E oo mai lava i le taimi nei o lo o nonofo fa’atali pea le to’atele o le au faila lafoga ua mae’a ona faila a latou lafoga, i le taimi e fa’afofoga ai i se tala fiafia, o le a maua siaki mo a latou lafoga.

E tusa ai ma fa’amatalaga ua maua mai e le Samoa News i le to’atele o le mamalu o le atunu’u o lo o telefoni ma tu’u fesili mai i le ofisa, e le i maua lava siaki o lafoga a i latou sa faila a latou lafoga i le amataga o le tausaga nei.

Na taua e ni isi o i latou i le Samoa News e fa’apea, e fa’apenei i le tausaga ua mavae ua leva na maua a latou siaki mo lafoga.

Na taumafai le Samoa News e fesiligia le Ofisa o Lafoga i le aso Faraile na te’a nei, e tusa ai o le fa’amaninoina o lenei mataupu, ma taua ai e se sui Sinia o le Ofisa o Lafoga e fa’apea, e le o matua manino mai i le taimi nei se aso tonu e maua ai ulua’i siaki mo lafoga i lenei tausaga.

Na taua e le sui Sinia lea o le Ofisa o Lafoga e fa’apea, o le tele lava o tausaga e masani ona maua ulua’i siaki o lafoga i le fa’aiuga o Ianuari po o le amataga fo’i o Fepuari.

Na taua e se tama’ita’i tali telefoni i le Ofisa o Lafoga ina ua feso’ota’i atu i ai le Samoa News, o le to’atele o le atunu’u o lo o vilivili atu ma fia iloa le aso e maua ai siaki o lafoga, o lo o ia fa’amalie i ai, e le o mautinoa po o fea tonu se taimi e maua ai siaki o lafoga.

E tiga lava ona fa’ailoa i le atunu’u e le o mautinoa se taimi tonu e maua ai siaki o lafoga, ae sa molimauina lava e le Samoa News i le vaiaso na te’a nei fa’apea ai ma le aso ananafi, le tumu tumu o ni isi o le mamalu o le atunu’u i le vaega e masani ona tufa tufa ai siaki o lafoga, ma le manatu atonu e fa’afuase’i ona maua ni siaki i se taimi vave.

Na taua e le tina o Elenoa Pedro e fa’apea, “tusa lava pe fai mai le ofisa o Lafoga e le maua ni siaki, ou te le fa’avaivai ai lava e fai ma siaki mai le vaega e tufa tufa ai siaki, e le iloa lava le fiki o le laki i se taimi fa’afuase’i”.

E le na o le faletua ia Elenoa sa maua atu i ai e le Samoa News i le taeao ananafi, ae pe tusa ma le to’a 14 isi tagata sa nofo nofo ai i luga o nofoa ma fa’atalitali le taimi latou te maua ai se tala fiafia mo siaki o lafoga.

O ni isi o i latou na fa’aali mai uiga le fiafia, ina ua taumafai atu le Samoa News e fesiligia i latou i ni o latou finagalo e tusa ai o le latou nofo nofo ai e fa’atalitali siaki o lafoga, e ui ua mae’a ona fa’ailoa atu e le ofisa o Lafoga e le maua ni siaki.

“E leai se mea e ke sau ai fua e fesili mai ia makou ma ka pu’e makou aka, o lea lava makou ke gogofo e fa’akali kali a makou siaki, o kupe sa makou afu ai, ae leai se mea e fa’ailoa ai fua i le lalolagi makou mea o lo o fai”, o le saunoaga lea a le isi ali’i i le Samoa News.

O le tele o tausaga pe a maua siaki o lafoga a le to’atele o le atunu’u, e masani ona fa’aaoga e tali ai manaoga i totonu o aiga.