Ads by Google Ads by Google

Tupu le tamaoaiga malo ae ua si’itia aofa’i tagata leai ni galuega


Le Faatonusili tofia o le Matagaluega o Fefa’atauaiga ma Alamanuia a le malo ia Keniseli Lafaele. [ata AF]
ausage@samoanews.com

Ua manino i le molimau a le Fa’atonusili filifilia o le Matagaluega o Fefa’atauaiga ma Alamanuia a le malo i luma o le maota o sui i le taeao ananafi, le tupu ma ola o le tamaoaiga o le malo i le maualuga e “1.1%” talu mai le masina o Tesema 2015, fa’atusa i le tulaga pau maualalo sa i ai i le 2012 i le maualalo e “-4.3%”, pau le tulaga fa’anoanoa ua maitauina, o le  si’itia lea i luga o le pasene o tagata e le o i ai ni galuega i le maualuga e 14%.

 

I le tausaga e 2012, sa 28% le maualuga sa i ai le to’atele o tagata e leai ni galuega i le atunuu, ae talu mai le masina o Tesema 2016, na fa’aititia lea aofa’i i le 10.5%, peita’i ina ua tapunia le lala o le kamupani i’a a le Samoa Tuna Processors (STP) i le faaiuga o le tausaga na te’a nei, na toe siitia ai i luga i le 14% le maualuga ua i ai tagata e leai ni galuega, ina ua faamuta avanoa faigaluega o le silia i le to’a 700 tagata sa galulue i le kamupani.

 

Na faafetaia e le afioga i le ali’i faipule ia Vailiuama S. Leasiolagi le susuga ia Keniseli Lafaele e tusa ai o atina’e ua mafai ona fa’atutu mo le manuia o le malo, peita’i i lona talitonuga to’atasi o loo i ai, e le o taitai lava nei atina’e e fesoasoani ai i le fa’aolaolaina lea o le tamaoaiga o le malo, pe a fuafua atu i le saunoaga a le afioga i le ali’i kovana ia Lolo Matalasi Moliga i le taimi na tatala aloaia ai le Fono Faitulafono, i le tulaga “maluelue” o lo o i ai le tamaoaiga o le malo.

 

“Silasila i le fanua fa’asao a le malo i Tafuna, e fia ni kamupani fou ua mafai ona fa’atutu, ae fia fo’i ni pisinisi ua tapunia ma ua le toe tatalaina talu mai le 4 tausaga talu ai”, o le saunoaga lea a Vailiuama.

 

Ina ia mafai ona tatala le avanoa e ulufale mai ai tagata mai fafo e fesoasoani i le atina’eina o le tamaoaiga o le malo, na fautuaina e Vailiuama ia Keniseli ina ia fautua i le kovana i ni isi o auala e fesoasoani ai i le fa’atuputeleina o le tamaoaiga o le malo, e pei o le taofi lea o pemita o loo malaga mai ai tagata mai Samoa e fa’atau i Amerika Samoa, ae tatala le avanoa e ulufale mai ai tagata faipisinisi mai Upolu ma Savaii e fa’atau atu oloa i le teritori, ina ia fesoasoani ai i le tamaoaiga o le malo.

 

“Afai o lo o tali sapaia e le Faletupe a Samoa le tele o le tamaoaiga o loo maua atu i Amerika Samoa, e tatau fo’i ona tatou vaavaai i auala tatou te tali sapaia ai tupe e sasa’a mai e tagata faipisinisi a Samoa ia tatou pisinisi tau atia’e”, o le fautuaga lea a Vailiuama na talia e Keniseli.

 

Saunoa le afioga i le tama’ita’i faipule ia Vui Florence Saulo i le taua o fanua a le malo o loo lisi atu i pisinisi, lea fo’i o loo maua mai ai le isi vaega tupe tele o le malo, pau le tulaga o loo maitauina e pei ona taua i ripoti sa tuuina mai i tausaga ua mava, o loo i ai se faaletonu i le nonofo lea o pisinisi o loo latou lisiina fanua o le malo i Tafuna, ma toe lisi atu fanua ia i isi fo’i pisinisi, ona maua lea e le pisinisi o le totogi o le lisi lona lua ae misi ai le malo.

 

Saunoa Keniseli e fa’apea, e tele atina’e fou ua fuafua le malo e fausia i le fanua o le malo i Tafuna, ma o ia atina’e fou e aofia ai le fausia o se tasi o kamupani tele i le nofoaga o loo i ai Stand Taxi i Tafuna, tafatafa o le pamu kesi a le malo, ae o le a si’i atu Stand Taxi i le fanua o loo avanoa i tafatafa o le malae taalo a le malo i Tafuna, le Veterans Stadium.

 

Na taua e ni isi o le au ave taxi i le Samoa News le fa’ateia o i latou ina ua latou tauaaoina se tusi mai le Ofisa o Fefa’atauaiga ma Alamanuia, e fa’atonuina ai le aveesea o le latou Stand Taxi mai le nofoaga o loo i ai e aunoa ma le fa’ailoaina atu o le mafua’aga o lea fa’aiuga.

 

O le mae’a ai o le iloiloga ananafi, na pasia ai loa e le maota o sui tofiga a le kovana mo Keniseli, i le palota e 14-3 e avea ai o ia ma Faatonusili o le Matagaluega o Fefa’atauaiga ma Alamanuia a le malo mo le isi 4 tausaga.