Ads by Google Ads by Google

Tofu Fa’amasinoga le mataupu Alii ma Faipule o Pago Pago


Le tofa Tuaolo Meko Aiumu, o lona tausi atoa ai ma se tasi o Tina i le mae’a ai o le iloiloga sa faia i le vaiaso na te’a nei. [ata AF]

Le afioga i le Maoputasi ia Mauga T. Asuega, o lona faletua atoa ai ma le loia a le afioaga i Pago Pago ia Charles Alailima ina ua mae’a iloiloga i le vaiaso na te’a nei. [ata AF]
ausage@samoanews.com

Ua i luma nei o le Fa’amasinoga Maualuga le mataupu i le va o le tofa Tuaolo Meko Aiumu fa’asaga i le Puleaga mamalu a Alii ma Faipule o le afioaga o Pago Pago, ona o le mataupu e pei ona taofia ai lona toe maua o fa’amanuiaga tau tupe mai fanua a le afioaga o lo o lisi atu i le malo.

 

O le vaiaso na te’a nei na faia ai le iloiloga lona lua o lenei mataupu, ma ua toe tolopo mo le isi 45 aso.

 

O le mataupu e pei ona iloiloina i luma o le fa’amasinoga, o se talosaga a Tuaolo i le fa’amasinoga, mo sana poloaiga e taofia ai Alii ma Faipule o Pago Pago mai le fa’aauau ona aveese o lona igoa mai le lisi o aiga e agava’a i fa’amanuia tau tupe mai le lisi ma le Ofisa o le Paka Fa’asao, ae fa’aauau pea le tulaga e pei ona sau ai i tausaga ua mavae se’i vagana ua toe tuuina atu se isi faaiuga a le fa’amasinoga.

 

O le ali’i loia ia Togiola T. A Tulafono o lo o tula’i mo Tuaolo, ae o le ali’i loia ia Charles Alailima o lo o tula’i mo Alii ma Faipule o Pago Pago.

 

E pei ona manino i fa’amatalaga ua i luma o le fa’amasinoga, o lo o fa’atuiese Tuaolo i le fa’aiuga ua faia e le Pulega a Alii ma Faipule, i le aveesea fa’afuase’i lea o lona igoa poo le igoa o lona aiga mai le lisi o aiga e agava’a i fa’amanuiaga tau tupe o lo o maua mai i le lisi.

 

Ina ua molimau Tuaolo i luga o le nofoa molimau, sa ia faailoa ai i le fa’amasinoga, o ia o se matai ua uma ona lesitala i totonu o Pago Pago mo le umi ua tusa nei ma le 10 tausaga. Talu mai lava lea taimi umi, sa fa’aauau pea ona ia maua fa’amanuiaga tau tupe sa maua mai i le lisi o fanua ma le Vaega o Paka Fa’asao.

 

Na fesili le ali’i loia ia Alailima ia Tuaolo, pe na te silafia le mafua’aga ua ala ai ona le toe agava’a o ia mai lea fa’amanuiaga tau tupe, na tali Tuaolo, na te le iloaina, pau le tulaga ua ia maua, ua aveese lona igoa mai le lisi e aunoa ma sana agasala na fai.

 

Na fesiligia atili e Alailima ia Tuaolo pe sa i ai se taimi na la feiloa’i ai ma le afioga i le matua ia Pulu Ae Ae Jr e uiga i le mataupu o lo o tula’i mai i le va o ia ma le afioaga, na saunoa Tuaolo o lea lava.

 

Saunoa Tuaolo e fa’apea, e fa’a 4 ona afio atu Pulu ma la talanoa, o lana saunoaga ia te ia, o lo o finagalo Mauga e alu atu la te talanoa. Ae sa ia fa’ailoa ia Pulu, e le mafai ona alu atu e talanoa ma Mauga ona o le mataupu lea ua i luma o le fa’amasinoga.

 

I le mae’a ai o se fonotaga i le va o ali’i Fa’amasino ma ali’i loia e uiga i lenei mataupu, na tu’uina mai ai loa e le fa’amasinoga lana fa’aiuga.

 

E lua faaiuga sa tuuina mai e le fa’amasinoga e uiga i lenei mataupu, e le gata ua tolopo le mataupu mo le isi 45 aso, ina ia maua ai le avanoa o loia e faila atu ai se isi ripoti fou e faatatau i le tulaga o le a taoto i ai lenei mataupu, atoa ai ma le fautuaina lea o itu e lua ina ia taofia le toe taumafai e fofo le mataupu i tua e aunoa ma le aofia ai o ali’i loia.

 

Saunoa le afioga i le fa’amasino sili ia Michael Kruse e fa’apea, e foliga mai i fa’amaumauga ua i luma o le fa’amasinoga, o lea sa taumafai le isi itu e tau fai se leleiga ma le isi itu, e aunoa ma le silafia e le loia a Tuaolo.

 

E manatu le fa’amasinoga, afai e i ai se leleiga e fuafuaina mo lenei mataupu, o lea leleia e fa’atinoina lea i auala a le fa’amasinoga, ae le o auala fa’aalatua e pei ona tula’i mai.

 

Saunoa atili fo’i Kruse e fa’apea, afai ae toe i ai se isi taumafaiga faapea e tula’i mai i le lumana’i, o le taumafai e saili se leleiga e aunoa ma le silafia e loia, e ono aafia ai se tasi i se faaiuga mai le fa’amasinoga.

 

Ina ua fesiligia e le Samoa News le afioga i le Maoputasi ia Mauga i fafo o le fale faamasino e uiga i lenei mataupu, sa ia taua ai e fa’apea, o le a vaavaai i  se auala e toe fa’aleleia ai tulaga e pei ona tula’i mai i totonu o le afioaga.

 

Saunoa atili Mauga e fa’apea, e faapea lava tulaga o aiga ma afioaga a Samoa, e i ai taimi e tutupu ai faafitauli ma feeseeseaiga, ae fofo lava e le alamea le alamea e pei o lea fo’i muagagana a le atunu’u.