Afai ae toe si’itia le isi $0.50 mo totogi amata ia Setema 2015 e pei ona pasia e le konekeresi i ni tausaga ua mavae, o le mea moni o le a toe a’afia fo’i le tamaoaiga o le teritori, e pei ona aofia i le ripoti a le malo lea ua tauaao e le Fono Faitulafono, lea fo’i na aofia i le lauga autu a le alii kovana na tatala aloaia ai le ulua’i tauaofiaga lona 34 a le Fono Faitulafono i le vaiaso na te’a nei.

“Sa tatou molimauina i se taimi ua te’a a’afiaga matuia na a’afia ai lo tatou atunu’u, e mafua mai ina ua pasia siitaga o totogi amata a le feterale, ma i’u ina tapunia ai le kamupani i’a a le COS Samoa Packing, lea na leiloloa ai le silia i le 2,000 avanoa faigaluega i totonu o le vaiaso e tasi”, o se vaega lea o le saunoaga a le ali’i kovana.

“E tatau la ona tatou sailia se auala e mafai ai ona tatou fa’ailoa i le konekeresi, afai ae toe fa’amalosia le isi si’itaga i totogi amata a le feterale i totonu o le atunu’u, o le a toe pagatia fo’i ma a’afia le tamaoaiga o le atunu’u e pei ona tatou molimauina i le ulua’i taimi ua tuana’i atu”, o se vaega lea o le saunoaga a le ali’i kovana.

Na fa’ailoa e Lolo i le Fono Faitulafono e fa’apea, o le fa’atumauina o kamupani i’a e lua ua i ai nei i le atunu’u, o se gaioiga e tatau ona faia e le malo, ina ia puipuia tulaga manuia atoa ai ma le fa’aauau pea lea ona galulue o kamupani i le teritori, aemaise lava le taumafai ina ia puipuia le toe fa’amalosia o le isi si’itaga i totogi amata.

O auala ua uia e le kovana ina ia mautinoa e maua mai ai se fesoasoani o Amerika Samoa i le mataupu i totogi amata, e le gata ua ia tapa se fesoasoani a le sui failautusi o le Initeria ia Esther Kia’aina, ae ua ia aapa atu fo’i i le sui faipule fou a le atunu’u i le konekeresi, le tofa Aumua Amata Radewagen, ina ia alofagia le atunu’u mai lenei mataupu tuga.

Na taua e le ali’i kovana e fa’apea, e ui o lea ua taoto i tulaga lelei le atina’e o le tamaoaiga o le malo tele o Amerika i le tausaga lenei 2015, o le mea moni e le o fa’apena le tulaga o lo o taoto ai le tamaoaiga o le teritori i lenei tausaga, ona o le suiga vave ua tula’i mai i le atina’e o fagotaga, e mafua mai i le taumafai lea e fa’aitiitia ogasami e mafai ona fagota e atumotu o le Pasefika e aofia ai ma Amerika Samoa.

Ua sauni le malo e tu’uina atu lana lagolago malosi e ala i le faia o so o se auala, e fa’atumauina ai kamupani i’a e lua o lo o i ai i le atunu’u, e aofia ai le StarKist Samoa Inc ma le Tri-Marine, lea ua fa’amoemoe e tatala i le fa’aiuga o le vaiaso nei lana auaunaga ma maua ai galuega e i le va o le 500 i le 1,000 le aofa’i.

Ua i ai fo’i le fa’amoemoe e le o toe mamao se taimi ae toe fa’alautele le auaunaga a le StarKist Samoa, e ala i le toe tatalaina o le isi ana auaunaga e taua o le ‘pouch operation’, lea sa fuafua mai i ni tausaga ua mavae ma le fa’amoemoe e maua ai isi galuega fa’aopoopo mo le atunu’u.

O le talitonuga e pei ona saunoa Lolo, afai ae mautu ma malosi kamupani i’a, o le ata vaaia fo’i lea o le aga’i i luma o le tamaoaiga o le malo ma le atunu’u.-