Ads by Google Ads by Google

PUALELE FAUNDATION - MAPUITIGA I “SE PESE MALU”

Ua i ai se gaoioiga lelei, ua mapuitiga i ai le to’atele o e gasegase i le Dialysis i le LBJ Medical Center i ona nofoaga e lua ua i ai nei, “O se pese Malu, e fa’ato’afilemu ai tiga, a’o faia togafitiga,” ma ua saunia lelei lea e le tina o Moana Hatcher mai Vaitogi.

O lenei tina, ua mae’a fa’atulaga e le Pualele Foundation, o se tasi o Fa’alapotopotoga Faufautua Fa’apitoa mo e Gasegase, ua amata ona logoitino mafatiaga o le tino ma ua avea ma ala o fa’anoanoaga loloto ia te’i latou ma ua mamafa ai nei omiga i le mafaufau.

Ina ua fesiligia nisi o gasegase sa usu pese ma le fiafia, “O lelei lea tautua mo oe tina?” Tali o ia, “E te iloa, e ui lava ina tiga le tui ma niniva ai fo’i, ae le o se mea fa’avaivai loto le fiafia e pese ma toe manatua mai mea na tutupu o talavou, ae o pese nei sa fa’asolo ai mafaufau i le toea’ina faigata ua sola ae tu’u a’u ma tamaiti, ua atoa nei le 15 tausaga.”

E te fa’alogoina le fiafia e usu le pese, e manatua uma fuaiupu o pese tuai lava o le vaitaimi o Eva ma Atamu, ae o fati o nei pese, e malu i lau fa’alogo, aua e le so’ona fe’ei ae malu fatuga i lau fa’alogo!

O le isi toea’ina sa nofonofo lava lona nofoa fa’ata’avale e fa’atali le avanoa o le masini, na amata pesega o tilotilo mai e foliga e matamuli, ae na o’o loa le pese a Moana i le “Falefitu e, Falealili ma Aleipata, fa’apea ma le atu Safata” matala ma ona fofoga ae pese ma le fiafia.

Ona iloa ai lea, e tatalia lelei e le gasegase le pese ua logomalie i lona loto, ona pese ai lea ma le fiafia e galo ai tiga, e mapu i ai i le vaivai ma lagona ua le toe tele se aoga o totoe e soifua ai!

O lagona na, e taumafai le Pualele Foundation e latou te sofa’i i lalo, ae tu’u se isi fa’amoemoe maualuga i le tagata ua tino matua, ma ua lutia le soifua i gasegase pa’ivale o le olaga nei.

Mautu le fa’amoemoe, “O le tino ua na’o sou mafaufau lava e te le ma’i, oso mai uma vaifofo o lou tino fa’anatura sofa’i gasegase, ae fa’atupula’ia le malosi i lou loto malosi atu ai ma le tino!”

Ua mae’a atofaina se avanoa o le Maota mo le Ofisa Autu o le ASCADSV i Tolu Street i le Paka Liona mo galuega tima’i, tautua le fa’atuaoia a le Pualele Foundation - o se fa’alapotopotoga e Tuma’oti, e le mo se tupe fa’asili fo’i, ae ua aoga tele a latou galuega fa’atino, ina ia faufautua ai le mamalu lautele i ana polokalama fa’afaletui e tolu ua saunia lelei ai togafitiga, ae maise lava mo tagata matutua.

E ui fo’i ina faigata gasegase tau le mafaufau, ae ia tatou iloa lelei, ona ua vaivai le mafaufau e fa’avasega le tele o omiga, ua afua ai ona mamulu ese le lagona gafatia e lea tagata ona sofa’i fa’afitauli ua fetuleni mai ia te ia i le taimi e tasi.

O le so’ona fa’ao’olima fo’i i le fanau, pe fasia le tina o le aiga i lona lotoifale, o se tasi lea o fa’ailo, ua uma le onosa’i o le tama o le aiga, po’o le tina fo’i, ona ua tele na’ua puapuaga fa’alemafaufau ua omia ai ona lagona fa’aletagata.

O vaifofo ua ofoina mai e le Pualele, e toe molita’i ai le malosi o le mafaufau, e toe faia fa’ai’uga tatau, ae le o le fa’ao’olima le tali. Ua i ai a latou asiasiga e faia i tagata matutua, aua o i latou ia ua pei ua tau le amana’ia o latou lagona, o lo’o taua pea o ia i mea e fai a o latou lotoifale, ua na’o se tasi e tausi fa’apitoa e aiga, ia umi le mafutaga.

Ua i ai fo’i latou togala’au mo vai Samoa o lo’o latou fa’amalosia, e fa’agaoioi ai tino o tagata matutua, ma toe fa’aosofia le fiafia e va’ai i ona la’au ua tutupu ma lauolaola, e atagia ai le alofa fa’aola o le Atua. O nisi o latou ti’eti’ega e faia ma pepese, e fa’aoso fiafia i loto o matua!

O nisi sa tele o latou aoga i o latou aiga, e vave ona lamatia i lagona fa’apea, ona ua foliga mai ua le toe amana’ia o ia ma ana fa’ai’uga fai e lona aiga. O faufautuaga lelei, e fa’aosofia ai le toe fia ola pea i le li’o o lona aiga, ma o lo’o taua pea o ia i fuafuaga fai a lona aiga.

O le numera telefoni mo se feso’ota’iga ma le tina o Lina Prendergast o le Pualele o le 733-0094. O le latou Ofisa ua i ai nei fa’atasi ma le ASCADSV i le Paka Liona, ma e fia fesoasoani tele mo so’o se tasi e i ai le mana’omia mo se fautuaga e fa’amama avega i mafatiaga!