O le taeao nei lea ua fa’amoemoe e tula’i ai i luma o le Fa’amasinoga Maualuga le ali’i faigaluega mai le Ofisa o le Tiute a le malo, lea o lo o tu’uaia i le mataupu lea na maua ai vaega o fualaau fa’asaina o le mariuana o aumai fa’anana mai le va’alele a le Hawaiian Air i le masina o Mati o le tausaga nei, ina ua fa’amalieina le fa’amasinoga i mau fa’amaonia sa tu’uina atu e le itu a le malo i se iloiloga sa faia i le aoauli ananafi, e fa’amaonia ai sa i ai se vaega o le tulafono sa soli i lenei gaioiga.

O moliaga e pei ona molia ai e le malo le susuga a Titifalaula Siaumau e aofia ai lona aumai mai lea i le atunu’u o vaega o fualaau fa’asaina (import of controlled substance - marijuana), fa’apea ai ma le moliaga o lona fesoasoani lea i se isi tagata i le tufatufaina atu o fualaau fa’asaina (conspiracy to distribute controlled substance - marijuana).

O le masina na te’a nei na faila ai e le malo la latou tagi fa’asaga ia Siaumau, peita’i na solofua e le fa’amasinoga fa’aitumalo, ina ua le mafai e le malo ona tuuina atu mau fa’amaonia talafeagai e mafai ai ona lagolagoina moliaga fa’asaga ia Siaumau, peita’i o le vaiaso na te’a nei na toe faila ai loa e le malo lenei mataupu ma fa’ataunu’uina ai loa le ulua’i iloiloga i le aoauli ananafi.

O molimau e to’alua a le malo sa valaauina i le ulua’i iloiloga e aofia ai le ali’i leoleo su’esu’ega sa gafa ma le su’esu’eina o lenei mataupu, susuga Det. John Paselio fa’apea ai ma le ali’i faigaluega a le kamupani la’uuta a le CSL Cargo Services ia Felix Penerosa lea sa fa’atuatusi mai ai le afifi na aumai fa’anana ai mariuana i le malaga a le Hawaiian Air i le po o le aso 27 Mati 2017, i le mamafa e tusa ma le 5 pauna, poo le silia atu fo’i i le $20,000 lona tau pe a fa’atauina atu i tagata.

E pei ona manino i fa’amatalaga tauto a molimau e faapea, o se taimi o le masina o Fepuari 2017 na aga’i atu ai Siaumau ma talanoa ia Penerosa, mo se fesoasoani i le aumaia o lana afifi mai Kalefonia, ae ina ua fesili i ai Penerosa poo le a lea afifi, na tali le ua molia o se sipika.

Na fa’ailoa e Penerosa ia Siaumau auala e mafai ona faia e aumai ai lana afifi mai fafo, e aofia ai le igoa o le tagata o lo o lafo mai ai le afifi, atoa ai ma le igoa o le tagata o le a ia pikiina le afifi, ae i le fa’aiuga o ia talanoaga, na malie ai loa Penerosa e fa’atuatusi mai i lona igoa le afifi ina ia fa’a faigofie ai feuiaiga o le afifi pe a aumai, ina ua musu Siaumau e tusi ai lona igoa,

A o le i taunu’u mai le afifi, na taua e Penerosa le le misi o le vili atu o Siaumau ia te ia e siaki atu poo lelei tulaga uma e uiga i le afifi o loo fuafua e aumai, lea fo’i sa ia tali atu i ai o loo lelei mea uma, ae ina ua taunu’u mai le afifi ma maua ane o mariuana o loo i totonu, na taua e Penerosa lona fiu e toe fa’atali se telefoni atu ai Siaumau.

Ina ua mae’a ona fesiligia e leoleo ia Penerosa i le po lava lea e fa’atatau i le afifi ma fualaau fa’asaina sa maua ai i totonu, na taofia ai loa o ia i le toese mo le 48 itula, ao fa’agasolo suesuega a leoleo, peita’i na manino i le molimau a Penerosa i luma o le fa’amasinoga, na te lei iloaina o ni fualaau fa’asaina o loo i totonu o le afifi.

Ae i le molimau a Det. Paselio, sa ia taua ai lona maua o ni fa’amaumauga mai le Ofisa o Tiute atoa ai ma le Puipuiga Fa’alotoifale (US-DHLS) a le malo tele mai le malae va’alele i Kalefonia, pepa e fa’amaonia ai le malaga atu o Siaumau i Kalefonia ma se tinoitupe e $12,000.

Ua maua fo’i e le malo e fa’apea, o le malaga lea a Siaumau sa fa’amautu ai i le fale o se ali’i e suafa ia Toese Asiata i le aai o Sacramento, ma o loo masalomia o iina lea na aumai ai e Siaumau le afifi sa maua i ai vaega o fualaau fa’asaina.

Na taua e le loia a le malo ia Gerald Murphy e faapea, o le $12,000 lea na alu atu ma Siaumau, sa fa’atau mai ai vaega o fualaau fa’asaina lea na aumai i le malaga a le va’alele i le po o le aso 27 Mati 2017, lea fo’i na aumai i le igoa o Felix Penerosa, ae o le igoa o le tagata na lafo mai ai atoa ai ma le tuatusi o Toese Asiata.

I le mae’a ai ona iloilo e le fa’amasinoga o mau fa’amaonia sa tu’uina atu e le malo, na fa’amalieina ai loa le fa’amasinoga ua lava mau sa tu’uina atu e le malo e lagolagoina ai la latou tagi ua faia fa’asaga i lenei mataupu, ma ua tofu atu nei i le fa’amasinoga maualuga le mataupu a Siaumau e fa’agasolo ai le aso o lana fa’amasinoga autu po o le faia fo’i lea o se maliliega ma le malo e fa’amuta ai loa taualumaga o lenei mataupu.

O lo o tumau pea tuutuuga o loo tatala ai Siaumau i tua e fa’atali ai taualumaga o lana mataupu. O le tama’ita’i loia ia Sharron Rancourt o lo o tula’i mo ia i lenei mataupu.