Ua i ai se fuafuaga vaai mamao a le malo i le ono aapa atu lea i atunu’u e pei o Fiti ma Initia e saili mai ai ni isi faiaoga a galulue i totonu o potu aoga i le atunu’u, i le mae’a ai lea ona latou molimauina o le tulaga manuia o le polokalame lea na aumai ai faiaoga mai Samoa ma galulue i totonu o potu aoga i le tausaga na te’a nei.

O faiaoga o lo o manaomia mai fafo atu o Amerika Samoa e i ai lo latou tomai i le a’oa’oina o mataupu e aofia ai le ‘Science, Technology, Engineering, Mathematics’ (STEM).

O le fa’anauauga o le malo o lo o i ai, ia fa’atupulaia le aofa’i o faiaoga e a’oa’oina ituaiga mataupu nei i le atunu’u.

Ina ua mana’omia e le Ofisa o Aoga ni faiaoga latou te a’oa’oina mataupu nei i totonu o potu aoga, na mafua ai loa ona latou faia se auala le tumau e pei ona molimauina le manuia i le taimi nei, o le aumai lea o faiaoga mai Samoa ua lava lo latou tomai i le a’oa’oina o mataupu nei i totonu o potu aoga latou te a’oa’oina fanau aoga, ae alo le malo e a’oa’o ana faiaoga ia lava lo latou silafia i mataupu nei.

I se vaega o le ripoti a le malo lea ua tauaao e le Fono Faitulafono, o lo o taua ai e le malo lo latou molimauina o le tulaga manuia o le polokalame o le aumai lea o faiaoga mai isi atunu’u e a’oa’o fanau i mataupu fa’apitoa nei.

O isi fuafuaga fa’ataoto a le malo mo le fa’aleleia atili o le itu tau aoaoga, e le gata ia to’a 20 tamaiti aoga i le faiaoga e tasi (Teacher Student Ratio of 1 to 20), a ia fausia ni isi faleaoga fou e a’oa’o ai fanau aoga ua fa’atupulaia i le taimi nei.

Saunoa le ali’i kovana ia Lolo Matalasi Moliga e fa’apea, o le manulaiti a le malo sa fa’ataoto i le ulua’i taimi na tula’i mai ai, ia maua uma e fanau a Amerika Samoa le avanoa e a’oa’oina ai i latou, ona o i latou e fa’amoemoe i ai le lumana’i o le malo ma le atunu’u, ma o gaioiga uma o lo o taumafai i ai le malo, ia mautinoa e ausia ai lana manulauti ua fa’ataoto.

O aoga pito i to’atele le faitau aofa’i o tamaiti aoga o lo o aooga ai, o aoga ia o le a fa’amuamua ona toe fausia ai ni isi potu aoga fou e pei o le aoga tulaga muamua a Pava’ia’i, Tafuna, Leone, Pago Pago ma Aua.

O le faleaoga fogafalelua a Aua na fa’apaiaina i le taimi tonu na malaga asiasi mai ai le sui failautusi o le Initeria ia Esther Kia’aina i le masina o Novema, o lea fo’i sa ia fa’amaonia le fa’amatu’u mai o se vaega tupe e fausia ai se faleaoga fogafalelua fou mo le aoga maualuga a Samoana, ina ua fa’amaonia le fa’aletonu o le faleaoga fogafalelua tuai o lo o i ai.

O le tausaga lenei ua fa’amoemoe e fa’amae’a ai galuega mo faleaoga fou a ni isi o aoga na amata fausia mai i le tausaga na te’a nei, i lalo o tupe fesoasoani mai le malo tele.

Ina ia lelei ma mautu le a’oa’oina o fanau aoga, ua unaia i latou o lo o galulue i le ofisa o aoga o lo o umia fa’ailoga BA, Master’s ma le Doctorate Degree ina ia toe fo’i i potu aoga e a’oa’o fanau, nai lo le galulue i totonu o ofisa.

Ua maitauina fo’i tulaga manuia i le polokalame lea ua fa’atamafai ai e matagaluega eseese a le malo faleaoga ta’itasi i Tutuila ma Manu’a, ina ia mautinoa e mafai ona tali atu i so o se manaoga e tula’i mai ai i so o se taimi.

O le agaga o le malo, a lelei ona a’oa’oina fanau aoga, o le manuia fo’i lena o le atunu’u ma le malo i le lumana’i.