Ads by Google Ads by Google

Tu’uaia se Tina i aisa e lata 2 pauna mamafa na maua Falemeli


[ata: foa'i]
ausage@samoanews.com

O le Tina talavou lea ua tu’uaia e le malo i le mataupu lea na maua ai i le Falemeli i Fagatogo se vaega o le pauta o le aisa e lata i le 2 pauna le mamafa, na ia fa’ailoa i Leoleo sa su’esu’eina lenei mataupu, o lona mana’o na te maua se vaega tupe tele i se auala vave na mafua ai ona ia fa’atauina mai lea vaega tele o le aisa mai se tagata e le i feiloa’i muamua lava i ai.

 

E tasi le moliaga mamafa lea ua tu’uaia ai e le malo le Tina talavou ia Mele Moimoi Mapu, o le moliaga lea o lona umia fa’asolitulafono o se vaega o le pauta fa’asaina o le aisa ma le fa’amoemoe e tulei ma fa’atau atu i isi tagata.

 

O lea moliaga, e mafai ona fa’asalaina ai se tasi i le toese mo le umi e le silia i le 10 tausaga, po o le fa’asala foi i se salatupe e le silia i le $10,000, po o le fa’asala fo’i i fa’asalaga uma nei e lua.

 

O le tama’ita’i loia sili lagolago ia Kristy Dunn sa tula’i mo le malo i le iloiloga sa fa’ataunu’uina ananafi, ae o le tama’ita’i loia fautua ia Kate Hannaher sa tula’i mo le Tina ua molia ia Mapu.

 

O le aoauli ananafi na fa’ataunu’uina ai se iloiloga fa’apitoa o lenei mataupu i luma o le Fa’amasinoga Fa’aitumalo, ma maua ai le avanoa o le afioga i le Tama’ita’i Fa’amasino le tumau ia Gwen Tauiliili-Langkilde na te iloiloina ai mau na tu’uina atu e le malo, pe mafai ona lagolagoina ai tu’uaiga ua soli se vaega o le tulafono, o Mapu fo’i lea o lo o tu’uaia i le soliina o le tulafono.

 

E tusa ai ma fa’amaumauga a le fa’amasinoga o lo o taua ai e fa’apea, o le aso 7 o le masina lenei o Iulai na tula’i mai ai lenei mataupu, ina ua masalomia e sui o le Ofisa o Tiute se afifi na ui atu i le Falemeli i Fagatogo, o lo o i ai vaega o fualaau fa’asaina, ina ua fa’ailoa atu e se Ta’ifau (K-9) ua mae’a ona a’oa’oina fa’apitoa i le sailia o fualaau fa’asaina, ma logo ai loa e sui o le Ofisa o Tiute le Ofisa o Leoleo mo se fesoasoani, ma tofia ai loa le ali’i Leoleo Su’esu’e ia Det. John Seumanutafa na te su’esu’eina lenei mataupu, o ia fo’i lea sa avea ma molimau a le malo i le ulua’i iloiloga o lenei mataupu sa faia i luma o le Fa’amasinoga Fa’aitumalo i le aoauli ananafi.

 

Na taua e Det. Seumanutafa i lana molimau e fa’apea, i se taimi o le so 7 Iulai e pei ona taua, na alu atu ai le ua molia e piki mai sana afifi mai le Falemeli i Fagatogo, le afifi lea ua masalomia o lo o i ai vaega o fualaau fa’asaina i totonu.

 

Saunoa atili Det. Seumanutafa e fa’apea, ina ua fesiligia e sui o le Ofisa o Tiute le ua molia po o a mea o lo o i totonu o le afifi, na fa’ailoa i ai e le ua molia o aisa. Ae ina ua maua fo’i le avanoa na te fesiligia ai le ua molia poo a mea o loo i totonu o le afifi na alu atu e piki mai, sa fa’ailoa atu fo’i e Mapu ia te ia, o aisa o loo i totonu o le afifi.

 

Na fua e Det. Seumanutafa le mamafa o le afifi ma iloa ai, e tusa lona mamafa ma le tasi le pauna, 10 aunese. Ina ua fesiligia le ali’i Leoleo i le tau e mafai ona fa’atau ai lenei vaega tele o le aisa i Amerika Samoa, na taua ai e Det. Seumanutafa e tusa ma le $90,000 pe a fuafua i le tulaga lea ua i ai le maketi o fefa’atauaiga o fualaau fa’asaina i le taimi nei.

 

Na taua e Mapu i Leoleo e fa’apea, o se tagata sa la masani i luga o le Facebook na ia fa’atauina mai ai le vaega tele lenei o le aisa i le tau e $800.

 

Na taua atili e le ua molia i Leoleo e fa’apea, o le tagata lea sa ia fa’atauina mai ai le vaega tele lenei o le aisa, e le gata e le masani i ai, la te lei feiloa’i muamua fo’i, ae na te le iloaina po o fea le atunu’u o le lalolagi e nofo ai, ae na mafua ona ia fa’atauina mai lenei vaega o fualaau fa’asaina, o lona mana’o i se auala vave e maua ai sana tupe.

 

Na taua atili e Mapu i Leoleo la fetusiaiga sa faia ma le tagata na aumai ai fualaau fa’asaina, lea e aofia ai imeli atu o le isi i le tasi, fa’apea ai ma le fa’atinoina o isi uiga le manuia e ala i le fetufaai o ata mataga (sex photos), ma o nei faiga uma e le i iloa e lona to’alua.

 

Na taua atili e Det. Seumanutafa i lana molimau e fa’apea, na avea lona talosagaina o Mapu mo se avanoa e alu ai i totonu o lana itulau Facebook, ina ia mafai ai ona fa’amaonia lana fa’amatalaga ua tu’uina atu, ma itu na toe suia ai loa lana fa’amatalaga ma ia fa’ailoa atu ai, o lana fa’amatalaga muamua sa tu’uina atu e pepelo uma.

 

O agava’a a le susuga a Det. Seumanutafa i le avea ai ma Leoleo mo le silia i le 7 tausaga, atoa ai ma le silia i le 100 mataupu e fa’atatau i le umia fa’asolitulafono o fualaau fa’asaina ua ia su’esu’eina, o se tasi lea o tulaga na taua e le malo sa fesoasoani atili ai i le tu’u fa’atasia o lenei mataupu.

 

Ae ui i le fesiligia e le loia a Mapu o agava’a o le Ta’ifau K-9 atoa ai ma sui o le Ofisa o Tiute, ma le auala na mafua ai ona maua fa’ailoilo e fa’atatau i fualaau fa’asaina sa i totonu o le afifi, na taua e le afioga i le Tama’ita’i Fa’amasino ia Tauiliili-Langkilde le fa’amalieina o le faafofoga a le fa’amasinoga i mau sa tu’uina atu e le malo, e lagolagoina ai le soli o se vaega o le tulafono, ma poloaina ai loa le tofu atu o le mataupu a Mapu i luma o le Fa’amasinoga Maualuga e fa’aauau ai isi ana iloiloga o lo o mulimuli mai.

 

O lo o tumau pea tuutuuga o lo o tatala ai Mapu i tua mai le toese i Tafuna, e fa’atali ai lana iloiloga lea ua fa’atulaga e faia i le itula e 9:00 i le taeao o le aso Faraile o le vaiaso nei.