Ads by Google Ads by Google

OUTE LE’I SUSUNUINA LE PUSA LAVALAVA A LO'U TOALUA

O le alii lea na tuuaia e le malo i lona susunuinaina lea o le pusa lavalava a lona toalua i le vaiaso na te’a nei, ma mafua ai ona aafia le soifua maloloina o aiga tuai i le asu mai le tafuna’i sa ia susunuina, sa ia faailoa i le faamasinoga maualuga i le taeao ananafi lona matua teena o lea tuuaiga mai le malo.

O se vevesi na tulai mai i le va o le alii lea ma lona toalua na mafua ai loa ona tulai mai lea faalavelave, e pei ona taua i faamaumauga a le faamasinoga.

Na faamatala e le afafine a le alii lea i leoleo e faapea, na ita lona tama ina ua faailoa atu i ai e lona tina, o le a alu e nonofo ma lona tina i Pavaiai ona o le le manao i le vevesi soo o le la aiga.

Na avea lea ma itu na le fiafia ai le uso lea, ma alu ai loa ua inupia i le afiafi lea, ma toe foi atu ai loa i le fale, sii i fafo le pusa lavalava a lona tina, tutu i ai le afi ma susunu loa.

Na salalau solo le asu manogi leaga i nisi o aiga tuai, ma valaau ai loa e nisi o aiga le ofisa o leoleo mo se fesoasoani, ma agai atu ai loa leoleo ma latou taumafai e tape le afi e ala i le asu i ai o pakeke vai.

O le vaiaso nei na faatoa faila ai e le malo le moliaga mamafa faasaga i le alii lea, i lona tapuina lea o se tafuna’i ma aafia ai le soifua maloloina o isi tagata i le asu.

Toeititi atoa le lua vaiaso o taofia le alii lea i le toese, ma tatala ai loa i tua i le aso Tofi na tea nei, ina ua mafai ona ia totogiina le $250 sa faatulaga e le faamasinoga e tatala ai o ia i tua, i lalo o poloaiga mai le faamasinoga.

O nisi o poloaiga ua fautuaina e le faamasinoga le ua molia e usitai i ai e aofia ai le faasa lea  ona ia toe tagofia le ava malosi i soo se taimi, pe na te toe soliina foi se tulafono a le malo.

Ua poloaina o ia ina ia aua nei ona tuua le atunuu, pe taumafai foi e sola faamalosi ese, ae ia tuuina atu ana pepa malaga e taofi e le malo sei maea taualumaga o lana mataupu ona faatoa mafai lea ona toe tuuina atu ia te ia.

O le aso 23 Ianuari 2012 lea ua faatulaga e faia ai le uluai iloiloga o lenei mataupu i luma o le alii faamasino sili lagolago ia Lyle L. Richmond, ma ua i ai le faamoemoe afai e oo atu i le aso lea e lei i ai se maliliega ua maua i lenei mataupu, ona faatulaga loa lea o le aso e faataunuu ai le faamasinoga autu.