Ads by Google Ads by Google

Tofiga fou mo le Kalapu a le Liona i Pago Pago


Peresetene fou o le Kalapu a le Liona i Pago Pago, Lisa Tautalatasi Tuatoo, i le taimi o lana saunoaga i se fa’atasiga sa faia i le DDW Cafe i le afiafi o le aso Faraile ua te’a. [ata: Leua Aiono Frost]

O se vaaiga ia i latou na fa’atasia i le afiafi e fa’atula’ia ai tofiga fou mo le Kalapu a le Liona i Pago Pago i le DDW Cafe I Utulei I le afiafi o le aso Faraile na te’a nei. [ata: Leua Aiono Frost]

O le afiafi o le aso Faraile i le DDW Restaurant i Utulei sa fa’ataunu’u ai le suiga o tulaga tofi o le Kalapu a le Liona i Pago Pago e afua mai le Peresetene ma lana laulauatofi i le sui peresetene, failautusi ma le teutupe ae maise le Komiti Fa’afoe fou mo le 2017-18.

 

O le tofiga peresetene lea sa tula’i ai Chris King, ua soloa’i atu i ai le tama’ita’i o Lisa Tautalatasi Tuato’o, Sui Peresetene #1 Tafaimamao Tupuola, Sui Peresetene #2 Ty Matyjkowsky, Failautusi o Ponita Laussen ma le teutupe fou o lenei tausaga o Phil Edin.

 

O le fa’atonu mo Sui Totino o le susuga Mike Sala ma o le sui e avea ma Tail Twister o Liona Charmaine Falea’ana a’o le sui e avea ma Lion Tamer o Burg Salanoa. E to’afa isi fa’atonu e fa’atulafonoina e piki mo tausaga ta’itasi ua filifilia ai Larry Sanitoa, Joey Cummings, Boem Kim ma Andrew Berquist ma ua toe aofia ai fo’i le ali’i fa’ato’a maea lona tofi, Chris King.

 

O le to’atele o lenei Komiti Fa’afoe 2017-18 o le au talavou lava, ma ua fa’ailoa fo’i e Tuato’o, “Ua ou fiafia o lo ua va’aia e matua vae vave lava i latou o le a matou galulue. Ua i ai fo’i Liona matutua e fa’ato’ato’a maia i matou, ae o le galuega e tatau ona fa’atino fa’a-Liona mea uma o le a alo atu e faia.”

 

O le Kalapu a le Liona ua tele tausaga o alofagia e i latou le atunu’u e ala i va’aiga, po’o tioata faitau tusi a le mamalu o le atunu’u. O nisi ia o latou poloketi ua matua numera muamua i le lisi a tagata lautele, pe a o’o ina tatala avanoa e maua ai ni tioata faitautusi ona e le totogia! O le isi galuega e masani ona latou fa’atupeina se asiaiga a Foma’i Fa’apitoa i gasegase ua to’atele tagata ua a’afia ai, ma e talavai fua fo’i le mamalu lautele.

 

O le susuga ia King ua fa’atolu ai lea ona tula’i o ia i le tofi, ma ua fa’ailoa fo’i e le fofoga o le polokalama i lea afiafi, Liona Vaito’a Hans Langkilde, “O le tama sa’o lava lenei e ona le Kalapu o ia o Lion King! E talafeagai lava ia te ia ona tula’i i le tofi lea, peita’i, e fa’afetaia o ia i le tele o tausaga na te tula’i ai ma faia ona tiute ua fa’atulaga e le Kalapu e ao ina ia fa’atino. Fa’afetai mo lau tautua, Liona Chris King.”

 

Taua e Tuato’o lona agaga fiafia, ona ua faliu le Kalapu a le Liona e tofia lona sui fa’atauva’a i lenei tofiga maualuga.

 

“O lo ua mae’a ta’u mai matata ma galuega e fa’atino e so’o se tasi e tula’i i le tofi, e le faigofie ae tasi le mea ua ou iloa, e ao ina ou faia i le malosi, se malamalama ae maise o le agaga tonu o le fia tautua mo so’o se tagata, ma fa’atino poloketi masani ua mae’a fa’atulaga, taumafai foi e saili nisi poloketi fou e fa’atula’i, ma fa’amaoni e faia ma le fiafia,” o a Tuato’o lea.

 

Sa ia fa’afetaia le galuega sa gapatia mai ai le ta’ita’iga ua mavae nei, ma ua ia fa’afeiloa’ia fo’i lana komiti fa’afoe fou o le a latou galulue fa’atasi ma ia lu’ia fo’i i latou ina ia ola galulue malosi ma le fa’amaoni e pei ona tamau ai e le Kalapu a le Liona latou ta’ita’i ma tiute latou te fa’atino.

 

Talu mai le tausaga 1982 - 83 lea na fa’ato’a fa’atula’ia ai lenei Kalapu a le Liona i Pago Pago, o le lona 36 ai lenei o peresetene ia Tuato’o. O le ulua’i tama’ita’i na avea ma peresitenei le tausaga e 1995-96 o ia lea o Trudy Iuli Sala.

 

I le tauaofaiga fo’i o lea afiafi mo le Kalapu sa toe tolaulauina lava le sini o galuega fa’atino uma a i latou e ao ina faia i so’o se atunu’u e fa’atula’ia ai le Kalapu a le Liona.

 

Saunoa Tuato’o “E lalamua i mea uma, ia tatou ola tautua, fa’amasani ma fesoasoani atu, o ‘auga ua loa ona galulue mai ai le tatou Kalapu, tau lava ina so’oula fo’i lenei nofoaiga i galuega o lo’o fa’aauau pea, ia aua ne’i motusia, ae ia fa’alautele ma fa’aleleia atili!”

 

I galuega ua lisia sa fa’atino i le tausaga ua mavae ua mae’a: Mulumuluga Veve: O se polokalama sa latou fesoasoani i ai fa’apa’aga ma le DYWA. Tausoa faatasi ma le Special Olympics e fa’atino a latou tautua fa’atasi ai ma le UCEDD.

 

Na fa’aauau le latou tautua i le ofoina atu o Mata Tioata po’o Va’aiga i le mamalu o tagata matutua fa’atasi ai ma i latou e i ai mana’oga fa’apitoa i le UCEDD. Sa siakia fo’i a latou va’aiga i lea lava tautua.

 

Na fa’ataunu’u fo’i le latou sao mo le foa’i o Mea Taumafa mo le Vaitau o le Eseta ia Aperila  2017. Na faao’o nei foa’i i le Nofoaga o sala mo fanau talavou atoa ma nisi o Aiga sa tele le mana’omia e pei ona faao’o mai i le Kalapu a le Liona e le DHSS i le vaitau o le Eseta.

 

Na faatino le latou Galuega Fa’amama i le Earth Day ma sa latou fa’amamaina ai le matafaga e tusa ma le 300 pauna o le atigiapa ma otaota o ipu pepa sa aoina mai i matafaga na fa’atulaga e le ASEPA mo i latou e galulue ai.

 

Na faia lo latou sao i Sikauti  i le msina o Aperila ma apitaga i latou i Faga’alu ma sa latou taua’aoina ai le $200 mo fesoasoani masani e fa’atupe ai mea e mo’omia e le Sikauti i le latou Jamboree Camp.

 

I le masina o Me sa latou foa’ia ai meaalofa mo le fa’ailoga na taua’aoina mo le tama matua o Pulefa’asisina Palauni Tuiasosopo mo le fa’amauga o lana tautua matavela mo le malo o Amerika Samoa. O lea fa’ailoga na taua’aoina i le vaiaso mo Tama ma Tina Matutua a le TAOA i le Malae o le Su’igaula ale Atuvasa i Utulei.