Na taua e le Faatonusili o le Ofisa o loo puipuia le Siosiomaga o le atunuu, le AS-EPA, afioga Fanuatele Dr. Toafa Vaiaga’e i luma o le Komiti o le Faagaioiga o le malo a le maota o sui i le taeao ananafi, e matua lagolagoina e lona Ofisa le fuafuaga fou a le kamupani i’a o le StarKist Samoa lea ua faia, e faamama ai le otaota o loo maua mai i ana gaioiga, ma pamu atu ai i le sami le suavai pe a maea ona faamamaina.

Saunoa Fanuatele, o se tasi o mafuaaga o le latou lagolagoina o lea fuafuaga, ona le faiga fou lea ua fai nei e le kamupani i’a, ua taofia ai le toe aveina atu o le latou lapisi ma lafoa’i i tai i le moana i le mamao e 5 maila, e pei ona faia i tausaga ua mavae.

O le finagalo foi lea o le afioga i le alii faipule ia Vailiuama Steve Leasiolagi ina ua saunoa e tusa ai o lenei mataupu, i le lagona fiafia ina ua mafai ona taofia le auina atu o le lapisi a le kamupani e lafoa’i i le sami.

Fai mai lana molimau, e ui o loo mamao ese atu ma le atunuu le nofoaga o loo lafoa’i i ai le lapisi a le kamupani, peitai o loo maua lava le avanoa e mafai ai ona ai e i’a otaota nei ma toe o atu tagata faifaiva ma fagota mai le i’a ma toe faatau atu i tagata.

O le iloiloga a le komiti na valaauina ai sui o le AS-EPA e molimau, ona o le mataupu e uiga i le lapisi o le suavai lafoa’i a le kamupani lea ua maua i ripoti o loo pamu atu i le sami i gatai o Aua.

O nisi o ripoti ua maua e le komiti na taua ai e faapea, o taimi uma lava e pamu atu ai le suavai lafoai a le kamupani i le sami, e faila atu e le kamupani lana ripoti i le Ofisa o le US-EPA, ae le o le Ofisa o le AS-EPA, ma o le isi lea atugaluga a le komiti, pe aisea e le aafia ai le Ofisa a le AS-EPA i le vaavaaiga o le gaioiga a le kamupani o loo faia nei.

Na faamanino e Fanuatele i lana molimau e faapea, soo se gaioiga lava e aafia ai ogasami i le teritori, e i lalo uma lava o le faamalumaluga a le Ofisa o le US-EPA a le malo tele.

O le lapisi e pei ona vevesi ai le komiti, na faamanino e le alii faatonu e faapea, o le mataupu i le lapisi e le fou, aua sa amata ona ave i le nofoaga o loo lafoai ai le lapisi i Futiga e lafoa’i ai, peitai sa faasea le atunuu ona o le manogi leaga ai o luga o le alatele, ma faia ai loa le fuafuaga a le kamupani e totogi le vaa na te momoliina le lapisi i tai i le sami i le mamao e 5 maila.

O le fuafuaga fou a le StarKist Samoa lea ua faia nei e faamama ai le lapisi ona faatoa lafoa’i atu lea o le suavai i le sami, o se fuafuaga ua faamaonia le lelei ma le mama o le suavai, e pei ona faamaonia e Fanuatele i luma o le komiti.

O se tasi o mafuaaga o loo lagolagoina tele ai le mama o le suavai, atoa ai ma le mulimulitai o le kamupani tulafono a le feterale mo le lafoa’iina atu o lapisi i le sami, soo se taimi lava e faamaonia ai e le feterale ua soli e le kamupani aiaiga o le tulafono, e $50,000 le salatupe i le aso e faasala ai i latou e le feterale.

“O le isi lea mafuaaga e talitonuina ai e le matou Ofisa, o loo mulimulita’i le kamupani i aiaiga o le tulafono, aua e le manao foi le kamupani latou te totogiina le $50,000 i le aso e tasi, mo aso uma lava e faamaonia ai sa latou soliina ai le tulafono,” o le molimau lea a Fanuatele i luma o le komiti.

 Na taua e le taitai komiti ia Faimealelei Anthony Allen le tele o faasea mai lona nuu o Aua, i le manogi leaga o loo sau mai le sami, e mafua mai i le suavai lafoa’i a le kamupani, peitai na saunoa Fanuatele, o se taimi muamua lea ua ia faalogo ai i le faasea lea, e le’i oo atu foi ni faasea mai le atunuu e uiga i lenei mataupu.

I le tulaga o faaletonu i le sami e pei ona taua e le komiti, na saunoa ai Fanuatele e faapea, e le o utuva le fai ma siaki e lona ofisa le suasami ina ia mautinoa, o loo saogalemu mom taelega poo fagotaga foi a le atunuu.