea o lo o tu'ua'ia i le sasaina lea o la laua tama teine i le fa'aga’au, fa'apea ai ma le oti po’oina o lona ulu tu'ua'iga a le malo fa'asaga ia te i la'ua, ina ua la tutula'i i luma o le fa'amasinoga i le vaiaso nei.

Fai mai le malo, o le mata'upu lenei na tula'i mai ina ua fa'atonu atu e le tamaloa lona afafine e 'aua nei toe sola 'ese ma lo latou aiga, ae le usita'i le teineitiiti ma oso atu lona gutu i lona tama.

Na avea lea ma itu na fa'asaga atu ai loa ma le toeaina ua fa'amo’amo’a le sasaina o lona afafine i le fa'aga'au, ae oso fa'alava atu ai foi ma le 'olomatua ia ma si ana seleulu ua selepo’o ai loa ma le foga o si ana tama.

O le masina fou lea ua fa'amoemoe e toe fofogaina ai lenei mata'upu i luma o le fa'amasinoga ma le fa'amoemoe, afai o'o atu i ai ua i ai se maliliega ua faia e le ulugali'i ma le malo, o lona uiga o le a fa'aaoga loa e le fa'amasinoga ma fofogaina loa le maliliega lea.

Ina ua mae'a ona sasa e le ulugali'i la laua tama e pei ona tu'ua'ia ai i la'ua e le malo, na aga'i atu ai loa le teineitiiti ma tau i ni isi o ana uo le mea ua tupu, ma fa'afeso'ota'i ai loa e i latou ia le ofisa o leoleo ma le falema'i mo se fesoasoani.

Fai mai ripoti a leoleo, sa iloga vaega o le tino o le teineitiiti na tau ai le fa'aga’au a o sasa e lona tama, ma o unuoa nei sa mafua ai ona auina atu le teineitiiti i le falema'i mo togafitiga, ma toe te’a ai i tua ina ua mae'a ona togafitiga.

O le poloaiga malosi lea ua tu'uina atu e le fa'amasinoga i le ulugali'i lenei, ua fa'asa ona o la toe taumafai e fa'afeso'ota'i le la tama i so o se auala, se'i vagana ua tu'u atu e le fa'amasinoga se isi poloa'iga, po o ni feso'ota'iga fo'i e faia e loia.

E na o le tamaloa na loka e leoleo ma fa'atulaga ai le $200 e tatala ai o ia i tua, ae o lona to'alua na toe tatala i tua e alu e va'ai si ana fanau laiti.

Na ta'ua e le loia a le malo e fa'apea, o mata'upu i le sauaina o fanau i totonu o aiga, o ni mata'upu e seasea tula'i mai, ae a o'o fo'i ina tula'i mai, e fai lava si matuia o a'afiaga e a'afia ai fanau e sauaina e matua, po o isi fo'i faiga le lelei.

O se tasi o sauaga ua matauina le fa'atupula'ia i le taimi nei fa'asaga i fanau laiti, o le faia lea i ai o amioga mataga fa'afeusua'iga, lea e a'afia uma ai tama'ita'i ma ali'i laiti.

O le vaiaso na te'a nei na molia ai i le tulafono se ali'i faia'oga i lona faia lea o amioga mataga fa'afeusua'iga i fanau a'oga laiti e to'atolu.

O lo o fa'amoemoe le malo ma le loia a le ulugali'i e tatau ona vave maua se fa'aiuga o lenei mata'upu i le isi iloiloga o lo o loma nei.