Na taua e le Sui Peresetene o le Senate i le taeao ananafi, lona popole tele i le tulafono e lesitala ai igoa o tagata e ta’usala i le faia o amioga mataga fa’asaga i fanau laiti, ina nei avea le pasia o lea tulafono ma itu e to’atele ai tagata e pule i o latou ola, ona o le soona fa’alauiloa fua o fa’amatalaga e fa’atatau ia te i latou.

Ae na taua e le Peresetene o le Senate ia Gaoetote Tofau Palaie e fa’apea, o le pule o se tagata ua lesitala i lalo o le tulafono lenei i lona ola, “ua ia faia se galuega lelei e taofia ai le nonofo popole o matua i le saogalemu o a latou fanau”.

O le faitauga fa’alua o le tulafono lenei na saunoa ai ni isi o senatoa e fa’aleo a latou finagalo e fa’atatau i le tulafono.

Na fa’aalia e le afioga a Nuanuaolefeagaiga S. Nua lona “matua le lagolagoina” o lenei tulafono, ona o popolega e pei ona ia taua, e ui e taua le agaga o le tulafono ina ia puipuia ai le saogalemu o fanau.

Sa ia taua e fa’apea, o le tulafono lenei, sa faia lava e fa’atatau mo Amerika, ae le aoga mo Amerika Samoa, e le gata o lo o i ai lava le tulafono e puipuia ai le saogalemu o fanau e pei o le lesitalaina o igoa o i latou ua nofosala, ae o Samoa fo’i e malosi ai tele le aganuu ma le agaifanua, atoa ai ma le fetausia’i o aiga.

“Afai nei e tusi mai le igoa o se tagata o se aiga taualoa po o se aiga iloga fo’i i le atunuu i le lisi lea o le a fa’alauiloa i le atunu’u, o le a fa’asi’ugutua ma fa’asi’usi’umata tagata o le nuu i lena aiga ma foliga mai ua inosia le aiga e tagata uma, pau le mea e tupu o le pule loa o le tagata o le aiga i lona ola”, o le saunoaga lea a Nua na tali e ai afioga i senatoa.

Ae na atili ai ona leo tele le ali’i senatoa ma ia toe saunoa e fa’apea, “lona uiga o le mea moni e tupu, afai nei e pasia le tulafono lenei, o le a to’atele tagata e ta sisi latou ua, ona ua ova le matamuli i le ta’uvalea o le aiga.”

O le aoga o le tulafono lenei i Amerika e pei ona saunoa le alii senatoa, aua fo’i e le iloa e le isi palagi le isi palagi, ae o Samoa, toeititi masani tagata uma, toeititi fo’i aiga tagata uma.

E ui na taua e le afioga i le alii senatoa ia Mauga Tasi Asuega le moni o le saunoaga a le sui peresetene, peitai sa ia taua e fa’apea, o upu a Samoa, “e leai se aoga o le mamalu pe afai e leai se filemu”.

Na taua e Mauga e fa’apea, tusa lava po o a mamalu o aiga Samoa ae afai e le saogalemu ma ola filemu ai le atunuu ma fanau, e leai se taua o lea tulaga i lona manatu.

Saunoa fo’i Mauga e fa’apea, ua leva tele ona ia fa’atali i le tulafono lenei ina ia fa’aulu i luma o le Fono ma fa’a pasia, ona o le naunau ia mafai ona puipuia le saogalemu o tagata aemaise ai fanau a le atunuu.

I lona talitonuga, o ituaiga solitulafono ia e aafia ai fanau teine laiti, e mafua mai lava i totonu o aiga o lo o nonofo ai i latou nei, po o ni isi foi o latou aiga e vava lalata a latou faia latou te toe faia uiga mataga nei ia te i latou.

Na fa’aiu le saunoga a Mauga i lona talosagaina o afioga i senatoa, ina ia latou palota e pasia le tulafono, ona o se tulafono taua ma aoga.

Na tula’i le afioga i le alii senatoa ia Saole Mila ma saunoa e fa’apea, e leai se mea e aafia ai fua le tagata i le lisi o tagata ua tausala i le faia o amioga mataga, pe afai e nofonofo lava na te le faia se solitulafono.

“Afai ou te iloa o a’u o se tamali’i e taualoa fo’i lo’u aiga i totonu o le nuu ma le itumalo, e le tatau ona ou faia fua nei uiga mataga ma le sau ai fua o lo’u igoa i le lisi a le malo”, o le saunoaga lea a Saole, sa avea ma muamua ma faamasino lagolago

Ae na toe faamanino atili e Gaoteote i luma o le maota e faapea, o le taua o le tulafono lenei, “o se auala lea e faamanatu ma faailoa atu ai ia te oe le tagata lea ete lua tuaoi”.

“E te moe i le po ae ua e iloa lelei lava, o le tagata lea e te lua tuaoi e le o se tagata lelei, e aoga fo’i la e te moe ala ala ai, atonu fo’i e nofo sauniuni ai i se mea e ono tula’i mai”, o le isi lea saunaoga a Gaoteote.

“E mafua fo’i ona popole le tagata i le tulafono lenei, ina ne’i lavea atu ai ma lona igoa i le lisi, ae a fai lava e te ola mama ma ola fiafia e leai se mea o le a e lavea ai fua i le lisi”, o le saunoaga lea a Gaoteote na tali e ai afioga i senatoa.

Ae na taua e Magalei Logovi’i e fa’apea, pau lona popolega, ina nei avea le faalauiloa o faamatalaga e faatatau i le tagata ua nofosala ma itu e tutupu mai ai nisi faalavelave, e pei o le alu o le tama o le tamaitai na aafia po o se tasi o le aiga ma fai se isi gaioiga i le tagata ua nofosala.

E ui i finagalo eseese o alii senatoa, ae na fulisia lava le maota e pasia le tulafono i le faitauga fa’alua ananafi, ma ua sauni nei mo le tuuina atu o le tulafono i lona faitauga fa’atolu.

I luma o le maota o sui, na pasia ai fo’i le tulafono lenei i lona faitauga fa’alua.