E ova i le 1,000 tusi talosaga mai fanau aoga mo ni avanoa e galulue ai i le ‘Summer Program’ ua taunuu i luga o le Ofisa o le alii Kovana Sili, ae na o le 100 avanoa faigaluega o lo o mafai e le malo ona faatupe mo fanau aoga i le vaituuaga lenei o aoga.

O le tulai mai ai o lea tulaga i fanau aoga, na talosagaina ai loa e le afioga i le kovana sili ia Lolo Matalasi Moliga ia Faatonusili o Matagaluega uma ma Ofisa o le malo e aofia ai ma Ofisa tumaoti, ina ia saili ni auala e maua mai ai e fanau aoga avanoa e galulue ai i le taimi o le polokalame, ma saili ma ni vaega tupe e totogi ai i latou.

O lo o tuuina faatasi atu le talosaga ma le fautuaga a le kovana i faatonusili, afai e tofu le matagaluega ma avanoa faigaluega ta’i 2 e oo atu i le 5 e maua e galulue ai nai fanau nei, o se tulaga lelei lea mo tupulaga talavou a le atunuu.

I lana lu’i i faatonusili sa ia taua ai e faapea, “E na o le $600 le tupe e totogi ai le tamaititi aoga e toatasi i le polokalame lenei, lona uiga afai e mafai ona e faa faigaluegaina tamaiti e toa 5, e tutusa lava lena ma le alu o lau malaga i D.C (Washington, D.C) ma fa’aalu ai lena vaega tupe tele, ae o lea ua alu aoga e totogi ai nai fanao aoga nei.”

Ae mo Faalapotopotoga tumaoti e pei o le Fale Telefoni (ASTCA) ma le Faalapotopotoga o le Eletise ma le Suavai (ASPA), na faailoa i ai e Lolo e faapea, afai latou te mauaina ni avanoa faigaluega ta’i sefulu pe sili atu fo’i e galulue ai fanau aoga, ua lava lea ma totoe mo nai fanau aoga.

“O le agaga autu o lenei faamoemoe, ia tuu le avanoa i tupulaga talavou a le atunuu latou te aoaoina ai le taua o le avea ma tagata faigaluega, aemaise ai ia mafai ona latou aoaoina metotia ma mea fou mai matagaluega taitasi, e tapena ai mo le taimi e avea ai latou ma tagata faigaluega i le lumana’i,” o le saunoaga lea a Lolo.

E ese mai i le aoaoina e fanau o le isi malamalama fou mai galuega a le malo, o le isi itu taua o le maua e fanau aoga o avanoa e galulue ai, o le a mafai ai ona maua se vaega tupe e fesoasoani ai i le faatauina o a latou meaaoga mo le isi tausaga aoga fou, poo le faaaoga foi lea e faatau ai ni ta’umafa mo latou aiga.

“Ia outou silafia lelei, o le toatele o fanau aoga nei e o mai i aiga e vaivai le tamaoaiga, poo le matua leai foi o se tamaoaiga o lo o i ai, ae o le avanoa lelei lea e maua ai sina fesoasoani mo i latou ma o latou aiga,” o le fautuaga alofa lea a Lolo.

Mo le faatupeina la o isi avanoa e le o mafai e le malo ona faatupeina i lana paketi ua maea ona faatulaga, ua talosagaina ai e le alii kovana faatonusili ina ia saili ma faaavanoa ni vaega tupe mai totonu o a latou paketi e totogi ai fanau aoga nei.

Na taua e Lolo e faapea, o lo o i ai le faamoemoe o avanoa e 100 o lo o mafai ona faatupe e le malo, o lo o fuafua e tuu atu i pisinisi tua, ae tatala le avanoa i matagaluega ma ofisa latou te faa faigaluegaina ai isi tamaiti e le o mafai ona faatupe i lalo o le polokalame.

Na taua e le alii kovana lona faatonuina o lona ofisa ina ia saili ni avanoa se lima e faa faigaluega ai ni isi o le fanau o le a agai atu i le polokalame.

Na fesili le Faatonusili o le Ofisa e Puipuia Aia Tatau o i latou e i ai manaoga faapitoa o le tino, afioga Matautu Dr. Peter Tinitali i le alii kovana, pe faapefea Ofisa o lo o faatupe mai i alagatupe mai le feterale a latou galuega, pe faapefea ona latou sailia ni vaega tupe e totogi ai fanau aoga nei, na tali le Lemanu e faapea, “O le mafuaaga lena na tofia ai oe e avea ma faatonusili.”

Na faaalia e ni isi o matua o lo o aofia ai a latou fanau i tusi talosaga ua maea ona tuuina atu i le malo, lo latou faafetaia o le alii kovana ona o le naunau e saili mea lelei mo tupulaga talavou.

“I tausaga ua mavae e le’i i ai lava se isi o le ma fanau sa talosaga mo ni avanoa na faa faigaluega e le malo, ou te le iloa pe aisea lona mafuaaga, ae ou te faamoemoe o le polokalame o lenei tausaga o le a maua ai se avanoa o si a’u fanau e toalua o lo o i ai i le vasega 12 e galulue ai i le polokalame,” o lagona fiafia ia o le susuga a Adam Ifopo mai Tafuna ina ua feiloa’i ma le Samoa News.

O le masina o Iuni o le tausaga nei lea ua faatulaga e amata ai le polokalame lea mo fanau aoga.