Ads by Google Ads by Google

Mana’omia Faalapotopotoga Tumaoti le lagolago o le atunuu

E ui o lea ua maea ona faataunuu le iloiloga faalauaitele, lea na valaauina ai le atunuu e faaali o latou finagalo i le mataupu e uiga i siitaga a le falemai, peitai o loo galulue pea nisi o Faalapotopotoga Tumaoti i le atunuu, ina ia tuu faatasia nisi o finagalo e uiga lava i lenei mataupu, ma le faamoemoe e faaoo atu i taitai o le atunuu, ina ia faavae ai nisi o a latou faaiuga e uiga i aafiaga o le atunuu ona o siitaga a le falemai.

O le itula e 12:00 i le aoauli o le aso o le a faatautaia ai se mafutaga o le a tuu faatasia e se Faalapotopotoga Tumaoti i le atunuu ua faaigoaina o le Pualele Foundation, ona o le agaga ia mafai ona tuu faatasi finagalo o le atunuu ma tuuina atu i le Fono se talosaga, ina ia faavae ai se faaiuga a taitai o le fono i le mataupu e uiga i siitaga a le falemai.

O lea fuafuaga e pei ona taua e le peresetene o le Pualele ia Lina Prendergast, o le a mafai ai ona malamalama ma manino tagata uma i siitaga ia o loo taumafai i ai le LBJ, faatasi ai ma le tuuina atu o latou finagalo e uiga i lenei mataupu.

I lana molimau i luma o le iloiloga lea sa valaauina e pulega a le LBJ i le aso Gafua o le vaiaso nei, na faailoa ai e Prendergast le leai o se avanoa e tatau ai i le LBJ ona o latou faia nei siitaga e aunoa ma le matua faamalamalama i le atunuu o le mafuaaga.

Sa ia taua e faapea, soo se tagata soifua lava, e pisi lona mafaufau pe afai e le malamalama i se mea o le a tupu pe ua uma foi ona tupu, ae afai e manino le atunuu i le uiga o siitaga, atonu e faigofie foi ona faaalia o latou finagalo.

Na taua e Prendergast, e tatau ona faailoa finagalo o le atunuu i se auala e tatau ona uia e le Fono, ina ia mafai ai ona taofia le toe tulai mai o lenei faafitauli i le lumanai.

Toe lua aso o loo totoe ona amata faamamaluina loa lea o siitaga a le falemai, lea e oo atu i le 400% le maualuluga, ona o le latou faanaunauga ia mafai e nei siitaga ona kava tupe ia o le a latou le  mauainai le tausaga faaletupe lenei 2012, lea e aofia ai tupe mai le malotele, o le polokalame a le Medicaid atoa ai ma tupe mai le malo o Amerika Samoa.

Na faaalia foi e le peresetene o le Faalapotopotoga a le ASOA lo latou teena o le taumafaiga a le falemai e sii maualuga a latou pili i le 400%.

Na taua e nisi sa i ai i le iloiloga, o le siitaga a le falemai o le a mautinoa ai le toatele o tagata e le toe o i le falemai, ae o le a nonofo lava i le fale ma taumafai e togafiti o latou gasegase.

O le vaiaso na tea nei na tusi ai le peresetene o le Senate i le kovana sili, e faailoa i ai nisi o auala o le a taumafai le fono e uia ina ia mafai ai ona fesoasoani i le faafitauli tau tupe o loo feagai ma le falemai.

O nisi o ia fuafuaga e pei ona faailoa e le afioga Gaoteote Palaie Tofau i lana tusi ia Togiola Tulafono, e aofia ai ni pili tupe ua faamoemoe le Senate e faaulu i le masina o Ianuari 2012, ma o ia pili tupe e le o faamoemoe e faatupe mai i ni lafoga, ae o nisi lava o teugatupe o loo i lalo o le vaavaaiga a le malo lea ua manatu le Fono, o le a mafai ona fesoasoani i le manaoga faanatinati o loo tulai mai i le taimi nei i le falemai, atoa ai ma se fesoasoani mo le  faaauauina pea lea o le tautua a le falemai.