Ads by Google Ads by Google

Tofia David Vargas e avea ma Loia Tuto’atasi (IP)


[ata: foa'i]
ausage@samoanews.com

Ua fa’amaonia mai e le ali’i loia ia David Vargas i se fa’atalatalanoaga ma le Samoa News i le aoauli ananafi, le tofia aloaia o ia e le Fa’amasinoga Maualuga a Amerika Samoa e avea ma Loia Tuto’atasi (Independent Prosecutor - IP).

 

E le i mafai e le susuga a Vargas ona fa’alauiloa auiliili mai i le Samoa News tulaga uma o le fa’aiuga a le fa’amasinoga na fa’avae ai le tofiaina o ia, ae o a fo’i mataupu lea ua tofia o ia e le Fa’amasinoga na te su’esu’eina ma fa’amasinoina.

 

“Pau le tulaga e mafai ona ou fa’ailoa atu i le taimi nei, ioe, o lea ua tofia a’u e fai ma Loia Tuto’atasi (IP) mo le su’esu’eina o ni isi o mataupu ua fa’atonuina a’u e le fa’amasinoga e su’esu’e”, o le saunoaga lea a Vargas.

 

Sa ia taua atili le tele o le galuega lea o le a ia aga’i atu i ai, e aofia ai le tu’u fa’atasia o fa’amatalaga uma e uiga i mataupu ua tofia o ia e su’esu’e ma faila i le fa’amasinoga.

 

O se taimi o le vaiaso nei e pei ona taua e Vargas ua fa’amoemoe la te feiloa’i ai ma le Komesina o Leoleo, mo le fa’amaninoina o ni isi o vaega e uiga i lenei mataupu.

 

“E tele naua isi vaega e tatau ona iloilo muamua, e le gata o le tu’u fa’atasia o fa’amatalaga e uiga i nei mataupu, ae fa’apea fo’i le taumafai e fesiligia ma faatalatalanoa molimau, e le o se galuega e puupuu se taimi e fa’atinoina ai”, o le saunoaga lea a Vargas.

 

E pei ona lipotia e le Samoa News i se vaitaimi e le’i mama’o, se fuafuaga a le Loia Sili e tofia se Loia Tuto’atasi ina ua le mafai e le Ofisa a le Loia Sili ona su’esu’e ma molia ni isi i mataupu e 2 ua mae’a ona su’esu’eina e le Ofisa o Leoleo, o le mataupu lea fa’asaga i le Pule o tagata faigaluega a le Ofisa o le Kovana, le tofa Fiu Saelua, atoa ai ma le mataupu fa’asaga i le Fofoga Fetalai o le maota o sui, tofa i le Tau Tootoo ia Savali Talavou Ale.

 

I se fa’atalatalanoaga ma le Loia Sili a le malo i le masina na te’a nei, na fa’amaonia mai ai e Talauega Eleasalo Ale le tauaao lea e lona Ofisa o ripoti a Leoleo e fa’atatau i mataupu ia lua, peita’i e le mafai ona latou moliaina i latou o lo o faia faasaga i ai nei tu’uaiga, ona e i ai tulaga e fete’ena’i ai i lalo o le tulafono.

 

Na taua e Talauega e fa’apea, soo se mataupu lava e faia fa’asaga i ta’ita’i o le malo poo ni isi e umia tofiga maualuluga i le malo, e le mafai e le ofisa a le Loia Sili ona su’esu’e ma molia i latou o lo o a’afia ai, ae taoto atu i le fa’amasinoga mo le tofiaina o se Loia Tuto’atasi.