Ads by Google Ads by Google

Maua le tino maliu o se tamaloa i totonu o lana va’a faila

O lo o fa’agasolo i le taimi nei suesuega a le Matagaluega o Leoleo, mo le suesueina o le mataupu e fa’atatau i le tino maliu o se tamaloa na maua i totonu o lana va’a faila i le aso Lulu na te’a nei.

 

Na taua e se leoleo sinia e le i finagalo e fa’ailoa lona suafa e fa’apea, o le mataupu e faatatau i le tino maliu o le tamaloa, na maua e le ofisa o leoleo ina ua logo e se isi tagata e sosoo a la va’a faila le ofisa o leoleo mo se fesoasoani, ina ua alu atu le tagata lea e siaki lana uo ae maua atu ai o ia ua maliu.

 

Na taua i lea lava ripoti e fa’apea, ina ua tuana’i ni nai aso e le i toe vaaia e isi tagata e nonofo i luga o a latou va’a faila le tamaloa o fealua’i ane i totonu o lona va’a, na alu ai loa le molimau e siaki o ia i le aso Lulu na te’a nei po o a mai, ae na fa’ateia ina ua taunu’u atu ma maua ai lona tino maliu i totonu o lana va’a.

 

Na agai atu sui o le vaega a le Marine Patrol a le Ofisa o Leoleo faapea ai ma le vaega a le EMS i luga o le va’a, ma latou fa’amaonia ai le ripoti, ma toso mai ai loa e le va’a a le Marine Patrol le va’a a le tamaloa i luga o le uafu i Fagatogo, ma auina atu ai loa lona tino maliu i le falema’i i Fagaalu e sui o le EMS.

 

I se ripoti na taua ai, o le va’a lenei na taunu’u mai i le teritori i le masina o Novema 2013, na taula ai lava i ogasami o Amerika Samoa.