vaega #3

Ua uma ona fa’amatala uma e le Fau Gagana i le toeaina ma lona afafine le la gaioiga e fai pe a tafe mai le vai, ma ua le mafai ona nofo lelei le toeaina ma lona afafine i lo la naunau, tuai ia na tafe mai le vai ae se’i fa’atino le fa’atonuga pe fa’amata e taunu’u. Fai mai le tala ua oo i le po, ona taotooto lava lea o le toeaina ma lona afafine i lalo o le fau ma fai ai le la evaga i le malu o le sau, ona musumusu atu lea o le toeaina i lona afafine e fa’apea, “Talosia siaula ia tau Tupu lou gafa”, ma fai mai le tala, o iinei na afua atu ai le faaupuga ua masani ai le to’atele, “eva i le laufau malu”, e fa’amanatu ai le evaga a le toeaina ma lona afafine i lalo o le fau a’o malu le agi ane o le savali.

O le a avatu i se isi vaega o le tatou Vavau a Samoa le laasaga na o o i ai le faatonuga sa tuuina atu i le toeaina ma lona afafine, ma le mafuaaga na ala ai ona maua e le tamaitai le Taemanutavae. Ae fai mai le tala, ua usu Taemanutava’e i le tamaitai lenei o Leauta, fa’ae’e le gafa e to’alima le la fanau, o tama e to’afa ma le latou tuafafine e to’atasi. Ma o le fanau tama e aofia ai Tu’itu’i o le Gatoaitele o Fata ma Maulolo, faapea ai Va’afuti ma Vaafa’i, ma le teine o Luafatasaga.

O le tama’ita’i la lea o Luafatasaga na usu i ai Malietoa, fa’ae’e le gafa o Malietoa Uilematutu, po o Malietoa Faiga, ona fai mai lea o le toeaina i lona afafine, “Se ua aoga ma evaevaga ma si o’u afafine sa fai i lalo o le fau ao agi malu mai le savili ua tau tupu ai lona gafa”. Ae pei ona silafia e le aufaitau, o le malae lava ia o Fuifatu, o le malae o le toto, e mafua lea faamatalaga, ona o toa uma lava e toilalo a latou vaega au i taua sa faia i aso ia, e fasiotia ona avane lea o latou fatu (tulou) ua fufui i le vai vevela, ae ave ua tali ai le sua a le Fa’asaleleaga ma Safotulafai, peita’i o le taofi fa’a Sa Letufuga, fai mai o le malae lena e ta’i ai le sua a Letufuga, e le ta’ia i se isi lava mea ae ta’i i le fatu o le tagata, fai mai e fufui i le vai vevela ona ave lea e ta’i ai le sua. Ae manatua fo’i, o iina fo’i lea e talitonu le au fue loloa na maua atu ai fa’alagiga sa’o o Tuilagi ma Namulauulu, lea e faapea, “o i laua na ta’i”, aua fo’i o laua na taia le sua a Letufuga.