O le aso Faraile ua te’a na sainia ai e le ali’i kovana ia Lolo Matalasi Moliga le pili taufaaofi a le faigamalo, e talosagaina ai suiga i le Tulafono tau Femalagaaiga, ina ia mafai ai ona fa’aleleia pepa nofomau o le to’atele o tagata mai fafo o lo o nonofo fa’asolitulafono i le teritori.

Na taua e Lolo i sana tusi i ta’ita’i o le Fono Faitulafono lona fa’afetaia o afioga i senatoa ma faipule, i lo latou lagolagoina o lenei tulafono taua, lea o le a mafai ai ona fa’aleleia pepa e nonofo ai i le teritori tagata mai fafo, ina ia tusa ma tulafono tau Femalagaaiga a le atunuu.

Saunoa Lolo e fa’apea, e tele masina o taumafai mai le faigamalo e saili se auala lelei ina ia mafai ai ona aumai i lalo o le tulafono tagata mai fafo, e le o ni Nesionale o le Iunaite Setete po o ni sitiseni fo’i.

“O se agaga fa’afetai e tuuina atu i le Fono Faitulafono, i lo latou naunau matou te galulue faatasi i le pasiaina o lenei tulafono, ina ia mafai ai ona tatala atu le avanoa e agavaa ai tagata mai fafo e lesitala ma fa’aleleia tulaga o a latou pepa nofomau”, o se vaega lea o le tusi a Lolo.

Na taua fo’i e Lolo e faapea, o i latou o lo o taua i lenei tulafono, o tagata o lo o i ai lo latou sao mo le atunuu i ni isi auala e pei o latou aiga, ae ua i ai ni isi o fa’aletonu ua mafua ai ona tula’i mai tulaga fa’aletonu i o latou pepa nofomau.

E talitonu le alii kovana, e tatau i le malo ma le atunuu ona tatala atu le avanoa ia i latou nei e fa’aleleia ai a latou pepa nofomau, ina ia mafai ai ona auai i latou i so o se faagaioiga, aemaise ai o le aofia o i latou i faagaioiga fai e aofia ai fesoasoani mai le feterale o lo o sasa’a mai i luga o le faitau aofa’i o le atunuu.

I le tino o le tulafono lea ua fa’amoemoe e taualoa i le taimi e saini ai e le kovana ma pasia a le Fono Faitulafono, o lo o taua ai le aofaiga e to’a 4,119 mai atunuu eseese e 24 o le lalolagi o lo o nonofo fa’asolitulafono a latou tagatanuu i Amerika Samoa.

O i latou ua mae’a ona lesitala o latou suafa i lalo o le tulafono lea na afua mai i le polokalame o le ‘Amnesty Program’ a le ali’i kovana, e le gata o i latou ua leva ona mae’a le aoga o pemita na ulufale mai ai i le teritori, ae o lo o aofia ai fo’i ma i latou ua mae’a ona totogi a latou talosaga i luma o le Komiti Fa’afoe o Femalagaiga mo le talosagaina o ni pepa nofomau, ae lei valaauina lava o latou suafa.

O le tulafono tau Femalagaaiga mo tagata mai fafo o lo o i ai, e na o le to’a 250 le aofa’i o tagata mai Samoa e fa’ataga ona talia e faia a latou pepa nofomau i totonu o le tausaga fa’aletupe, ma le to’a 100 e maua mai i isi atunuu eseese.