Ads by Google Ads by Google

Toe saili lava ‘au Amerika Samoa siamupini Liki Kirikiti Mosooi

ausage@samoanews.com

O se tala e fa’anoanoa mo ‘au e lua na valaaulia e auai i le Liki o Kirikiti Fa’a Samoa mo le Mosooi o lenei tausaga, le le maua o se avanoa e auai ai i le sailiga siamupini, ina ua le ausia manumalo e tatau ai ona maua le avanoa e agava’a ai i ‘au e 3 pito i luga e sailia mai ai le siamupini o le Mosooi 2016.

 

I le le manuia ai o taumafaiga a le Tanifa o le Vao mai Sili, Savai’i, atoa ai ma Tama o le Malaka mai Niu Sila i lenei tausaga, ua sauni atu ai loa ‘au e 3 mai Amerika Samoa latou te sailia le siamupini o le Mosooi o lenei tausaga.

 

O ‘au e 3 o le a ta’alo e saili mai ai le siamupini e aofia ai le La’u Samoa, Mosiula mai Masefau ma le Meaese mai Alofau. O le mae’a ai o le ta’aloga fa’ai’u o le ta’amilosaga i le aso Gafua na te’a nei i le va o le ‘au mai Sili ma Alofau, na se’i ai loa pepa mo le fa’atulagaina o ta’aloga e sailia ai le siamupini.

 

Ae o le ta’aloga mulimuli i le va o Sili ma Alofau, na toe maua ai le avanoa o Alofau i le le fa’aiuga o le ta’aloga e sao mai ai i le sailiga siamupini, ina ua le maua e Sili ‘ai e 99 a Alofau sa tuli.

 

E 96 loa ‘ai a Sili na maua ae oo loa a latou pe i le 18, sosoo ai loa ma le masaga e fa’ai’u ai le ta’aloga.

 

O le atamai o le fa’ate’a a Alofau i lana fa’ate’a mulimuli ina ua sau le sumu ma maua ai le se’e, fiti atu loa ma le polo i tua ma sapoia mai e le talitua’a a Alofau, ma manumalo ai loa i le la ta’aloga mataina ma le ‘au malosi mai Sili.

 

Na fa’afetaia e le Komiti le ‘au masi’i mai Sili e tusa ai o le latou sao i le ta’amilosaga o le Mosooi o lenei tausaga, ma e ui ua le manuia la latou taumafaiga, e i ai le talitonuga e toe oso fo’i le la i lena tausaga.

 

Na fa’afetaia e le ‘au a Sili le valaaulia a Amerika Samoa ua mafai ai ona latou malaga mai e fai so latou sao i le ta’amilosaga o le Mosooi o lenei tausaga. Na fa’amalulu fo’i le sa fai ma fofoga o le ‘au i le mamalu o le tapuaiga a Tumua ma Pule o loo papa aao i Amerika Samoa nei, pe afai ua le tusa sa latou taumafaiga ma le fa’anaunauga sa i ai i lagona o le atunu’u, peita’i e i ai lo latou talitonuga atonu o le tausaga fou pe a toe maua se isi valaaulia, o le a sili atu ai la latou taumafaiga nai lo lenei tausaga.

 

O le aoauli nei i le itula e 3:00 ua fa’amoemoe e ta’aalo ai le ‘au a La’u Samoa ma Masefau, o le ‘au e manumalo e ta’aalo ma Alofau i le aso Toona’i e sailia ai le siamupini o lenei tausaga.