Na fa’ailoa e le loia o lo o tula’i mo le Faletupe o Atina’e a Amerika Samoa (DBAS) i luma o le fa’amasinoga maualuga i le vaiaso nei, le i ai o se fuafuaga a le faletupe i le ono toe faia lea o ni isi suiga fa’asaga i ulua’i fa’amaumauga o le tagi sa latou fa’aulu fa’asaga i le afioga i ta’ita’ifono o le Komiti o le Faletupe, le afioga i le ali’i senatoa ia Nuanuaolefeagaiga S. Nua ma lona faletua ia Usu, e tusa ai o le le tausisia o ni isi o tuutuuga i lalo o le polokalame o le ‘1602’ sa fa’amanuiaina ai i laua.

O vaega na taua e le tama’ita’i loia e le o tausisia e Nua o le tulaga lea i tagata e agava’a ona nonofo i le fale sa fausia i lalo o le polokalame.

E foliga mai o tagata o lo o taua lo latou fa’aaogaina o le maota o Nua i Ta’u i Manu’a, o tagata e le agava’a i lalo o le polokalame ona nonofo ai.

O ni isi o tuutuuga ma aiaiga o le pokoloma o le ‘1602’ lea sa fa’amanuiaina ai le tusa ma le to’a 132 o ni isi o le atunu’u, ia tatau ona nonofo mau totogi ai tagata e vaivai ma maualalo le latou tamaoaiga.

O Nua ma lona faletua o Usu na fa’amanuiaina i se vaega tupe e $351,124.80 mai le polokalame o le ‘1602’, e pei ona taua i fa’amaumauga o le tagi ua i luma nei o le fa’amasinoga na fa’aulu e le DBAS.

E 19 tagi na fa’aulu e le DBAS fa’asaga i ni isi sa agava’a i lalo o le polokalame, ina ua latou le tausisia isi vaega o le polokamale, e pei o le le mae’a o le galuega i le taimi ma le aso sa fa’atulagaina e tatau ona mae’a ai.

O le fa’aiuga o le tausaga e 2010 na amata tufatufa atu ai e le DBAS vaega tupe sa fa’amanuia ai i latou na agava’a ma le tuutuuga, e tatau ona mae’a a latou galuega ae le i tuana’i le aso mulimuli o Tesema 2012, ae ina ua tuana’i lea taimi e le i mae’a le tele o galuega, sa toe tuuina atu ai loa e le DBAS ni tusi ia i latou nei, e fautuaina ai le tatau lea ona fa’amae’a a latou galuega i le taimi sa fa’atulaga atu e le faletupe.

Ae ina ua le tausisia e i latou le taimi lona lua sa tuuina atu, na faila ai loa e le faletupe tagi fa’asaga ia i latou nei.

E tolu isi mataupu na fofogaina i luma o le faamasinoga maualuga i le taeao ananafi, ma ua toe tolopo uma ia mataupu seia aulia le aso lea ua faatulaga e fofoga ai.