“O le taimi ma le mea e tupu ai i lalo o le lagi i mea uma, o le taimi e fanau mai ai ma le taimi e oti ai, o le taimi e fiafia ai ma le taimi e fa’anoanoa ai, o le taimi e ata ata ai ma le taimi e tagi ai...”

O se toe fa’atepa lea a le Tusi Pa’ia i le tagata soifua na si’itia mai e le tina o Maraia Nautu Malae ma le fanau i le polokalama fa’apitoa na saunia mo toe sauniga o le tama pele o le aiga, Sigafili Malae Le’iato.

Ua agatonu ai fo’i ma le loto fa’avauvau o i latou, aua ua misia le mafutaga mafana i le alofa ma le fa’amaoni. Sa amata mai le mafutaga mafana i le taimi na a’oga ai Sigafili i Fiti, a’o avatua e le Matagaluega o le Soifua Maloloina e a’o’oga i ala e tineia ai nisi o fa’ama’i, ma tau maua mai ni tima’iga e fa’aleleia atili ai galuega fa’atino a lea Matagaluega. O lea tausaga o le 1976-77 lea sa la’ua a’o’oga fa’atasi ai i Fiti ma ua amatalia ai le mafutaga ua fa’ai’uina nei ina ua moe malolo i le aso Ianuari 7, 2015.

O lenei fo’i tama, sa iloga lana tautua i lea Matagaluega i lo latou tutu malosi e va’aia lelei meataumafa ma lo latou gaosiga lelei, ina ia le afaina le soifua laulelei o le atunu’u i ni mea e fa’apogaia mai i le gaseseina o mea taumafa. O ia fo’i sa fa’auluulu i ai lea auaunaga a le malo, ma o se tasi sa iloga ona mau fa’atuatuaina i lana galuega.

I lana tautua i le Ekalesia sa i ai taimi na avea ai o ia ma Epikopo, ae o le pateriaka fo’i o lona aiga, i le tina ma le fanau e to’afa ma fanau a fanau e to’a 8. Na soifua mai o ia i ona matua o Afuvai Tupapa Siafolau Le’iato ma U’ulopaimoana Afuvai. E to’alima ona uso ae to’alua ona tuafafine.

O ona alo tama’ita’i e to’afa o Leona Annie, Eileen Iliui Loyola, Tammy Temukisa Liuileafaga ma Bethany Ailafo.

Na amatalia ona toe sauniga i le sauniga fa’apitoa mo lona aiga, uo mamae ma e masani, ma sa fa’atino lea ia Ianuari 24, 2015. Na fa’atautaia lavai le Cultural Hall a le Ekalesia a Iesu Keriso o le Au Pa’ia o Aso e Gata Ai i Aua. Na ta’ita’ia fo’i lona toe sauniga i le malumalu e le susuga le Epikopo Bishop Su’e Brown. E na’o le lua lava molimau patino mo lea sauniga mamalu, o lona tama o Afuvai Tupapa Siafolau Le’iato, ma sa ia fa’ailoa mai ai, “Na ou iloa le sogasoga o le olaga o Sigafili ina ua alu e saili sana galuega e tausia ai le matou aiga. Na o’o fo’i lana sailiga i le nusipepa ma faigaluega ai, peita’i, e le’i umi lava ae nofo, fai mai e le lava le totogi.”

“Peita’i ina ua maua lona avanoa i le Public Health, ma maua ai lona avanoa e alu ai e a’oga, ae ma’ua pea le totogi mo le tausiga o ma’ua, o se mea lelei lea sa ia faia mo i ma’ua ae alu e a’oga mo sina vaitaimi i Fiti. Ina ua taliu mai, sa ia fa’ailoa mai ua i ai le tama’ita’i ua gau i ai lona loto, ma o i’ina lava sa amatalia ai le mafutaga ma le faletua, ua maua ai lenei to’atele o le fanau a fanau.”

“O se tama e tausi aiga, e tausi matua, e alofa tele i lona tina! Ua fa’apea fo’i ona fai fanau tele o ia i lana fanau teine, ma soso’o mai ai ma latou fanauiti.”

I le molimau a le tina sa laua osi feagaiga i le fa’aipoipoga, sa ia fa’ailoa mai ai, “O se tama e alofa tele ia te a’u ma le fanau. Na matua iloga lona o’otia ina ua amia se tasi o le fanau ae ua mafanafana lona loto, ua talia fo’i e ia lena mafutaga ua motusia i le oti, peita’i, o lea ua soso’o ma ia. O le a misia o ia i le mafutaga i aso fai so’o! E fa’agalo gata fo’i ona uiga ia te a’u ma le fanau, ae tau ina fa’amafanafana le Atua ia i matou ma le fanau ma aiga.