O lo o galulue nei le Matagaluega o Tupulaga Talavou, Tina & Tama’ita’i i le tu’u fa’atasia o pepa fa’atumu sa tufatufa atu i Ekalesia eseese i totonu afioaga ta’itasi i le atunu’u, mo le fa’amaopopoina lea o le aofa’i o tagata e le o i ai ni galuega i totonu o le teritori i le taimi nei.

I se fa’atalatalanoaga a le Samoa News ma le Sui Fa’atonu o le Matagaluega, le afioga ia Pa’u Roy Ausage i le taeao ananafi, sa ia fa’amaonia mai ai lea tulaga.

Saunoa Pa’u e fa’apea, o le fuafuaga lenei o se polokalame na fa’ataoto e le afioga i le ali’i Kovana ia Lolo Matalasi Moliga, ina ia mafai ai ona maua ni fa’amaumauga i le aofa’i o tagata e le o i ai ni galuega i le taimi nei, ae po o a fo’i a latou agava’a fa’apitoa o lo o i ai.

O le mafua’aga lea na a’e ai se finagalo i le ali’i kovana e pei ona saunoa Pa’u, e avea le Matagaluega o se vaega o le malo latou te tu’u fa’atasia fa’amaumauga nei.

E lua vaiaso na tufatufa atu ai i totonu o Ekalesia eseese uma i afioaga ta’itasi i le atunu’u pepa fa’atumu, lea o lo o manaomia ai le tusia o le suafa atoa o le tagata, aofa’i o tagata, aemaise ai o se agava’a fa’apitoa o lo o ia te ia.

“O le vaiaso na te’a nei na fa’amuta ai le fa’atumuina o pepa ma ua galulue nei le matou Ofisa i le tau tu’u fa’atasia o fuainumera nei, ina ia mafai ai ona maua se ata atoa o le aofa’i o tagata e le o i ai ni galuega, aemaise ai o ituaiga agava’a eseese o lo o nonofo ma i latou”, o le saunoaga lea a Pa’u.

O se tasi o fa’amoemoe autu o le ali’i kovana e pei ona saunoa le Sui Fa’atonu, o lea ua toe o se aga ona tatala aloaia lea o le auaunaga a le kamupani i’a o le Tri-Marine i Atu’u, ma e mautinoa fo’i le tula’i mai ai o se manaoga i le fia aumaia lea o ni tagata mai fafo e pei o le malo tuaoi o Samoa e galulue i le kamupani, e pei ona faia e le malo ma le kamupani i’a o le COS Samoa Packing ua tapunia nei.

“O le taua la o le polokalame lenei, o le a iloa tonu ai le aofa’i o tagata e le o i ai ni galuega i totonu o le atunu’u, afai la ae tula’i mai se manaoga mai le Tri-Marine mo ni tagata faigaluega, ae o lea ua mautinoa lelei e le faigamalo le aofa’i o tagata o lo o aumau i le atunuu e le o i ai ni galuega, atoa ai ma ituaiga agava’a eseese o lo o nonofo ma i latou”, o le isi lea saunoaga a Pa’u.

E le gata e aoga mo le kamupani i’a, ae aoga fo’i mo fa’amaumauga a le Matagaluega, e iloa ai pe to’afia le aofa’i o tagata e i le va o le ta’i 18 tausaga le matutua e o atu i le 25 tausaga le matutua e le o i ai ni galuega, ina ia mafai ai ona fuafua ni polokalame talafeagai mo i latou, e fa’aaoga tatau ai o latou taimi ao tau saili ai ni galuega.