TAUA’AO  FA’AILOGA FA’AUU ASCC MA FA’AILOGA KOSI O PISINISI

O le aso Tofi na te’a nei sa fa’aataunuu ai le tufatufaga o tusi pasi, fa’ailoga ma mea uma sa masani ona faia e le ASCC-BAOA po’o le vasega o fanau fa’au’u mai le Kolisi Tuufa’atasi na tau’avea latou kosi fa’apisinisi. 

O le latou ‘aiga ua saunia lelei lava mea uma, ma ua fa’avasega e o atu i latou i le fale o le latou Faia’oga Fa’auluulu i Kosi Pisinisi, ina ia fa’ataunuu ai le latou pu’ega ata e fa’amau ai le latou fa’au’uga i lenei fa’aiuga o le latou taumafaiga ia Me 2020.

E to’a 9 ua mafai ona fa’aiuina ma le manuia latou taumafaiga e fa’au’u ma fa’ailoga maualuluga i Kosi Fa’apisinisi mai le Kolisi Tuufa’atasi o Amerika Samoa.

O i latou nei ua lisia mai i le vasega lea: Lapaloma F. Pese; Cecilia Sagato, Zachary Lavasii Taunoa; Edaward Yandall; Marie Theodora J. Ta’ai; Pauline Katrina Nia Filisi; Jemisa Omeka Tricia Vaka; Mary Lynn Fa’alata; Matilda Honora Kaio ma Abigail Tafiga Moleli.

Na tofusia le fanau lenei ma latou aiga matagofie e aofia ai ma le aiga mama fa’atasi ai ma latou teutusi e fa’amaeaalofa mo latou e pei lava ona faia e le pulega o Mataupu Fa’apisinisi i a latou sui faaiuaso i tausaga ta’itasi fa’apea ai ma latou tusi pasi ua ausia ai e i latou togi maualuluga.

O lenei fo’i le Kosi e fa’amalosia ona pasi so’o se tamaititi a’oga e ao ina ausia togi o le B+ mo mataupu tau’ave, fa’ato’a fa’amauina o se tasi ua agava’a ona fa’au’u ma fa’ailoga i kosi tau pisinisi mai le ASCC.

“O le ‘aiga e tatau ona fa’aoo lava i o latou matua,e talisapaia ai se taumafaiga a le fanau. O le to’atasi o lo’o ua misia i le ata ua pu’eina ona o lo ua avea nei o ia ma Leoleo fa’ata’ita’i i tofiga tau Malu o le Malo o Amerika Samoa ma e le mafai ona toe auai i le fa’au’uga ae tatau ona tuutoina i aoaoga ia,” o se fa’amatalaga lea a le tamaitai e fa’auluulu i ai kosi tau pisinisi i le ASCC, Dr Faofua Va’apu’u Fa’atoafe.

FA’AFAIGALUEGA MAI TAGATA - AE LE O OVATIMA $2,000

Ua fa’atonuina e Kovana Lolo Moliga fa’atonu sili o matagaluega o le Malo ina ia amata ona fa’afaigaluega tagata e le o faigaluega ae aua le so’ona totogia tagata ovataimi o faigaluega tuai e pei ona ia va’aia i fuga o nisi o ovataimi ua latalata i le $2,000 mo nisi.

Ua iloga mai i itula ua va’aia o nisi ua taga’i i ai le kovana, ua amata faigaluega mai le 6:00 i le taeao ae fa’ato’a manava i le 12:00 i le vaeluaga o le po.

Fa’ailoa e le Kovana, e le tatau lea ituaiga o sifi faapea, e tatau ona lava le malolo a tagata faigaluega ina ia mautinoa o mata’alia fo’i i taimi uma i o latou tiute fa’atino.

Peita’i i le tele o matagaluega o lea e faatulaga le ta’i 20 itula faigaluega ae 40 itula e totogi mo tagata faigaluega. O lona uiga, ua pau tagata nei e maua ovataimi ma ua totogia fo’i latou ovataimi, o i latou mai le Mataglauega o le Puipuiga o le Saogalemu Lautele, ma i latou o lo’o galulue i le Matagaluega o le Soifua Maloloina, i latou e ta’imua mai i galuega lavea’i ia malupuipuia le lautele o le atunuu i vaitau o a’afia ai i tatou i le fa’ama’i pipisi o le Coronavirus i le taimi nei ma le Misela i le vaitau fa’aiu o le tausaga ua te’a.

“Ia mae’a mai lenei vaitau ua foa’ia mai ai le vaega tupe fa’apitoa mo le puipuiga o le atunuu mai le coronavirus, ua mae’a ona fa’afaigaluega nisi tagata fou e to’atele ma ua tuu fo’i lea vaega tupe tele i taga a nisi e to’atele o le atunuu, sa le faigaluega,” o se vaega lea o le saunoaga a le kovana.

Afai o le fanau ua maea a’oa’oina mai Kolisi ma Iunivesite a le tatou malo, e tatau ona fa’atulaga avanoa e faigaluega ai i latou i totonu o matagaluega a le malo. 

Ua fa’ato’a mae’a ona filifilia le to’a 50 o sui Leoleo e le’i fa’apinea i se tomai fa’apitoa aua e le’i a’oa’oina i le tulafono e pei ona mana’omia ona pasi mai ai i latou.

Ae o lea fo’i ua toe fa’ailoa atu i le Komesina e toe fa’afaigaluega le isi to’a 100 o i latou ina ia mafai ona tautuaina le atunuu i le vaitau o loo fa’aolioli mai le coronavirus. 

“O le to’a 50 lea o lo’o va’aia nei o lo’o mitiafu papa’e i latou, ma e le mafai fo’i ona latou tusia ni ticket mo so’o se tasi e tusa o ala o le tulafono, aua e le’i agava’a i latou e tusia se solitulafono a se isi, a’o le’i muamua malamalama ma pasia e i latou suega e fa’amautu ai, ua latou iloa le tulafono a le Malo o Amerika Samoa,”o le fa’apupulaga lea ua fa’ailoa mai e se tasi o ali’i sinia o le Matagaluega o le Puipuiga o le Saogalemu Lautele.

Ina ua fesiligia le tulaga o le ofi atu ai fo’i i totonu o lea matagaluega o i latou e le talafeagai ma tulafono tau puipuiga o le atunuu mau fuala’au ma vaila’au oona, ae faailoa mai e le kovana, “Tau lava ina fa’afaigaluega mai tupulaga o le atunuu, fai lea o le suega pe o tagofia fuala’au ma vaila’au oona, afai e i ai i latou na, toe taofia e le faigaluega, ae va’ai i si e fa’aulu e faigaluega.”

Fa’ailoa e le kovana, “Ua na’o i latou o lo’o faigaluega lava i le ta’i 40 itula ua mafai ona agava’a mo ovataimi e totogi.” O i latou fo’i lea e faigaluega i le 20 itula ae totogia mo le 40 itula faigaluega, e le o agava’a i ni ovataimi e totogia.

AMATA TUUMAMAINA LE FA’ASA A LE LDS

Ua fa’alauiloa e le fa’auluuluga o le Ekalesia a Iesu o le Au Pa’ia o Aso e Gata Ai i le mamalu o latou ta’ita’i uma o le latou Ekalesia i atunuu uma ua i ai, ina ia toe amatalia latou sauniga lotu masani ai, ae ia latou usita’ia tulafono o lo’o i ai i latou.

O sauniga ua fuafua e amatalia, ia mafai ona usitaia e i latou le to’atele o tagata e aofia ai, ia nonofo vavamamao lava, ma ia le toe u’umi fo’i taimi e fa’atautaia ai nei sauniga uma e pei ona masani ai.

Ua atoa le lua masina talu ona taofia sauniga lotu i le Atua a le Ekalesia aoao i le lalolagi atoa, peitai o le taimi nei, ua fa’ataga ona faia ae ia usita’ia pea tulafono tau le to’atele o i latou e aofia fa’atasi i le malumalu e tasi, ma ia nonofo valavala lava.

E tatau ona usita’ia le tulaga o le fa’amama aiai o malumalu ma nofoaga uma o le a fa’aaogaina e tagata e auai, afai fo’i e mae’a le sauniga o le a toe fa’amamaina uma nei nofoaga uma.

O le a fa’atonuina ia fa’amama ona faia o pupuni fofoga ina ia mataituina lava le usita’ia o aiaiga o le fa’asa lea e fa’alauiloa i atunuu uma o le lalolagi, o le a taofia pea le fa’atautaia o aufaipese ae o le a fofogaina fa’alauaitele viiga o le Atua i sauniga a’o faia nei talifofoga.

Ua tatalaina fo’i le usuia o fonotaga a le Ekalesia ae ia mataituina le aofai o sui usufono, ia faia fonotaga e sili atu i le tasi, ae fesuia’i totino, ia maua le aotelega o manatu.

I nei fonotaga uma ua fa’atagaina, ia le uumi ae ia fa’apupu’u lava. O aiaiga tamau nei ua fa’alauiloa i lala uma o lea ekalesia i atunuu ta’itasi o lo’o faatula’ia ai.

Pe afai e fia fa’alautele so’o se fonotaga i le mamalu lautele o Uarota ma ekalesia lautele, e fa’aaogaina pea lava so’otaga fa’ainiteneti ua mae’a fa’aaogaina i lenei vaitau, e fa’alaua’itele ai fonotaga i tagata uma o totino o le ekalesia aoao.

Ua tuuina mai nei le malosi’aga e faia le fa’aiuga ina ia fa’atautaia sauniga pupu’u toe le to’atele sui auai i peresetene ta’itasi i atunuu ta’itasi ina ia faia le fa’aiuga e fa’atautaia ai sauniga i le latou malo o alaalata’i ai.