Ads by Google Ads by Google

Ofisa Fou EPA- Fa’asao le Enetia

Ina ua tatala aloaia le Fale fou fogafalelua o le ofisa autu lea o le Amerika Samoa Environmental Protection Agency (ASEPA) i le aso Gafua, na tele fa’amatalaga i lona fausaga o le talutalufou, ina ia fa’asaoina le so’ona fa’aaoga o le eletise mo ona moli, ea malulu, ma ua fa’aaogaina ai le panele e aoina ai ave o le La e gaosia ai lona eletise fa’aaoga, e matua leai se pili eletise e toe fa’aaogaina e i latou mai le ASPA.

O se mua’i taumafaiga fou lea ua tula’i mai, ma ua fa’aigoaina ai lea Maota o le “LEED Platinum Certified”. O se ulua’i fale lea ua fausia i le Pasefika i ona nei tu’utu’uga, ma ua o mai fo’i sui o le South Pacific Regional Environmental Program (SPREP), ina ia maimoaina le galuega, aua ua fuafua i latou e mua’i fausia lava le Maota fa’apea i Apia, lea e fa’amautu mai i ai le latou ofisa autu ina ua o ese mai le malo o Fiti.

E tusa ai ma le fa’amatalaga a le sui o le SPREP sa auai mai i le tatalaina o le ofisa o le ASEPA, sa ia fa’ailoa ai, “O le ulua’i maota lenei ua fausia fa’apea, ma o se fa’ata’ita’iga lelei lea mo le lumana’i i ituaiga fausaga e ao ina matele o tatou malo e fa’amalosia mo le fausaga o fale nofo o aiga, ae ia muamua ona fausia ai maota o matagaluega ta’itasi o le Malo, ia matua salalau ai le tala, o maota nei e mafai ona silia ma le 50% o au tupe e fa’aalu i tau o le eletise ma le suavai mo lou aiga atoa i le masina e tasi.”

I le polokalama na fa’atautaia ai le tatalaga o lea fale, sa tofusia ai sui mai le USEPA, SPREP ma Kovana Togiola Tulafono ma le avanoa e saunoa ai e tusa o le galuega. “O le galuega lenei e tolu ona vaega ma’oti o aofia ai:

i/ taumafaiga a Amerika Samoa e fausia se Si’omaga mo le soifua maloloina o ona tagata i le taimi nei ma a taeao.

ii/ o le fa’amau fa’ailoga fo’i i le taotoga o le atamai ma sailiga o auala e fa’asao ai le Siomaga o le atunu’u i le taimi nei ma fa’asolo atu ai i le lumana’i, ia gafatia ona tausia lelei ai ona tagata.

iii/ Fa’ailo o se ta’ita’iga lelei ma le atamai ua i ai nei le malo e tusa ai ma tima’iga ma galuega e fa’asao ai le Si’omaga, fa’asao le Enetia ma ia maua ala eseese e maua ai le malosi’aga fa’aeletise i le toe fa’aaoga o oloa ua mae’a fa’aaogaina.”

I lana folasaga lea, ua fa’ailoa mai ai, sa auai le afioga i le Kovana Sili i le fa’ataotoga, afuafua ma le fa’ataunu’uina o lea fuafuaga ia fausia lenei Maota e fa’ailo ai mea nei e tolu ua ia fa’amamafa mai.

“Ia tatou manatua, e le’i tu’uina e le Atua Atamu i le fa’ato’aga e na’o na ‘aina fua o le lau’ele’ele, ae sa ia tu’uina i ai, e galue ina ia fua atili mai le fa’ato’aga e ‘aina e ia ma lona aiga!”

Pe afai tatou te matamata i lenei galuega ua mae’a, ia tatou manatua lea fo’i mau, “Fa’asao le Enetia ia toe fa’aaoga, ma ia le fa’amoemoe i le malosi’aga fa’aeletise e afua mai le suau’u lea ua utiuti ma ua taugata tele i lenei vaitaimi, ae ua tatou fa’aaoga sa’o ai le malosi’aga o le La, ua tatou maua e aunoa ma se totogi. Fa’asao fo’i le suavai ma ona alavai tatafe ia le tafea ai ma le palapala e aga’i atu i le sami ma fa’aleagaina ai tatou a’au ma le ‘amu o le gataifale.”

Ua fautuaina fo’i e le Kovana sili, le vasega o faipule, o ta’ita’i o lenei vaitau ma le lumana’i, ia fa’aauau lenei manulauti aoga tele, ia mafai e Amerika Samoa ona sapaia ola o ona tagata i o tatou laufanua.

Sa ia fa’ailoa mai, “Ua matele i tatou uma i lo tatou fiafia e talisapaia mea lelei ua tatou ola ai i o tatou taimi, ae o le fesili, e mafai ona fa’aauau nei manuia i tupulaga o lo’o fa’asolo mai o le atunu’u, pe tatau ona faia loa e tatou nei tapenaga aoga, mo i latou e le’i soifua mai o le tatou malo!”

O sui e to’atolu sa tele i ai le fa’afetai a le Fa’atonu o le ASEPA, Fanuatele Dr To’afa Vaiaga’e, o le sui mai le USEPA, ma o le pasifale fo’i lea sa galulue fa’atasi ma i latou i lea lava galuega e o’o mai i lona fa’ai’uga, Michael Wolfram. Peita’i o le fausaga o lea fale ma le inisinia o fale tetele fa’apenei sa i ai lava i lona fausaga atoa, Brian Rippy, sa ia ta’ita’ia fo’i le asiasiga mamalu i le taualuga o le fale o totoina ai le mutia lanu meamata, ma le nofoaga o panele mo le miti’ia o ave o le La mo le gaosia o le eletise fa’aaoga mo le maota atoa.

Ua tele tala i manu, ae itiiti i mala i lea fo’i fa’atasiga, ma o se tasi lea o ta’iala ua lalamua ai fo’i le igoa o si tatou malo i le tatou atuvasa, aua ua tutula’i se pine fa’amau, “O le fale ua fausia ia amana’ia le tulaga o le Si’omaga Mama ma le lelei mo le sapaia o le soifua maloloina o ona tagata, ia toe fa’aaoga mea ua i ai i lou si’omaga, aua le maumau!”

O le ‘aiga fiafia na talimalo ai le EPA ina ua mae’a o’otia le Lipine o le Maota e le Fa’atina o le atunu’u, Maryann Tulafono, ma tatala aloaia faitoto’a mo le maimoaga i ona fogafale e lua, ma lona taualuga lanumeamata! O le tau o le fale atoa e  $4.9 miliona.