Ads by Google Ads by Google

Tele vailaau o lo o aumai fa’asolitulafono i le atunu’u

ausage@samoanews.com

O fa’amaumauga ua mae’a ona tauaaoina e le Matagaluega o Fa’atoaga a le malo, i le mae’a ai lea ona latou asia o le tele o Fa’atoaga i totonu o le atunu’u, ua fa’amaonia ai le tele o le vailaau e le fa’atagaina ona fa’aaoga i Amerika Samoa, ae ua mafai ona fa’amaonia o lo o fa’aaoga e ni isi o le aufai fa’atoaga e tausi ma fa’aleleia ai le tupu o a latou fa’atoaga.

 

Na taua e le Faatonusili le Tumau o le Matagaluega o Fa’atoaga, susuga Peter Gurr faapea ai ma le Sui Sinia i tulaga tau fa’atoaga, susuga Arona Palamo i le Samoa News e fa’apea, o vailaau uma ua maua o lo o fa’aaoga i fa’atoaga, e mautinoa lava o lo o aumai fa’anana i totonu o le atunu’u.

 

“E le fesiligia le tulaga o le aumai fa’anana o le tele o vailaau ia o lo o tausi ai le tele o fa’atoaga togalaau’aina i totonu o Amerika Samoa, lona uiga i se isi fa’aupuga, o vailaau fa’asaina uma nei o lo o aumai fa’anana, fa’asolitulafono i Amerika Samoa, ma ua atagia mai ai le soli o le tulafono”, o le saunoaga lea a le susuga a Palamo i le Samoa News.

 

Ina ua fesiligia poo le a se gaioiga a le Ofisa o Fa’atoaga ua faia ina ia foia ai lenei fa’afitauli, na saunoa Palamo, “O lea ua talosagaina isi Ofisa a le malo o lo o gafa ma tulaga o oloa mai fafo, ina ia saili totonu o containers o lo o la’u mai ai le tele o uta mai fafo, ina ia mautinoa e le o sao mai ai vailaau ia o lo o fa’aaoga fa’asolitulafono e tausi ai fa’atoaga”.

 

O le vaiaso nei na amata savalia ai e le Ofisa o Fa’atoaga fa’apea ai ma sui o Ofisa e 6 lea ua tofia e le Kovana latou sa sailia se fofo o le fa’afitauli lenei, le tele o fa’atoaga i le atunu’u o lo o masalomia lo latou fa’aaoga fa’asolitulafono o vailaau, mo le taumafai lava ina ia foia le fa’afitauli.

 

“O le fesili tele lea ua tula’i mai i le taimi nei, pe na fa’afefea ona aumai fa’asolitulafono vailaau nei i le atunu’u, pe na aumai i totonu o containers mai fafo pe na aumai fo’i i va’alele, o le itu o lo o pito sili ona naunau i ai le Ofisa o Fa’atoaga i le taimi nei, o le saogalemu o fanau ma le atunu’u atoa, ina ne’i avea le fa’atamala ma auala e alia’e ai ni fa’ama’i fou e ono a’afia ai le soifua maloloina o tagata”, o le saunoaga lea a Palamo i le Samoa News.

 

Ae na taua Gurr e fa’apea, o le fa’afitauli lea ua maitauina i le taimi nei, e le o sa’o fa’amatalaga o lo o tu’uina mai e le aufai fa’atoaga mai Asia i le latou ofisa, i le tele o taimi e fesiligia ai i latou, ae ui i le le sa’o o ia fa’amatalaga, ua mafai ona latou fa’amaonia e ala i su’ega ua faia i le tele o vailaau oona e le fa’atagaina ona fa’aaoga i fa’atoaga.

 

“O le fa’afitauli tele lea ua maituaina i le taimi nei, e le sa’o fa’amatalaga o lo o tu’uina mai e le aufai fa’atoaga Asia i le matou Ofisa, e fiu e tau fa’asufi e talanoa mai ae faigata tele ona malamalama a latou tala ona e le lelei le gagana fa’aperetania e feso’ota’i mai ai, o isi fo’i taimi e pepelo mai i vaega o lo o i ai a latou fa’atoaga, a matou o atu e siaki le isi fa’atoaga ae fai mai o le isi a latou fa’atoaga o lo o i Taputimu, a matou o atu i Taputimu ae fai mai o le isi a latou fa’atoaga o lo o i Vaitogi, po o fea lava, ma faigata ai lava ona mataou maua fa’amaumauga sa’o e fa’atatau i ituaiga vailaau o lo o fa’aaoga”, o le saunoaga lea a Gurr.

 

Ina ua fesiligia ia Gurr i le aufai fa’atoaga Asia lea ua manumalo i le tauofoga lona lua a le Ofisa e Pulea Oloa a le malo mo le sapalaiina o taumafa i le ‘school lunch’, po o agava’a a latou fa’atoaga i le sapalaiina o taumafa i le ‘school lunch’, ae na tali le ali’i fa’atonu le tumau, “E leai ma se isi o le aufai fa’atoaga ia ua manumalo i le tauofoga o pasia a latou fa’atoaga, o le mafua’aga fo’i lena o le faia o le fa’aiuga e taofia ai sapalai mo le ‘school lunch”.

 

Na fa’amanino e Gurr e fa’apea, e lei iloa e le Ofisa o Fa’atoaga le faaiuga a le Ofisa e Pulea Oloa a le malo, e tuu atu ai le manumalo i le aufai fa’atoaga Asia latou te sapalaiina taumafa mo le ‘school lunch’.

 

I le tusi a le Faatonusili o le Ofisa e Pulea Oloa a le malo, Dr. Oreta Mapu Crichton i se tasi o le aufai fa’atoaga ua fa’amanuiaina i le tauofoga, le faletua ia Helen Young, o lo o taua ai suafa o isi aufai fa’atoaga e to’a 4 ua fa’amanuiaina fa’atasi i latou mo le sapalaiina o taumafa mo le ‘school lunch’.

 

“Sa matou asia le fa’atoaga le fa’atoaga a Young ina ua matou maua le fa’aiuga o ia le isi fai fa’atoaga lea ua manumalo i le tauofoga, ae ina ua matou asia lona fanua, e leai ma se fa’atoaga o i ai, toeitiiti lava 10 maukegi o loo sosolo ai i le fanua ae leai ma se maukegi e fua, e oo fo’i i esi, o lea e tele ana pauna esi lea ua fuafua na te sapalaiina mo le ‘school lunch’ ae ina ua matou asia lona fanua, e na o le 3 lava esi o lo o tutu ai, ae leai ma se esi pula o i ai, o le fesili la lea ua tula’i mai, o fea e aumai ai e Young ana esi ma ana maukegi e fa’atumu ai ana pauna, o le tali, e aumai i isi fai faatoaga, ae o fa’atoaga na e le o pasia e le Ofisa o Fa’atoaga, o le fa’afitauli tele lena o lo o tulai mai i le taimi nei”, o le saunoaga lea a Gurr.

 

Saunoa atili Gurr e fa’apea, tele naua fa’asea ua maua e lona Ofisa i le faatau mai e le isi fai fa’atoaga o fua o fa’aeleeleaga mai le isi fai fa’atoaga, ae o fa’atoaga ia e le o pasia i asiasiga o lo o faia, o le mafua’aga lena o le taofia o le toe faia o sapalai mo le ‘school lunch’, ae sei siaki muamua fa’atoaga ina ia mautinoa o lo o saogalemu mo le fofoga taumafa o le atunu’u.