E 50 tusi na tusia e Daniel Pouesi na foa’ia mo le fa’alapotopotoga a le Toe Afua Mai Matua (TAMM) ina ia latou fa’atau atu, ma taua’aoina le seleni e fesoasoani atili i le polokalama ua latou taumafai ai i totonu o a’oga. O lenei foa’i sa faia i le taimi na asiasi mai ai Pouesi ma lona faletua i le tatou atunu’u ma Samoa i le fa’ai’uga o Novema, 2013.

O le tau o le tusi e ta’i $20  ma afai ae tu’ufa’atasia lea foa’i alofa ua atoa ai le $1,000 O se tala mai le faletua o Valasi Gaisoa, o se sui o le TAMM,  sa ia fa’apea ai, “O lenei meaalofa, ua sili ona fa’afetaia ona e le o gata i le foa’i o le tamaoaiga tau tupe mo le TAMM, ae ua agalua lea foa’i i le tusi lava ia, ma lona aoga i matua o lo’o ua a’otauina mo le fa’amoemoe ia latou sofa’i le ola a’oa’oina o le fanau i totonu o a’oga maualuluga, ia fa’aitiitia lo latou soifua fetaua’i pe femisa’i.”

Sa ia toe fa’aopoopo mai, “O lo’o ua alumia lava le tusi, ae ua fa’ailoa atu fo’i i fanau a’oga, ia latou faitauina lea tusi, ua aoga le tala tusia, aua ua fa’atatau tonu i a’afiaga o tupulaga i totonu o aiga Samoa i afio’aga, le latou matafaioi tau’ave, ae maise o latou ‘a’afiaga i fa’alavelave tutupu, lotoa ma ala e afua ai ona fetaua’i ma femisa’i, ma le o’oo’oga lava o lagona e o’o lava ina pule i le soifua.”

Ua fa’aigoaina le tusi a le ali’i Pouesi - Akua, “Atua” i le gagana kerisiano! Aisea ua ia fa’aaogaina ai le gagana masani, “ina ia toe tau fa’ailo ai lagona o aso ua tuana’i.”

O le tusi ua ‘auga “Ia gafatia e lou soifua fa’atuatua i lou Atua, ona e finau maumaua’i ai, pe afai e lu’ia oe i nisi o filosofia fa’aonaponei, sofa’i e nisi talitonuga, ae maise o lou tamau i agaifanua sa soifua mai ai tua’a, pe o le soifua tu’umavaega.”

“O le fa’akerisiano e sili lava i so’o se talitonuga e ao ina mau fa’atuatuaina e so’o se tasi o soifua, peita’i, e le o lava lau su’esu’e e mausali ai lou fa’atuatua, pe afai e te tu’ua lou aiga i lo tatou atunu’u ma e o’o atu i fafo e fa’alautele lou atamai, sofa’i ai lou ola fa’atuatua e isi mau talitonuga, ona masofa ai lea o lou lea fa’amoemoe i lou fa’atuatuaga!” O se isi lea fa’apupulaga atili ole mau o lo’o taumafai le tusi tala e fa’ailo i lana tusi o le Akua!

O lenei tusi, o lo’o tusia i le soifuaga sa tatou o ola ai i le vaitau o le 1960. Ua aofia ai ma le a’afiaga na tatou savalia i le afa tele o le 1966. O le vaitau fo’i lea ua matele tagata talavou ina latou fa’apea ane, “E leai se Atua!”

O le tusi muamua a Daniel Pouesi o le “Nafanua, Saving a Samoan Rainforest.” O lana tusi lea sa ia tusia ma e fa’asinomaga i le Vaomaoa o Asau.

O le tusitala o se alo e fa’asino ia Ioselani ma Fa’ailoga Pouesi. Sa avea i la’ua ma faife’au i Fasito’outa, Samoa ma sa soifua ane ai i lea afio’aga le ali’i tusitala.

O lo ua alaala nei o ia i Carson i le setete o Kalefonia, o lo’o to’atele fo’i tagata Samoa o lo’o alaalata’i ai.

E le gata i lea fesoasoani i tusi, ae sa ia pu’eina pese ma fatuga sa peseina e le vasega lenei o a’otauina a le TAMM, ma ia fa’ailoa mai, o le a ia tu’ufa’atasia ai se CD Pese ma toe lafo mai mo le TAMM e fa’atele ai se vaega tupe e fesoasoani i le latou fa’amoemoe o faia nei. “O ala ia e taumafai ai, ona fa’ailo i fanau talavou i a’oga, e le o i ai se mea e fou o tupu i o latou olaga, o mea fo’i ia sa soifua mai ai o tatou tagata ua tinomatutua nei.” O se fa’amatalaga lea a Gaisoa.