O se taimi muamua i le teritori ua fa’atautaia ai ni ta’aloga pasiketipolo, po’o le basketball, i ‘au ta’ito’atolu i le aso To’ona’i na te’a nei i le malae pasiketipolo i Faga’alu, ma na mata’ina fo’i lea faigafou, na fa’atautaia e le Asosi Pasiketipolo a Amerika Samoa - ASBA.

Ona ua va’aia lava le talenia o fanau talavou i lea fa’agatama, sa faia ai ta’aloga a ali’i faapea fo’i ma tama’ita’i i lea lava aso.

O le auga o lea liki pasiketipolo ta’ito’atolu i le aso e tasi, ia matua iloga ona taumafai fanau e fa’atele taimi e fa’amalositino ai e ala i ta’aloga ina ia tausia ai le tino maloloina lelei.

“O le ta’amilosaga...e sefulu ma le lua ‘au na auai e tauva, ma sa fa’atulaga lava ina ia fa’amasani atili fanau e fa’amalositino i ta’aloga ua agava’a ma fiafia i ai i latou, ae fa’aleleia atili fo’i ma latou tomai i fa’agatama e mafai ona tauva ai i latou. Peitai, o se mea uiga ese ua va’aia, e matua aoga lava lea taumafaiga i le aso,” o se tala lea a le ali’i o Diehl Langkilde, sui o le ASBA.

Fa’afetaia e Langkilde  le to’atele o ‘au na mafai ona lesitala ma tauva i lenei fa’agatama, ae maise lava fo’i o le sapai a matua ma aiga.

Ua fa’ailoa mai, o le a toe fa’atautaia le liki fa’apitoa i le masina fou, ina ia mafai ona masi’i atu se tatou ‘au pasiketipolo malosi mo Ta’aloga a le Pasefika lea e tauaofia i Papua Niu Kini i le tausaga 2015.

E le gata i lea, o le ta’amilosaga e lua aso e fa’atino ai mo ta’aloga, e fa’ailoga ai le tatou vaiaso o le Moso’oi i lenei tausaga, o le a alo atu fo’i i ai le asosi. O lona uiga e amatalia le liki o le Moso’oi ia Oketopa 15, 2014, e tatau ona va’ai sau ‘au e fa’aulu mai.

Ua fa’ailoa mai e va’ai fo’i le ala o tusitusiga a le facebook: asba Tututila mo nisi fa’afesili e tusa o nei ta’amilosaga basketball, ae maise fo’i le totogi o le ulufale o lau ‘au mo lea fa’amoemoe e tasi.

O ‘au nei na fa’amanuiaina latou taumafaiga i le ta’amilosaga na te’a nei:

I le Itupa o Ali’i o le “Primetime” na manumalo i le ta’amilosaga atoa ma o le ulua’i siamupini o lea ta’amilosaga ae tulaga lua ai le “Breakers” i lenei taumafaiga.

I le itupa o tama’ita’i na manumalo ai le “Blue Girls” i le Under 19, ae o le “Gold Runners” na tulaga lua i lea lava vaega.

O le sui na taua’ao i ai le fa’ailoga fa’apitoa mo le sui ta’alo lelei i le itupa o ali’i o le susuga lea ia Ryan Samuelu mai le Primetime. A’o le sui na agava’a mo lea lava fa’ailoga mo tama’ita’i talavou o Rakipa Naea.