Na tatalaina le ta'amilosaga i le Aso Toona'i lea ua te'a i le malae i Vaovai i Faga’alu i le 7:30 i le taeao.  Sa mafai ona ‘auai uma ‘au kirikiti e 16 a ali’i, ua fa’amoemoe e tausinio i lenei ta’amilosaga, e aofia ai le ‘au a le Fetulele 1 & 2 mai Tula, o le Mosi’ula mai i Masefau fa’apea le Lega #1 mai Poloa.

E tolu ni ‘au kirikiti a tama’ita’i o le a fili i le ta’amilosaga a le itupa a tama’ita’i, ae peita’i, e le i amataina a latou ta’aloga.

E pei ona masani ai i fuafuaga uma a le atunu’u, na ulua’i ave le “Fa’asao i le Manuvao”, e momoli ai La’au i Foga’a, e pei o lea muagagana, e ala i se saunoaga na tulei i ai le Failautusi o le Ofisa o Mata’upu tau Samoa, le afioaga i le Fa’atui ia Lefiti Pese.

Ina ua mae’a lea, ona aga’i atu lea o le Mosi’ula ma le Fetulele #2, o i latou na tala malae i lea taeao.  O le ta’aloga lona lua o le aso, na fetaui ai le siamupini o le liki kirikiti o le 2011, le Fetulele #1 ma le ‘au mai i Poloa, le Lega.

'MOSI'ULA' (49 ‘ai, 3 pe) ma FETULELE #2 (47 ‘ai, 19 pe)

E le tele se mea na fai e le Mosi'ula i le la ta'aloga ma le Fetulele #2.  Na muamua ona tata le Fetulele ae talitua’a le Mosi'ula ma sa va’aia le 'au fa'ate'a masani a Masefau, pei o Sililo, ae le tu'u se avanoa i isi fa'ate'a, o le latou taimi tonu lava lea e fa'ata'ita'i ai i le fa'ate'a, i le 'au tata a tama a le Fetulele. (A tatou va'ai fa'a-le-mafaufau i ai, o te'a a Mosi'ula ua masani i le liki, e fa'atali fa'alelei e i ai isi 'au ona fa'aaoga ai lea), ia ae pule lava le 'au i le latou fa'ate'a e fa'aaoga mai (fa'atamatama ha !ha !).

Ma'imau pe ana le tele le 'au fuamoa a le Fetulele i le taimi na ta ta ai, semanu e o'o latou 'ai i le 60. Ae peita’i, e le i taitai lava le naunau mai i le ta'aloga, i le mea na o'o i ai, e alu fo'i i ai le 'au a le Fetulele.  Sa manaia le tata a nai tama a le Fetulele, Boy e 10 ana 'ai, Robert e 8, Mike 9, Tome e 6 ma Mesi e 4, lea na maua ai a latou ‘ai e 47.

Ona sauni lea o le Mosi'ula e tuli.  E le'i tele lava i se pito, na va'aia fo'i le susuga i le faiaoga ia Loia Fa'amausili ma le tama o Faresa ua tutu mai e tamua, e pe pe ifo, ua toe 20 ia 'ai ona maua lea.

E na'o le tolu le 'au pe pe ae mae’a le ta'aloga.  E fiafia lava i le vaai atu i le tele o nai tamaiti e fiafia i le ta'aloga nei o le kirikiti, e tele isi ta'aloga e aoga ai i le vaitiami nei i le osooso 'a'e o le  latou malosi ae o lea e vaaia lava le naunau mai i le fa'aagatama a le atunu'u o le kirikti, malo le ta'alo fa'atausala.

LEGA (99 ‘ai, 19 pe) ma FETULELE #1(69 ‘ai, 19 pe)

O le tausaga ua tuana'i na fa'apea fo'i le ta'aloga tamaiti o le Lega mai Poloa ma le Fetulele #1, na matua fai fo'i e le Lega le afu a le Fetulele i le taimi ta'amilosaga se’ia o’o lava ina toe fetaui i le ‘semifinals’ e su'e ai ni 'au e ta'a’alo i le siaumupini.

Fai mai tama o le Lega, 'o le tausaga na uma ua te'a,  a o le tausaga nei lea o le a fa'asa'o ai mea na sese uma lava.

Sa fa'apea le Komiti ia ai o se tala taufa'ase'e a Tama o le Lega, ae te'i i le malosi mai o le Fetulele i ona fa'ate'a ae na su'e lava e tama o le Lega le auala e fa'afetaui ai, na alualu a, maua ane ai e 67 ae fa'ato'a 6 ia pe a le Lega.

Sa i ai le manatu i le 'au maimoa, e maua le 100 ae le'i taitai ona tata isi o le 'au a Poloa, i le fuafua atu i le alu o ‘ai nei.  A fua atu i ai i le taimi lena, tusa e 10 ‘ai a le tagata ta, ae sa le'i fa'avaivai ai le su'e mai e le Fetulele o se auala e taumafai ai le lelei o ta a tama o le Lega.

Te'i ane ua liliu le taimi e le vave ona maua mai o fa'ate'a a Fetulele le ituaiga pa'uga e ta gata i le 'au ta a tama o le Lega, lea na vave ona sui mai ai le alu i luga o 'ai a Poloa, toe sau lava i luga i le 10 'ai a le tagata ta e tasi.  Na maua e tama ia na i lalo 'ai e 13, ia 'ai e 22. I le vave ona maua mai e fa'ate'a fa'atasi ai ma le talitua e faiga o te'a e fa'aitiita mai ai le maualuga o 'ai ia na saui ai i le amataga, mafuaga lena na le o'o ai 'ai o le Tama o Lega i le selau, ae maua na'o le 99 ae uma loa a latou pe e 19.

Na fa'atalitali lava le 'au maimoa i se taumafaiga a le Fetulele i le taimi lea na tata ai, ae te'i ua gata lava i le isi tamua o Pitoau lea na taina 'ai e 18 i lona tula'i mai, a'o o le to'atele lava o tama o le Fetulele na tele ina fuamoa i le latoul tula'i mai, i le manaia o te'a a le 'au a le Lega.

Toe o le isi itu na manaia ai le 'au a le Lega, o le manaia o latou polo mamao, e fai o le isi itu i le sapo a le tama o Logo a'o le isi itu na tutu mai ai le tama o Junior e fa ana polo sapo, a'o totonu i le mulumu ma le tauloto lea na tu mai ai le tama o Fala, na leai se polo ma nisi i tua ma totonu o le malae.

O tama o le Lega na 'ai silia, Logo 22 'ai, Poe 16 'ai, Talaga 15 'ai ma Tai'ese e 12. O le talitua e polo silia ia Fala e 6, Logo  e 3 polo sapo ma Junior e 4 polo sapo. O tama o le Fetulele o Pitoau e 18 ma le tama o Shawn e 21

E le'i taitai le ta'amilosaga, e aua fo'i nei avea le faiaina muamua e fai ma mea e fa'avaivai ai, 'ia pei o le pa'u o le ulu o le maopo', e fiu lava e le mea e tau fa'agata ai, ae maua lava le auala e putu ai.

E fa'amanatu atu e faia i aso uma pei ona sau ai le tatou liki i tausaga ta'itasi i le malae i Vaovai i Fagaalu i aso uma lava, se'i vagana ai le Aso Faraile.

Ua mafai ona auina a tatou tala o le Liki Kirikiti o le Fu'a 2012, ona o le fesoasoani mai o  le kamupani a le GHC Reid Co. "Oloa