E na o upu o le agaga fa’afetai na mafai ona fa’aleo e ta’ita’i o le atunu’u atoa ai ma le Sui Failautusi o le Initeria o lo o i le atunu’u i le taeao ananafi, i le taimi na o latou saunoa ai e fa’afetaia le tautua sa mafai ona ofo atu e fitafita tuai o le taua, atoa ai ma fitafita o lo o tautua pea e o o mai i le taimi nei, i le taimi o le sauniga e aloaia ai le aso ua faapitoa mo fitafita tuai o le taua, lea sa faatautaia i le nofoaga autu o fitafita tuai i Tafuna i le taeao ananafi.

Na fa’atumulia le malae i uo ma aiga o fitafita tuai, tainane i ta’ita’i o le malo, ta’ita’i fa’aleaganu’u, ekalesia ma aoga, atoa ai ma malo mai fafo na lolofi atu latou te fia molimauina lenei fa’amoemoe taua, e pei o le sui failautusi o le Ofisa o le Initeria ia Esther Kia’aina ma sui o le ofisa na taunu’u mai i le vaiaso nei mo lana ulua’i asiasiga i Amerika Samoa.

Na taua e Kia’aina lona fiafia tele ina ua mafai ona maua le avanoa e malaga mai ai i Amerika Samoa, ma feiloa’i mai i tagatanuu o Amerika Samoa aemaise ai ona ta’ita’i.

Sa ia taua e fa’apea, o Amerika Samoa le isi teritori o le Iunaite Setete e to’atele naua ana tama fanau o lo o tautua i totonu o vaega au a le malo tele i le taimi nei, atoa ai ma le tele o tausaga ua mavae.

O le to’atele o i latou sa tautua ua avea nei ma fitafita tuai, e silia i le to’a 3,000 ua toe fo’i mai i le atunu’u ma tautua i ni isi o vaega o le malo e aofia ai le nofoaiga a kovana Lolo Matalasi Moliga ma Lemanu Peleti Mauga e pei ona i ai nei.

O ni isi o i latou na taua e le tama’ita’i sui failautusi i lana saunoaga e aofia ai le tofa a Faleomavaega Eni Hunkin; Lemanu; peresetene o le Senate ia Gaoteote Palaie Tofau; fa’amasino sili lagolago ia Lyle L. Richmond; afioga i le fa’amasino lagolago ia Fa’amausili Pomele; Utuali’i Iuniasolua Savusa; Motusa Tuileama Nua, Sonny Thompson ma Mapu Jamaias.

“O i latou uma nei faatasi ai ma le to’atele ua le mafai ona ou tolaulauina atu o latou suafa, sa mafai ona ofo atu la latou tautua e puipuia ai le saogalemu o tagata Amerika Samoa, ou te fa’apea atu i le taeao nei (taeao ananafi), malo le tautua, malo fo’i le loto nu’u, ua i’u la outou tautua mo le Iunaite Setete”, o se vaega lea o le saunoaga a Kiaaina.

O ni isi o fitafita sa tautua i vaega au a le malo tele, na a’afia i latou i manu’aga tuga, ma o manu’a nei na matua aafia ai o latou aiga, peita’i na mafai ona tutu mai o latou aiga ma lagolago malosi ia te i latou.

Na taua e le tamaitai sui failautusi lona talitonuina o le loto nuu o le toatele o fitafita tuai, e ala i le maea o le tautua ae naunau e toe fia fo’i mai i Amerika Samoa.

I le saunoaga puupuu mai le afioga i le alii kovana ia Lolo, sa ia faafetaia ai le tautua sa mafai ona ofoina atu e fitafita tuai uma i le atunu’u, e le gata o le tautua ua amanaina ai fitafita tuai, ae o se avanoa fo’i ua atagia mai ai lo latou lotonuu atoa ai ma le naunau pea e fai mea sili mo Amerika Samoa.

Sa fa’apea fo’i ona manatua ai i lea sauniga soifua o fitafita uma na maliliu i tafa o taua, a o fa’atinoina ai la latou tautua mo le malo tele o Amerika.