Ads by Google Ads by Google

Tu’uaia se ali’i i lona fa’aaoga fa’asolitulafono o se fana

ausage@samoanews.com

O le Tama e 70 tausaga le matua mai Vaitogi lea o lo o tu’uaia i lona fa’aaoga o se a’upega malosi poo se fana, e fa’afefe ai se isi ali’i na la vevesi e fa’atatau i le fanua, sosoo ai ma lona fa’apapa o le fana i luga o le ea, ua tu’uaia nei o ia e le malo i moliaga e 3, lea e aofia ai le moliaga mamafa e tasi o lona fa’aaoga fa’asolitulafono o se a’upega malosi, fa’apea ai ma moliaga mama e lua o le fa’atupu vevesi i nofoaga faitele, atoa ai ma lona umia o se fana e le i laiseneina.

 

O le aso Gafua na te’a nei na tula’i ai Falaniko Fiso Jr i luma o le fa’amasinoga fa’aitumalo mo le ulua’i taimi, ma ua toe tolopoina nei lana mataupu e toe fofogaina i le aso Tofi o le vaiaso nei, mo le fa’atulagaina o le taimi ma le aso e fa’ataunu’u aloaia ai lana ulua’i iloiloga.

 

E $1,000 le vaega tupe lea ua fa’atulaga e le afioga i le ali’i fa’amasino ia Fiti A. Sunia e totogi, ona fa’atoa mafai lea ona tatala le ua molia i tua. Na fa’ailoa e le ali’i fa’amasino ia Fiso Jr le mae’a lea ona ia totogiina o le $500, lona uiga, toe $500 e tatau ona totogi ona tatala loa lea o ia i tua e fa’atali ai taualumaga o lana mataupu.

 

Na fa’ailoa atili e le ali’i fa’amasino ia Fiso Jr e fa’apea, afai e mafai ona ia totogiina le $500 o lo o totoe, e tatau ona vave totogi atu ina ia mafai ai ona fa’agaioi tulaga uma e moomia mo le sainia o le pepa e tatala ai o ia i tua, ae le i ta le itula e 4:00 i le afiafi o le aso lea (aso Gafua), ona e le mana’omia le Fa’amasino e nofo ai lava i le Ofisa seia aulia le itula e 4:00 i le afiafi.

 

Mulimuli ane na toe sui le saunoaga a le ali’i fa’amasino ma ia saunoa e fa’apea, o lana tala sa tu’uina mai, ua na o se tala lava e fa’afiafia ai le aofia, ae o le Fa’amasino lava ia e maua lava i le Ofisa seia oo i le itula e 4:00.

 

Afai ae mafai ona tatala Fiso Jr i tua mai le toese, ua poloaina o ia e le fa’amasinoga ina ia aua ne’i ona toe umia ni a’upega mata’utia, fa’asa ona ia toe fa’atupuina se vevesi, a ia avea o ia ma tagatanu’u lelei e tausisi i tulafono uma a le malo, ma ia auai fo’i i taimi uma e valaau ai ana iloiloga.

 

O le mataupu e pei ona tu’uaia ai Fiso Jr e le malo, na alia’e mai i le fa’aiuga o le vaiaso na te’a nei i Vaitogi, ina ua talosagaina e le ali’i na a’afia se fesoasoani a Leoleo i le taimi na alu ai e asi lona fanua o lo o nofoia e ni tagata na te le iloaina.

 

E tusa ai ma fa’amaumauga a le fa’amasinoga, ua fai si umi o tula’i mai pea le fa’afitauli lenei i le va o Fiso Jr ma le ali’i o lo o tagi i lenei mataupu, ona o le fale a lona to’alua i Vaitogi.

 

Na taua i fa’amaumauga a le fa’amasinoga e fa’apea, e fetaui lava le mae’a ona fa’afeso’ota’i e le ali’i na a’afia o le Ofisa o Leoleo mo se fesoasoani, ae ona vaaia loa Fiso Jr ua oso mai i fafo o lona fale, ma ee atu ia te ia fai mai, na te fasiotia soo se tagata e tu atu i lona fanua, sosoo ai loa ma lona fa’apa fa’alima o lana fana aga’i i le ea.

 

Na taua e le ali’i na a’afia i Leoleo le faalatalata atu o Fiso Jr ia te ia ma ta’i atu le fana ia te ia ma fa’afefe o ia, i lona fanaina lea o ia pe afai e le alu ese ma le fanua.

 

E fetaui le taunu’u o Leoleo i le nofoaga na tula’i mai ai le fa’alavelave ae vaaia loa le ta’avale a Fiso Jr o le a alu ese, o lea na fa’anatinati atu ai Leoleo ma latou taofia loa le ua molia ma lana ta’avale, ona o loo i ai ni fesili e fia fesiligia ai o ia e tusa ai o lenei mataupu, lea fo’i na ioe i ai le ua molia ma usita’i i fa’atonuga uma sa tu’uina atu e Leoleo.

 

Na fa’aalia atili e le ali’i na a’afia i leoleo le fa’afefe lea e le ua molia o ia ma lona aiga atoa, i lona fasiotia o i latou pe afai latou te le o ese ma le fanua, ae ina ua fesiligia e Leoleo ia Fiso Jr e tusa ai o tu’uaiga fa’asaga ia te ia, sa ia matua teena ai lona fa’apaina o se fana, atoa ai ma lona teena o lona faia o ni folafolaga e fasiotia ai le ali’i na a’afia ma lona aiga.

 

Na malie le ua molia e tu’u atu le fa’atanaga i Leoleo latou te sailiina ai lona fale, aemaise ai sa ia taua le leai o se fana o ia te ia, ae ina ua saili e leoleo le fale, na latou maua ai se fana o le ituaiga o le .22 o lo o i totonu o se tama’i ato uliuli, o lo o i ai ma se pusa ututau, fa’apea ai ma le fana ua mae’a ona utu i pulu fana.

 

O le mae’a ai ona taulima e Leoleo o fa’amatalaga uma mai le aiga na a’afia i lenei fa’alavelave, atoa ai ma le itu a le ua molia, fa’atasi ai ma le a’upega na maua i le fale, na faia ai loa le fa’aiuga ina ia taofia fa’apagota Fiso Jr i le toese i le po lea, e fa’atali ai le aso e tula’i ai i luma o le fa’amasinoga, ona o le puipuiga lava i le saogalemu o aiga e lua.