Ads by Google Ads by Google

Mae’a Ni isi Fuafuaga Fa’ata’oto a le Samoa Tuna Processors

Ua fa’aalia mai le agaga fiafia o le Tri Marine, le Kamupani o lo o ua avea ma fa’amalumaluga o le Samoa Tuna Processors

O le fuafuaga fa’ata’oto ina ia toe fa’aleleia atoa le nofoaga o le pisinisi i Atu’u, le nofoaga tuai sa fa’atautaia ai pisinisi uma a le Samoa Packing, ua mae’a ona sainia pepa ma konekarate mo lea ulua’i vaega o le toe fa’afouga o le nofoaga atoa.

O le a aofia i le fa’afouga lea, o le a fausia ai le Nofoaga e fa’afulisa ai le tele o le 'oloa, po o le i’a lea e aumaia i fagotaga i totonu o le nofo'aga mo le tu’u’apa, pe fa’atau atoatoa atu i fafo i falei’a o i ai i ni isi vaega o le atunu’u mo le tu’u’apaina.

O le Kamupani ua manumalo i le tauofoga latou te faia lea vaega o le galuega, ua tula’i mai ai le kamupani a le Pacific Engineering Projects Ltd. ma e matua tele lava le vaega o le galuega atoa, e fa’atautaia lea kamupani laiti i lo tatou lotoifale. O lona uiga e toe fa’akonekarate e le PEP le tele o isi Kamupani faufale laiti mo lea fa’amoemoe, ma ua sili atu ona aoga o lea faiga mo lo tatou atunu’u.

O le taimi atofa mo le galuega e 11 masina ona mae’a lea o le galuega fou lea, ma e fausia lea nofoaga fou e tusa ma le 40,000 sikuea futu le tele, ae mafai ona teuina i ai le 5,000tone o le I’a, e toe la’uina i falei’a i fafo fa’apea fo’i ma maketi ua mae’a fa’atulaga e le Kamupani.

Ua fa’ailoa mai o le a si’itia le tulaga o le fausaga o lea nofoaga e fa’afulisa ai le i’a, aua ua aiaia i le Konekarate le fausaga ina ia fausia fa’aonaponei i le sikaili ma metotia tau fausaga o nofoaga fa’apea, i totonu ma fafo. I ona fulisa o le a fa’atutuina ai, ua mae’a fa’atulaga i le konekarate le ituaiga o lo o talafeagai uma ma aiaiga a le EPA pe o ituaiga o pusa’aisa ua fa’aaogaina metotia e agava’a mo le fa’asaoina o le si’omaga i ona vala uma o le tulafono tau tumama ma fa’ataua ai le si’omaga.

E le gata fo’i i lea, ae o le a fa’atutuina ona panele ina ia le fa’aaogaina tele ai le sapalai o le Eletise mai la tatou Kamupani Eletise, ae o le a matele ina fa’aaogaina le Malosi’aga o le La e fausia ai le eletise mo le fa’afulisaina o le i’a i lea fale ua fa’atulaga nei lona galuea’ina.

I le fa’atulagaga o lea nofoaga o le fulisa mo i’a atoatoa, o le a taula le va’a i’a ma lana uta, sau sa’o loa le i’a i totonu o le nofoaga e malu mai le vevela o le la, ae ua mae’a fa’atulaga fo’i lona fa’agasologa mai o le sotaga o le i’a e tusa o lona lapo’a, ma vaevaeina ai i nofoaga ‘ese’ese e fa’aaoga i ai! O lona uiga o le fulisa lea o le a fausia, o le uafu atoa lea a le Samoa Tuna Processors, aua ua le toe faigaluega se tasi i fafo pe afai o le a mae’a taula mai le va’a i’a ma lana uta mo le la’uina mai i totonu o fulisa mo le toe fa’avasegaina, ma le teuina fa’apitoa fa’ato’a toe la’u ai mo maketi i fafo.

Pe afai o le a toe la’uina i fafo le i’a, e na’o pusa 'oloa tetele fa’afulisa o le a toe maulu mai i fafo mai lea fulisa, mo le toe utaina atu i fafo i falei’a ua fa’avasega mo le tu’uapaina po o le fa’atauina atu i maketi.

Ua fa’ailoa mai, ua mae’a tu’uina i lalo le fale tuai sa gaosia ai le i’a tu’u’apa e le COS Samoa Packing e pei ona fa’alauiloa atu i le masina o Oketopa 2011, ma sa taumafai lava ina ia fa’aaogaina ni isi o mea e aoga mo le fausaga fou, ae ua fa’aitiitia ai fo’i le lapisi e ao ina lafoa’ia i lo tatou Nofoaga mo Lapisi lafoa’i i Futiga.

E pei ona lipotia atu, o lo o fa’aauau pea lava ona fa’atauina atu e le Samoa Tuna Products le i’a si’i atoa e ala i le Air Freight i va’alele mo Iapani ma Amerika. Ua fa’aauau pea lava ona fa’aaogaina le fulisa tele na fausia fa’apitoa mo le teuina o le i’a i le malosi o le malulu e tusa ma le -60tikeri C

E 'ese mai lea fulisa e lua ona fata ua i ai pea le fulisa i le itu i sasa’e o le lotoa i Atu’u e mafai ona teuina i ai le 2,000 tane o fagotaga a va’a fagota uma e fia la’u ese mai latou va’a a toe tu’uva’a 'ese mai mo ni Isi a latou fagotaga. O lo o ua fiafia fo’i e fa’ailoa atu, i le mamalu o le au fai va’a i’a, o lo ua i ai nei le isi uta tele o i’a fai maunu mo fagotaga o so o se ituaiga i le tatou nei falei’a, e mafai ona fa’atau.

O fuafuaga fa’ata’oto mo le fa'aleleia o le tautua a le STP mo le vaega o tatou 'au Faifaiva i Alia, o lo o ua amata lava ona galueaina, peita’i, e muamua ona fa’aleleia le apitagalu ma le uafu e taula mai i ai nei va'a fagota laiti, ma e ao ina nofouta mai le mamalu o le 'au faifaiva mo ni isi fa’asalalauga fa’alaua’itele i se taimi e le o toe mamao.