Ads by Google Ads by Google

Toe fa’afo’i i Samoa le ali’i na ta’usala i le faia o uiga fa’asotoma

ausage@samoanews.com

O se tasi o tuutuuga o le nofovaavaaia a le ali’i o Mata’igaga Simona ina ua ta’usala o ia e le fa’amasinoga maualuga i le moliaga o lona faia lea o uiga mataga fa’asotoma i se teineititi e laititi i lalo o le tulafono, o lona tuua lea o le teritori o Amerika Samoa, ae toe fo’i atu o ia i lona aiga i Samoa, ma aumau ai mo le umi e 15 tausaga o lana nofovaavaaia.

 

Ua fautuaina fo’i e le fa’amasinoga maualuga loia a itu uma e lua o lenei mataupu, ina ia mautinoa e le mafai e Simona ona toe ulufale mai i le atunu’u i totonu o tausaga e 15 o lana nofovaavaaia, e pei o ni isi o mataupu ua mae’a ona iloiloina e le fa’amasinoga, fa’asaga i ni ali’i sa fa’asa ona toe ulufale mai i Amerika Samoa, ae maua mulimuli ane o lo o feofeoa’i fiafia lava ma maua le avanoa e faigaluega ai ma maua totogi i totonu o le atunu’u.

 

O le amataga o le tausaga na taofia ai e Leoleo ia Simona i le toese i Tafuna, ona o tu’uaiga i lona faia lea o uiga mataga fa’asotoma i se teineititi e i lalo o le 16 tausaga le matua, tagofia o itutinosa o se teineititi i le tulaga muamua, atoa ai ma lona faia o ni gaioiga e ono lamatia ai le saogalemu o fanau laiti, ae i lalo o se maliliega na sainia e le ua molia ma le malo, sa ia tali ioe ai i le moliaga o le faia o uiga fa’asotoma, ae solofua ai e le fa’amasinoga isi moliaga o lo o totoe ai i le pepa o tagata sa fa’aulu e le malo.

 

I le tali ioe ai o Simona i le moliaga e pei ona ta’usala ai o ia, sa ia ioeina ai i le fa’amasinoga e fa’apea, i se taimi o le masina o Ianuari 2016, sa ia faia ai ni uiga mataga fa’asotoma i le teineititi na a’afia, ona o le manatu e fa’amalie ai lagona tu’inanau sa i lona loto.

 

Na taua e le loia a le malo e fa’apea, o se tasi o talosaga mai le aiga o le teineititi na a’afia, ia vave ona toe fa’afo’i le ua molia i Samoa, ma aumau ai mo se taimi umi ina ia le mafai ai ona toe ulufale mai o ia i totonu o le atunu’u, lea fo’i na talia e le fa’amasinoga.

 

Na fa’atoese le ua molia e tusa ai o lana solitulafono, ma ia talosagaina ai se avanoa e toe fo’i atu ai i lona aiga i Samoa e tausi lona aiga ma toe fuata’i se isi taeao fou mo ia. Na finau fo’i lana loia fautua ia Karen Shelly ina ia avea le umi lea ua mae’a ona tuli e Simona i le toese e fai ma ana fa’asalaga, ae poloaina loa o ia ina ia toe fo’i i Samoa.

 

E 15 tausaga na manatu le fa’amasinoga e taofia ai Simona i le toese i Tafuna, ae i le mae’a ai ona fa’afofoga o le fa’amasinoga i fa’afinauga a itu e lua o lenei mataupu, fa’apea ai ma talosaga a loia, na manatu ai loa le fa’amasinoga e fa’anofovaavaaia le ua molia mo le umi e 15 tausaga, i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o aso e 60 masina i le toese i Tafuna, peita’i, e na o le 12 masina lea ua poloaina o ia na te tuliina i le toese i Tafuna, faitau mai ai ma aso na amata taofia mai ai o ia i totonu o le falepuipui talu mai le aso 29 o Ianuari 2016 lea na fa’atoa taofia ai lava o ia e Leoleo.

 

O le mae’a ai ona ia tuliina o masina e 12 i le toese i Tafuna, ona ia tuua loa lea o le teritori ma toe fo’i atu i lona aiga i Samoa, ua fa’asa ona ia toe taumafai e ulufale mai i totonu o le 15 tausaga o lana nofovaavaaia.

 

Afai e le mafai e lana sponsor ona totogi lona pasese e toe fo’i atu ai i Samoa, ua poloaina e le fa’amasinoga le malo ina ia totogi le pasese ma fa’atulaga gaioiga uma mo le toe fa’afo’iina atu lea o le ua molia i Samoa.

 

Ua poloaina fo’i o ia ina ia lesitala lona igoa i le lisi o tagata ua ta’usala i le faia o uiga mataga i fanau laiti, ma ia faia se su’esu’ega i lona tino po o a’afia o ia i le siama o le HIV, ina ia tusa ai ma ala o le tulafono.