LE FIAFIA FA’AMASINOGA PE A LE USITAIA ANA FA’ATONUGA

A o fa’agasolo mai ai pea i vaiaso ta’itasi le toe taofia o i latou o lo o fa’anofovaavaaia i le toese i Tafuna, ona o tu’uaiga i lo latou le usitaia lea o poloaiga sa tu’uina atu i ai e le fa’amasinoga, na saunoa ai le afioga i le fa’amasino sili ia Michael Kruse i le vaiaso na te’a nei e fa’apea, e tasi lava le mafua’aga e ilitata ai le fa’amasinoga, o le le usitaia lea e i latou o lo o fa’anofovaavaaia o ana fa’atonuga.

Ae na taua e le afioga i le ali’i fa’amasino sili lagolago ia Lyle L. Richmond i le vaiaso fo’i na te’a nei e fa’apea, tusa lava pe fa’atamala le tagata nofovaavaaia i lona usitaia lea o tuutuuga faigofie o a latou nofovaavaaia, e pei o le alu e vaai le Ofisa Faanofovaavaaia fa’atasi i le masina, po o le le fa’amaoni foi i le totogiina o le salatupe, “e mafai lava e vaega laiti ia ona afaina ai le nofovaavaaia, ma i’u ina toe taofia ai loa i le toese se tasi mo se taimi umi.”

O le vaiaso na te’a nei, e to’atolu i latou sa fa’anofovaavaaia e le fa’amasinoga talu mai le tausaga e 2014 na toe tutula’i i luma o le fa’amasinoga, ona o tu’uaiga i lo latou le usitaia lea o ni isi o poloaiga sa tu’uina atu ia te i latou.

O i latou nei e aofia ai Luki Tunu Jr, Freddie Faaoso Viliamu ma Tanu Fili. I le mae’a ai o a latou iloiloga i le vaiaso nei, ua toe tolopo ai loa a latou iloiloga e toe fofogaina i le isi lua vaiaso.

Na fa’ailoa e Kruse i ni isi o i latou nei e fa’apea, e mafua ona faanofovaavaaia e le fa’amasinoga se tagata solitulafono, e naunau le fa’amasinoga e fia vaai po ua aoaoina e lea tagata se lesona taua mai lana solitulafono sa faia, ma, afai e le usitaia e le tagata nofovaavaaia poloaiga a le fa’amasinoga maualuga e tu’uina atu, ua lava lea e momoli atu ai le feau e le o manatu mamafa o ia i le fa’amasinoga, na te le o a’oa’oina fo’i se lesona taua, ma o le iuga o lea tagata o le toe toso i le falepuipui.

PENETEKOSO MALIGI

O le vaiaso lenei ua fa’atulaga e fofogaina ai i luma o le fa’amasinoga maualuga se maliliega ua mae’a ona sainia e le malo ma le ali’i o Penetekoso Maligi, ma le fa’amoemoe e fa’amuta ai loa taualumaga o lenei mataupu.

O le tulaga pisi i galuega a le afioga i le ali’i fa’amasino ia Elvis P. Patea i le vaiaso na te’a nei, na mafua ai ona tolopo fa’alua le iloiloga a Maligi.

O le ali’i o Maligi, lea o lo o taofia pea i le toese i Tafuna i le taimi nei, o lo o tu’uaia i le moliaga mamafa o le ave ta’avale a o se’i lona laisene, ma e tusa ai o fautuaga a loia, ua sauni le ua molia e tali ioe i le moliaga e pei ona tu’uaia ai o ia.

O le moliaga fa’asaga ia Maligi na alia’e mai i le amataga o le tausaga nei, ina ua maua e leoleo o ia o lo o ia fa’afoeina se ta’avale ae o lo o se’i lona laisene, e mafua mai ina ua ta’usala o ia e le fa’amasinoga fa’aitumalo i le tausaga na te’a nei i le moliaga o le ave ta’avale ‘ona.

O se tasi o tuutuuga o le nofovaavaaia a Maligi ina ua ta’usala o ia i le moliaga o le ave ta’avale ‘ona, o le fa’asa lea ona ia toe fa’afoeina se ta’avale i le taimi atoa o lo o se’i ai lona laisene.

O le moliaga o le ave ta’avale a o se’i le laisene, e mafai ona fa’asala ai se tasi i le toese mo le umi e le silia i le 5 tausaga, pe faasala foi i le salatupe e le silia i le $5,000, ae fa’amalosia ai le tuliina o aso e 90 i totonu o le toese i Tafuna.