Ua fautuaina e le afioga i le ali’i senatoa ia Mauga Tasi Asuega le faigamalo a Lolo ma Lemanu, tauala atu i sana talosaga sa tuuina atu i luma o le peresetene o le Senate i le taeao ananafi, ina ia aua nei vave vave le faigamalo e talia pisinisi mai fafo o lo o naunau e fia ulufale mai i le atunu’u, ae lelei ona su’esu’e muamua ma sailiili pe lelei tulaga o nei pisinisi.

O le saunoaga a le afioga i le Maoputasi na fa’avae mai lea i le fonotaga na faia i le vaiaso ua te’a i le ofisa o le kovana i se pisinisi mai Filipaina o lo o naunau e inivesi mai i Amerika Samoa le silia i le $100 miliona, e fausia ai se fale gaosi taumafa i le teritori ma mafai ona faa faigaluega ai le silia i le to’a 700 tagata o le atunu’u.

O lea fonotaga i le vaiaso ua te’a na feiloai ai sui o lea kamupani mai Filipaina ma le alii kovana ia Lolo Matalasi Moliga, lea fo’i sa valaaulia ai ma sui o le Fono Faitulafono e auai, ina ia maua ai le avanoa latou te molimauina ai se taumafaiga mai lea kamupani mai fafo.

O le igoa o le kamupani Filipaina o le A.V.M Bernado Engineering. O nisi o sui o le Fono sa auai i le fonotaga e aofia ai taitai o le Fono Faitulafono.

Saunoa Mauga e fa’apea, e taua taumafaiga a le malo mo le fa’atosinaina mai o pisinisi mai fafo e fesoasoani i le atina’e o Tutuila ma Manu’a, peita’i o le mea lilo e ao ona silasila toto’a i ai ta’ita’i o le atunu’u, e le tatau ona vave vave e talia lenei kamupani, ae tatau na fai muamua se su’esu’ega pe lelei lea kamupani i tulaga o galuega.

“O le fautuaga i lau afioga i le peresetene, tatou fai fai malie, aua le avea lo tatou naunau ma itu e tula’i mai ai ni faafitauli i le sa o Tutuila ma Manu’a”, o le saunoaga lea a Mauga, ma ia toe talosagaina ai le tatau lea i le faigamalo ona sailiili malie tulaga uma e faatatau i le kamupani lenei, po o se kamupani e talafeagai ona aumai.

Na tula’i le afioga i le alii senatoa ia Galea’i M. Tu’ufuli ma ia lagolagoina le finagalo o Mauga, ina ia fai se iloiloga a le komiti o le Sailiga o le Tamaoaiga o le malo e uigai lenei mataupu.

“Tatau na malamalama lelei le fono po o fea e sau ai lenei kamupani, ae pe faapei foi lona tulaga i totonu o le atunuu o lo o i ai, ae pe lelei foi i tulaga tau pisinisi”, o le saunoaga lea a Galea’i, peita’i na tula’i le afioga i le alii senatoa ia Afoa S. M. Lutu ma ia saunoa e fa’apea, o le matafaioi a le kovana o le sailiili i ituaiga pisinisi faapenei ina ia aumai i le teritori e fesoasoani ai i le faaleleia o le atina’e ma le tamaoaiga o le atunu’u, ae le faapea o le a faagalo mai ai le pito laau a le fono e iloilo ma vaavaai pe lelei lea kamupani pe leai.

Saunoa Afoa e fa’apea, e manaia ae tuu pea le avanoa i le kovana ma le faigamalo e faatino ai la latou pito laau i le mataupu lenei, a mae’a ona maua fo’i lea o se avanoa o le fono e fesiligia ma auiliili ai lea kamupani.

Na fa’aluaina e le afioga i le alii peresetene o le senate ia Gaoteote Palaie Tofau le fautuaga a Afoa, o le tiute tauave lava ia o le kovana ma le faigamalo o le saili o pisinisi e galulue i le teritori, ae i ai foi le taimi o le fono e avatu ai sana fautuaga.

O le isi itu taua o le mataupu lenei e pei ona taua e le alii peresetene, sa atagia i le folasaga a le kamupani le lata i le afe avanoa faigaluega e mafai ona maua mai ai, ma o se itu lelei lea mo le atunuu ma lona atina’e.

O le kamupani e pei ona fesiligia, latou te gaosia taumafa e gaosi mai i le i’a, atoa ai ma vai inu e maua mai i le niu, mago, nonu ma isi ituaiga vai inu eseese.