Fa’atalofa atu i le mamalu o le atunu’u i lenei taeao fou, e i ai pea le fa’amoemoe maualuga, o lo’o aoina le masina i le soifua laulelei o le atunu’u. E ao ai ona o tatou fa’apea ifo, “Le Atua mamana e, o ai ea matou te o i ai, o lo’o ia te Oe upu o le ola, fa’amagalo i matou uma i mea ua o matou vaivai ai, ae o le vi’iga matou te fa’afo’i atu i Lau Afio, e fa’avavau, fa’avavau lava, Amene.”

Na muta la tatou tala ina ua toe sauni nei Jerry Jaxx ma lana vaega e toe fo’i i le nofoaga o lo’o tausi ai manuki mo le galuega tele ua fuafua nei. Ae manatu fo’i, o lea ua ma’ea ona saini pepa e fa’amaonia ai, ua fa’amatu’u atu e le kamupani a le Hazelton Washington le nofoaga lea i le vaega su’esu’e a le Ami latou te fa’afoeina ai le tapeina o manuki. O lenei malosi’aga e mo sina taimi, se i mae’a le galuega lea o le a feagai nei ma le Ami.

A’o tapena Jerry Jaxx ma lana vaega, e le i iloa e Jaxx ua i ai fo’i se tasi o le aufaigaluega a le kamupani o lo’o galue ai Dan Dalgard ua fa’ata’otolia i le falema’i ona ua a’afia i le fa’ama’i. O le tulaga lea, o lo’o taofiofi pea e le ali’i foma’i o C.J. Peters, na te le i fa’ailoaina i a Jerry Jaxx.

Ua fa’amaopopo  nei e Jaxx ia tagata o le a o i le nofoaga o lo’o i ai manuki, ma o le taimi lea ua fai ai le latou fonotaga ma fa’atonutonu i latou i le mea e ao ona fai pe a taunu’u i Reston. Na toe fa’apea upu a Jerry Jaxx, “O lo’o tau sa’ilia nisi e ofo mai mo le galuega lea, ae afai e i ai se tasi e le o mana’o ai, ia e le afaina, e le fa’amalosia oe, pe afai e te le fia au ai.”

Fai mai, e leai se tasi na si’i i luga sona lima, o lona uiga ua malilie e o uma e fa’atino le galuega e pei ona mo’omia e le Ami. O totonu o le li’o lea, o lo’o i ai se tama’ita’i Satini e igoa ia Swiderski, ua tonu i le mafaufau o Jerry e le tatau ona alu, ona o lo’o ma’itaga. O le virusi o le Ebola e i ai lava ona itu malolosi e a’afia ai tina ma’itaga, ma o lea na le mafai ai ona alu.

E le mafai e le vaega a le Ami o lo’o tau i taua, ona fa’atino le galuega lea, o tagata fo’i e galulue i le galuega lea, e le maua ni o latou totogi fa’asili. O totogi lava e pei ona folasia e le Ami, o totogi lava ia e maua e i latou uma nei ua ofo o latou ola e fa’atino ai le galuega faigata lenei.

Na toe fa’atonu e Jaxx i latou uma nei, ia ‘aua lava ne i talanoa pe fa’ailoa i se tasi le galuega o le a fai, e o’o fo’i i tagata o o latou aiga, ia ‘aua lava ne i fa’ailoa i ai. O le itula e lima i le taeao o le aso e soso’o ai, o le a feailoa’i uma ai i totonu o le nofoaga a le Ami ona malaga ai loa lea i le nofoaga o lo’o i ai manuki i totonu o Reston.

Tesema Aso 4-5, Aso Gafua ma le Aso Lua. Fai mai le fa’amatalaga a le ali’i tusi tala o Richard Preston, e pei ona fa’amatala ane e le ali’i foma’i o Eugene Johnson, na alu le po atoa e le i maua se malologa lelei a ali’i Fitafita. E o’o fo’i ia te ia, e le i maua sana moe i lea po, ona ua popole lona loto i Fitafita o le a galulue i totonu o le nofoaga o lo’o i ai manuki.

Ua toe mafaufau Eugene Johnson i tulaga faigata na o’o fo’i i ai ia, i le taimi na alu ai i Zaire. Fai mai, na tuia lona lima i se tui o lo’o i ai le toto o le isumu, ma na i’u ai ina toe fa’afo’i ane ia i le va’alele tu sa’o a le Ami i le nofoaga o Fort Detrick, ma ave sa’o lava ia i le Slammer.

O le potu fa’apitoa lea a le Ami, afai loa e a’afia se tasi i so’o se virusi, o le potu lea e taofia ai, o le a le toe va’ai i lona aiga, o le a le toe talanoa i ai, ae pau tagata o le a o latou mafuta i taimi uma, o ali’i ma tama’ita’i foma’i fa’apitoa a le Ami.

E faia pea…

Fa’aliliu: Akenese Ilalio Zec