Ads by Google Ads by Google

Maliu alii 16 tausaga ona o le fa’atamala ave ta’avale

Na faaalia e Curtis Yandall, 33 tausaga mai Pago Pago i luma o le Faamasinoga Maualuga e faapea, o lona faatamala tele na mafua ai ona maliu Darren Smith Tualaulelei, lea na pa’u mai tua o lana ta’avlae, ia Tesema 29, 2010.

O Tualaulelei na manu’a lona ulu ma mafua ai ona aafia lona faiai, ma maliu ai i le lona ono o aso talu ona pau, e pei ona taua i faamaumauga a le faamasinoga.

O le aso 27 o Iulai lea ua faamoemoe le faamasinoga e lau ai le faaiuga pe talia le tali ioe a Yandall ua tuuina atu.

E lua moliaga mamafa na ulua’i tuuaia ai e le malo le ua molia, e aofia ai le fasioti tagata pa’ivalea ma le ave taavale faatautala ua mafua ai ona oo le oti i se tagata.  Ae i lalo o le maliliega lea na sainia e le ua molia ma talia e le faamasinoga, ua tali ioe ai Yandall i le moliaga lona lua lea na toe teuteu e le malo, o le ave taavale faatamala ua mafua ai le maliu o se tagata.

O le faalavelave lenei na tulai mai i le faaiuga o le tausaga e 2010 peitai na faatoa faila e le malo moliaga faasaga ia Yandall i le masina o Mati na te’a nei.

Na taua e molimau i leoleo e faapea, o Tualaulelei na tietie i luma o le taavale lea na ave e Yandall ma pau ai i lalo.

Na taumafai nisi e faia le CPR i le po na tupu ai le faalavelave, ma mafua ai ona toe te’i o ia ma toe manava.

E le’i auina atu o ia i le falema’i i le taimi na lavea ai, ae na faatoa momoli i le taeao na sosoo ai ina ua fiu e fafagu e le’i toe ala mai i luga.

I le ripoti mai le foma’i na faia le suesuega i le tino o Tualaulelei na taua ai e faapea, o se ta’e i le isi itu o lona atigipoo, na mafua ai ona to’a se vaega tele o le toto ma gaioi itutasi ai lona faiai, lea na i’u ina maliu ai lava.

Ina ua fesiligia e le alii faamasino sili ia Michael Kruse le ua molia pe na te ioeina o lona faatamala na mafua ai ona oo manu’ua ia Tualaulelei ma i’u ina maliu ai, na tali le ua molia, “ioe.”

Ua i ai manatu o loia o le a faatali le tuuina atu o ni a laua faafinauga mo se faasalaga o Yandall, se’i maea ona tapena e le Ofisa Faanofovaavaaia lana ripoti ona faatoa tuuina atu lea o ni talosaga mo se faasalaga, peitai ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena.

Ua ia iloa foi, e le mafai ona toe suia lana tali ioe ua tuu atu i le faamasinoga pe afai e tuuina atu se faasalaga a le faamasinoga ae le tusa ai ma lona mana’o.

O loo tumau pea poloaiga o loo tatala ai Yandall i tua e faatali ai le aso 27 o Iulai lea o le a toe fofogaina ai lana mataupu, ma ua fautuaina foi e le faamasinoga loia a itu e lua ina ia tapena atu foi i le aso lea mo le lauina ai foi o le faasalaga o le ua molia, pe afai ae talia e le faamasinoga le maliliega lea ua ia sainia ma le malo,

O le tamaitai loia ia Sharron Rancourt o loo tulai mo Yandall ae o le tamaitai loia sili lagolago ia Cecilia Reyna o lo o tula’i mo le malo i lenei mataupu.

tusia Ausage Fausia